ပြည်သူတွေကို ရင်းဂစ်တစ်သန်းကျော်ဖိုး ဒါနပြုတဲ့ မလေးရှား အိမ်ရှေ့မင်းသား

ဧပြီ ၁၃၊ ၂၀၁၈
M-Media

ရှော့ပင်းစင်တာသို့ ရောက်လာသည့် မင်းသား အီဘရာဟင်

– မလေးရှားနိုင်ငံ ဂျိုးဟိုးပြည်နယ်ရဲ့ အိမ်ရှေ့မင်းသား တွန်ကူ အစ္စမေးလ် ဆူလ်တန် အီဘရာဟင်ဟာ ဗုဒ္ဓဟူးနေ့ညက ရှော့ပင်းစင်တာတစ်ခုကို လာရောက်ကာ ပြည်သူတစ်ဦးချင်းစီကို ရင်းဂစ် ၃၀၀၀ (မြန်မာငွေ ၁၀ သိန်းနီးပါး) ဖိုးအထိ ဒါနပြုခဲ့တယ်လို့ သိရပါတယ်။

မင်းသားဟာ AEON Tebrau ရှေ့ပင်းစင်တာကို ည ၇ နာရီလောက်မှာ ဇနီးဖြစ်သူ ချီပွမ်ခါလီဒါ ဘူစတာမန်နဲ့အတူ ရုတ်တရက် ရောက်ရှိလာခဲ့တာဖြစ်ပြီး စုစုပေါင်း ရင်းဂစ် ၁ သန်းကျော်လောက် လှူဒါန်းခဲ့တယ်လို့ ဒေသတွင်း မီဒီယာတွေက ဖော်ပြကြပါတယ်။

ဈေးဝယ်သူ တစ်ဦးစီဟာ တွန်းလှည်း ၃ စီးလောက်အထိ ပစ္စည်းတွေ ရရှိသွားခဲ့ကြပြီး ဆန်၊ ဆီ၊ အသီးအနှံ၊ အသီးအရွက် ဂျုံနဲ့ လက်ဖက်တွေက ၀ယ်ယူမှုအများဆုံးဖြစ်တယ်လို့ ဆိုပါတယ်။

မင်းသား အီဘရာဟင် ဒီလို လှူဒါန်းနေတယ်ဆိုတဲ့ သတင်းတွေ ပြန့်နှံ့သွားတဲ့အတွက် ရှော့ပင်းစင်တာထဲ လူတွေ ထပ်ဝင်လာတာကြောင့် ည ၈ နာရီမှာ စင်တာကို ပိတ်ပစ်ခဲ့ရပါတယ်။

မင်းသားရဲ့ ဒါနပြုမှုနဲ့ပတ်သက်တဲ့ ပုံတွေလည်း ဆိုရှယ်မီဒီယာမှာ ပြန့်နှံ့ခဲ့ပါတယ်။ အဲဒီရှော့ပင်းစင်တာဟာ ကြာသာပတေးနေ့အထိ ပိတ်ထားဆဲပါ။

မင်းသား အီဘရာဟင်က သူ့အနေနဲ့ ပြည်သူတွေကို ချစ်ခင်တဲ့အတွက် ဒီလို လှူဒါန်းတာဖြစ်တယ်လို့ Johor Southern Tigers ရဲ့ Facebook စာမျက်မှာ ရေးသားခဲ့ပါတယ်။

“ကျွန်တော်ဟာ နိုင်ငံရေးသမားတစ်ယောက် မဟုတ်ဘူး။ မဲလည်းမလိုအပ်ပါဘူး။ ဒါပေမယ့် ကျွန်တော့်ပြည်သူတွေကို ကျွန်တော် တကယ်ချစ်တယ်။ ဂျိုဟိုးပြည်သူတွေနဲ့ အမြဲတမ်းအတူ ရှိနေမှာပါ။ ကျွန်တော်ဟာ ဂျိုးဟိုးကိုချစ်သူ ဖြစ်ပါတယ်”

မင်းသားဟာ လက်ရှိအစိုးရကိုသာ ယုံကြည်ပြီး အတိုက်အခံတွေစကားကို နားမထောင်ဖို့ ပြီးခဲ့တဲ့တစ်ပတ်မှာ ပြောကြားခဲ့ပြီးတဲ့နောက် မလေးရှားပြည်သူတွေရဲ့ ဝေဖန်မှုကို ခံခဲ့ရသူ ဖြစ်ပါတယ်။ နောက်ပိုင်းမှာ သူက သူ့ရဲ့ ကိုယ်ပိုင်အမြင်ကိုသာ ပြောကြားတာဖြစ်တယ်လို့ ကာကွယ်ပြောဆိုခဲ့ပါတယ်။

ဝန်ကြီးချုပ်နာဂျစ်ဦးဆောင်တဲ့ လက်ရှိမလေးအစိုးရဟာ နိုင်ငံ့ဘဏ္ဍာတွေ အလွဲသုံးစားလုပ်မှုအတွက် ပြီးခဲ့တဲ့နှစ်ကတည်းကစလို့ ဝေဖန်ခံခဲ့နေတာ ဖြစ်ပါတယ်။

Ref: CNA