အကျိုးမရှိလျှင် ကင်ဂျုံအန်နှင့်ဆွေးနွေးမှုကို ဖျက်ပစ်မည်ဟု ထရမ့်ပြော

ဧပြီ ၁၉၊ ၂၀၁၈
M-Media

ဂျပန်ဝန်ကြီးချုပ်နှင့် တွေ့ဆုံနေသည့် ထရမ့်

– မြောက်ကိုရီးယားခေါင်းဆောင် ကင်ဂျုံအန်နှင့် ဆွေးနွေးမည့် အစီအစဉ်အတွင် အကျိုးမဖြစ်ထွန်းဟု ယူဆပါက ဆွေးနွေးပွဲကို ဖျက်ပစ်မည်ဟု အမေရိကန်သမ္မတ ဒေါ်နယ်ထရမ့်က ခြိမ်းခြောက်လိုက်သည်။

အမေရိကန်သို့ ရောက်ရှိနေသည့် ဂျပန်ဝန်ကြီးချုပ် ရှင်ဇိုအာဘေးနှင့် ယမန်နေ့တွင် ပြုလုပ်သည့် သတင်းစာရှင်းလင်းပွဲတွင် ထရမ့်က ထိုကဲ့သို့ ပြောကြားလိုက်ခြင်းဖြစ်ပြီး ထိုဆွေးနွေးမှုအတွက် အကောင်းမြင်သည်ဟုလည်း ဆိုသည်။

“မြွေမသေ တုတ်မကျိုး ရှိနေတာကို ကျွန်တော် ကြိုက်ပါတယ်။ အခုလည်း ဒီလိုအခြေအနေမျိုးပါ”

မြောက်ကိုရီးယားအနေဖြင့် နျူအစီအစဉ်ကို စွန့်လွှတ်သည်အထိ အမြင့်ဆုံး ဆက်လက်ဖိအားပေးသွားမည်ဟုလည်း ထရမ့်က ထည့်သွင်းပြောဆိုခဲ့သည်။

ဂျပန်ဝန်ကြီးချုပ် အာဘေးက ဟန်ပြဆွေးနွေးပွဲအတွက် ကင်ဂျုံအန်ကို ဆုလာဘ်မပေးမိစေရန် နိုင်ငံတကာအသိုင်းအ၀ိုင်းနှင့် အမေရိကန်တို့ကို တိုက်တွန်းခဲ့သည်။

အမေရိကန် ထောက်လှမ်းရေးအကြီးအကဲ မိုက် ပွမ်ပီယိုမှာ အခုလအစောပိုင်းက မြောက်ကိုရီးယားသို့ သွားရောက်ကာ ကင်ဂျုံအန်နှင့် လျှို့ဝှက် တွေ့ဆုံခဲ့သည်ဆိုသည့် သတင်းကိုလည်း ထရမ့်က ယမန်နေ့တွင် အတည်ပြုခဲ့သည်။

Ref: Aljazeera