အာဖရိကနိုင်ငံတစ်ခု နိုင်ငံအမည်ပြောင်းလဲ

ဧပြီ ၂၀၊ ၂၀၁၈
M-Media

ဘုရင် အမ်ဆွာတီကို ရိုးရာဝတ်စုံနှင့် တွေ့ရစဉ်

– အာဖရိကနိုင်ငံငယ်တစ်ခုဖြစ်သည့် ဆွာဇီလန်နိုင်ငံ၏ ဘုရင် အမ်ဆွာတီ ၃ က နိုင်ငံအမည်ပြောင်းလဲကြောင်း ယမန်နေ့တွင် ကြေငြာခဲ့သည်။

ဗြိတိသျှကိုလိုနီအဖြစ်မှ လွတ်လပ်ရေးရသည့် နှစ် ၅၀ ပြည့်အဖြင် ဒုတိယမြို့တော် မန်ဇီနီရှိ ဘောလုံးကွင်းတွင် ပြုလုပ်သော အခမ်းအနား၌ ဘုရင် အမ်ဆွာတီက နိုင်ငံအား အီဆွာတီနီ (eSwatini) အဖြစ် အမည်ပြောင်းလဲကြောင်း ပြောကြားခဲ့သည်။

“ဆွာဇီလန်ဟာ သူ့ရဲ့ မူရင်းအမည်ကို ပြောင်းလဲတော့မယ်ဆိုတာ ကျွန်တော် ကြေငြာချင်ပါတယ်။ အာဖရိကနိုင်ငံတွေ လွတ်လပ်ရေးရတဲ့အချိန်မှာ သူတို့ ကိုလိုနီအပြုမခံရခင်က ရှိခဲ့တဲ့အမည်တွေကို ပြောင်းပေးခဲ့ကြတယ်။ ဒါ့ကြောင့် အခုအချိန်ကစပြီး ကျွန်တော်တို့တိုင်းပြည်ကိုလည်း အီဆွာတီနီ ဘုရင့်နိုင်ငံလို့ တရားဝင်ခေါ်ဆိုသွားမှာပါ”

အာဖရိကတောင်ပိုင်းရှိ ဆွာဇီလန်နိုင်ငံမှာ ၁၉၀၀ ပြည့်နှစ်များကတည်းက ဗြိတိသျှ၏ ကာကွယ်မှုအောက်တွင် နေထိုင်ခဲ့ရပြီး ၁၉၆၈ ခုနှစ်တွင် လွတ်လပ်ရေးရရှိခဲ့သည်။ သို့သော်လည်း လွတ်လပ်ရေးရသည့် အချိန်တွင် အခြားသော အာဖရိကနိုင်ငံများကဲ့သို့ ယခင်အမည်ကို ပြောင်းလဲခဲ့ခြင်းမရှိပေ။

အီဆွာတီနီမှာ ဆွာဇီဘာသာစကားဖြစ်ပြီး ‘ဆွာတီလူမျိုးများ၏ ဌာနေ’ ဟု အဓိပ္ပါယ်ရသည်။

နိုင်ငံသားများက ဆွာဇီလန်ဆိုသည့် အမည်မှာ အင်္ဂလိပ်နှောသည်ဟု ဝေဖန်မှုများ ရှိခဲ့ပြီး နာမည်ပြောင်းရန်အတွက် အစိုးရမှာ ပြီးခဲ့သည့် နှစ်အနည်းကတည်းက ကြိုးစားခဲ့သည်။

၁၉၈၆ ခုနှစ် အသက် ၁၈ နှစ်အရွယ်တွင် အာဏာရခဲ့သည့် ဘုရင်အမ်ဆွာတီမှာ ယခင်က မိန့်ခွန်းများတွင် အမည်အသစ်ကို အသုံးပြုခဲ့သည်။

လူဦးရေ ၁.၃ သန်းသာရှိသည့် ဆွာဇီလန်မှာ အာဖရိကတိုက်တွင် ဘုရင်စနစ်ကို အပြည့်အ၀ကျင့်သုံးသည့် တစ်ခုတည်းသော နိုင်ငံဖြစ်သည်။

ယခုကဲ့သို့ အမည်ပြောင်းမှုကြောင့် အခြေခံဥပဒေကို ပြန်လည်ရေးသားရမည်ဖြစ်ပြီး၊ ရဲတပ်ဖွဲ့၊ စစ်တပ်နှင့် တက္ကသိုလ်တို့၏ အမည်များကိုလည်း ပြောင်းလဲရမည်ဖြစ်သည်။

Ref: Aljazeera