Starbucks က အမေရိကန်ရှိ ၀န်ထမ်းများကို လူမျိုးရေးခွဲခြားမှု တိုက်ဖျက်ရေး အသိပညာပေးမည်

ဧပြီ ၁၈၊ ၂၀၁၈
M-Media

ဆိုင်အတွင်း ပြည်သူများ ဆန္ဒပြနေမှုကို ရဲတပ်ဖွဲ့ဝင်များ စောင့်ကြပ်နေပုံ

– ကမ္ဘာကျော် ကော်ဖီဆိုင်တစ်ခုဖြစ်တဲ့ Starbucks ဟာ အမေရိကန်မှာရှိတဲ့ သူ့ဆိုင်ခွဲ ၈၀၀၀ ကို မေလ ၂၉ ရက်နေ့မှာ နေ့တစ်ဝက်ပိတ်ပြီး ၀န်ထမ်းတွေကို လူမျိုးရေးခွဲခြားမှုတိုက်ဖျက်ရေး အသိပညာပေးအစီအစဉ် ပြုလုပ်သွားမယ်လို့ ကြေငြာလိုက်ပါတယ်။

ဖီလာဒဲလ်ဖီးယားက Starbucks ကော်ဖီဆိုင်မှာ လူမည်းနှစ်ယောက် လာထိုင်တာကို မန်နေဂျာက ရဲခေါ်ဖမ်းခိုင်းတဲ့ကိစ္စအတွက် ပြည်သူလူထုရဲ့ဝေဖန်မှုတွေ ညံသွားတဲ့နောက်ပိုင်း ဒီလိုဆောင်ရွက်မှု ပေါ်ထွက်လာတာပါ။

Starbucks ရဲ့ ၀န်ထမ်းပေါင်း ၁၇၅၀၀၀ ကို လူမျိုးရေးခွဲခြားမှု တိုက်ဖျက်ရေး ထိပ်တန်း တက်ကြွလှုပ်ရှားသူတွေက အသိပညာပေးသွားမှာ ဖြစ်ပါတယ်။ အခြား လက်ခွဲယူထားတဲ့ ဆိုင် ၆၀၀၀ အတွက် အသိပညာပေးရေးဆိုင်ရာ ပစ္စည်းတွေကို Starbucks ပင်မကုမ္ပဏီက ထောက်ပံ့ပေးသွားမယ်လို့ ဆိုပါတယ်။

“ပြီးခဲ့တဲ့ ရက်အနည်းငယ်အတွင်း ကျွန်တော့်ရဲ့ ခေါင်းဆောင်မှုအဖွဲ့နဲ့အတူ ကျွန်တော်ဟာ ဖီလာဒဲလ်ဖီးယားမှာ လူထုအသံကို နားထောင်ခဲ့ပြီး ကျွန်တော်တို့လုပ်တာ မှားသွားကြောင်း၊ ဒီအတွက် ပြန်လည်ဖာထေးဖို့လိုကြောင်း သဘောပေါက်ခဲ့ပါတယ်။ ဒီကိစ္စဟာ Starbucks တစ်ခုတည်းနဲ့သာ သက်ဆိုင်တာမျိုး မဟုတ်ဘဲ ကျွန်တော်တို့ဟာ ဖြေရှင်းမှုမှာ တစ်စိတ်တစ်ပိုင်း ပါဝင်ချင်ပါတယ်” လို့ Starbucks စီအီးအို ကီဗင်ဂျွန်ဆင်က ပြောကြားခဲ့ပါတယ်။

ပြီးခဲ့တဲ့ကြာသာပတေးနေ့ ဖီလာဒဲလ်ဖီးယားကဆိုင်မှာ ဘာမှမမှာဘဲ လာထိုင်နေတဲ့ လူမည်းနှစ်ယောက်ကို ဆိုင်မန်နေဂျာက ရဲခေါ်ဖမ်းခိုင်းတဲ့ကိစ္စအတွက်လည်း ဂျွန်ဆန်က တောင်းပန်ခဲ့ပါတယ်။ အဲဒီလူမည်းနှစ်ယောက်က သူတို့ဟာ သူငယ်ချင်းတစ်ဦးကို စောင့်နေတာလို့ ပြောကြားခဲ့ပါတယ်။

သူတို့ဖမ်းဆီးခံရတဲ့ ဗီဒီယိုဟာ ဆိုရှယ်မီဒီယာမှာ ပြန့်နှံ့ခဲ့ပြီးတဲ့နောက် အမေရိကန်ပြည်သူတွေဟာ Starbucks ကို ဝေဖန်ပြစ်တင်မှုတွေ ပြုလုပ်ခဲ့ကြပါတယ်။

ကုမ္ပဏီရဲ့ ရှေ့နေအဖွဲ့က ဂျွန်ဆင်ဟာ ဒီလူမည်းနှစ်ယောက်နဲ့ တွေ့ဆုံခဲ့ပြီး အပြုသဘောဆောင်တဲ့ ဆွေးနွေးမှုတွေ လုပ်ခဲ့ကြတယ်လို့ ပြောကြားခဲ့ပါတယ်။

ရဲခေါ်ဖမ်းခိုင်းတဲ့ ဆိုင်မန်နေဂျာကိုလည်း အလုပ်ဖြုတ်လိုက်တယ်လို့ Starbucks က ကြေငြာခဲ့ပါတယ်။

Ref: RT