ကမ္ဘာ့ပထမဆုံး Hyperloop စနစ်ကို ယူအေအီးတွင် အကောင်အထည်ဖော်မည်

ဧပြီ ၁၈၊ ၂၀၁၈
M-Media

– ကမ္ဘာ့နောက်ဆုံးပေါ် ပို့ဆောင်ရေးစနစ်ဖြစ်တဲ့ Hyperloop စနစ်ကို တည်ဆောက်နိုင်ဖို့အတွက် ယူအေအီးနိုင်ငံ အဘူဒါဘီအခြေစိုက် အိမ်ခြံမြေလုပ်ငန်း Aldar Properties PJSC နဲ့ ပြင်သစ်အခြေစိုက် Hyperloop နည်းပညာကုမ္ပဏီ HyperloopTT တို့အကြား သဘောတူစာချုပ်တစ်ခု ဒီကနေ့မှာ ချုပ်ဆိုလိုက်ပါတယ်။

ယူအေအီးရဲ့ ဒီစီမံကိန်းမှာ အဘူဒါဘီနဲ့ ဒူဘိုင်းအကြား ပြေးဆွဲမယ့် ၁၀ ကီလိုမီတာအရှည် Hyperloop လမ်းကြောင်းအပြင် တီထွင်ဖန်တီးမှုစင်တာ XO Square Innovation Center၊ ဧည့်သည်တွေ လေ့လာနိုင်မယ့် Hyperloop Visitor Center တို့လည်း ပါဝင်မှာ ဖြစ်ပါတယ်။

ဒီ ၁၀ ကီလိုမီတာ စီးပွားဖြစ်လမ်းကြောင်း ၂၀၂၀ မှာ ပြီးစီးသွားရင် အဘူဒါဘီနဲ့ ဒူဘိုင်းမြို့ကို ၁၂ မိနစ်နဲ့ အရောက်သွားနိုင်မှာ ဖြစ်ပါတယ်။ နောက်ပိုင်း ယူအေအီးနိုင်ငံတစ်ဝှမ်းလုံးမှာ ဒီစနစ်ကို ထပ်မံတိုးချဲ့သွားဖို့လည်း ရှိနေပါတယ်။

Hyperloop ဆိုတာ ကြီးမားတဲ့ လှိုင်ခေါင်းကြီးထဲမှာ ရထားတွဲလို အတွဲမျိုးကို သံလိုက်အားအသုံးပြုကာ မောင်းနှင်ပေးတဲ့စနစ်ဖြစ်ပြီး တစ်နာရီကို မိုင် ၇၅၀ လောက် သွားနိုင်မှာဖြစ်ပါတယ်။ ဒီနည်းပညာကို ၂၀၁၃ ခုနှစ်မှာ ဘီလီယံနာ အေလွန်မက်စ်က ချပြခဲ့တာပါ။

HyperloopTT ဟာ အခုလအစောပိုင်းမှာ လူတင်ဆောင်နိုင်မယ့် ပထမဆုံး Hyperloop အတွဲကို စတင်တည်ဆောက်ခဲ့ပြီး ပြင်သစ်နိုင် တူးလော့စ်မြို့မှာ စမ်းသပ်ပြခဲ့ပါတယ်။ အခုနှစ်ကုန်ပိုင်းမှာတော့ လူတင်ပြီး စမ်းသပ်ဖို့ ရှိနေပါတယ်။ အဲဒီအတွဲတွေကို ယူအေအီးမပို့ခင် တူးလော့စ်မှာပဲ တည်ဆောက်မှာ ဖြစ်ပါတယ်။

“ဒီသဘောတူညီချက်ဟာ ကမ္ဘာ့ပထမဆုံး Hyperloop စနစ် ယူအေအီးမှာ စတင်ဖို့ ဖောင်ဒေးရှင်းဖြစ်ပြီး တစ်ဖြည်းဖြည်းနဲ့ အဘူဒါဘီကနေ အလ်အိန်း၊ ဒူဘိုင်း၊ ဆော်ဒီက ရီယာ့ဒ်မြို့အထိ ဆက်သွယ်ဖို့ ရှိပါတယ်။ ပုံမှန် ပံ့ပိုးမှုနဲ့အတူ ပထမဆုံးလမ်းပိုင်းကို Expo 2020 အမီ ပြေးဆွဲနိုင်ဖို့ ကျွန်တော်တို့ မျှော်လင့်ထားပါတယ်” လို့ HyperloopTT ရဲ့ ဥက္ကဌ ဘီဘော့ပ် ဂရက်စ်တာက ပြောကြားခဲ့ပါတယ်။

Ref: Khalej Times