အင်္ဂါနေ့မနက် နိုင်ငံတကာသတင်းများ

မေ ၁၊ ၂၀၁၈
M-Media

အီရန်မှာ နျူစီမံကိန်းကို လျှို့ဝှက်လုပ်ဆောင်နေသည်ဟု နေတန်ယာဟု ပြော
================
အီရန်ဟာ နျူကလီးယားစီမံကိန်း လျှို့ဝှက်လုပ်ဆောင်နေတယ်ဆိုတဲ့ အထောက်အထားတွေ သူတို့ ထောက်လှမ်းရေးက ရထားတယ်ဆိုပြီး အစ္စရေးဝန်ကြီးချုပ် နေတန်ယာဟုက မနေ့မှာ ရှင်းလင်းပွဲတစ်ခု လုပ်ခဲ့ပါတယ်။ အရှေ့အလယ်ပိုင်းမှာ အစ္စရေးဟာ တစ်ခုတည်းသော နျူပိုင်ဆိုင်တဲ့နိုင်ငံဖြစ်ပြီး ပတ်ဝန်းကျင်နိုင်ငံတွေမှာ ဒီလိုလက်နက်ရှိလာမှာကို မလိုလားပါဘူး။ ကျွမ်းကျင်သူတွေကတော့ နေတန်ယာဟုဟာ သတင်းတွေကို ချဲ့ကားပြောဆိုပြီး နိုင်ငံရေးအမြတ်ထုတ်တတ်သူတစ်ဦး ဖြစ်တယ်လို့ ပြောကြားခဲ့ပါတယ်။ အီရန်နိုင်ငံခြားရေးဝန်ကြီးကလည်း နေတန်ယာဟုဟာ သိုးရေခြုံထားတဲ့ ၀ံပုလွေဖြစ်တယ်လို့ တုန့်ပြန်ခဲ့ပါတယ်။

Telegram ပိတ်သည့်အတွက် ရုရှားပြည်သူများ ဆန္ဒပြ
=================
ဖုန်းမက်ဆေ့ app တစ်ခုဖြစ်တဲ့ Telegram ကို အစိုးရက ပိတ်ပင်မှုအတွက် ထောင်နဲ့ချီတဲ့ ရုရှားပြည်သူတွေဟာ မနေ့က မြို့တော်မော်စကိုမှာ အကြီးအကျယ် ဆန္ဒပြခဲ့ကြပါတယ်။ ရုရှားတရားရုံးက Telegram ဟာ လုံခြုံရေးဌာနတွေကို ၀င်ရောက်ကြည့်ရှုခွင့် မပေးတဲ့အတွက် အစိုးရက ပိတ်ပင်သင့်တယ်လို့ လွန်ခဲ့တဲ့ ၂ ပတ်မှာ ဆုံးဖြတ်ခဲ့ပါတယ်။ Telegram ဟာ ရုရှားမှာ လူသုံးများတဲ့ app တစ်ခုဖြစ်ပြီး ဆန္ဒပြသူတွေကတော့ အစိုးရရဲ့ ဒီလုပ်ရပ်ဟာ နောက်ပြန်သွားတဲ့လုပ်ရပ်ဖြစ်တယ်လို့ ပြောကြားခဲ့ပါတယ်။

ကဘူးလ်တွင် IS ၏ ဗုံးခွဲမှုကြောင့် လူ ၃၀ နီးပါး သေဆုံး
===============
အာဖဂန်နစ္စတန်မြို့တော် ကဘူးလ်မှာ မနေ့မနက်ပိုင်းက ပေါက်ကွဲမှုနှစ်ခုအတွင်း ဂျာနယ်လစ် ၉ ဦး အပါအ၀င် အနည်းဆုံး လူ ၂၉ ဦး သေဆုံးခဲ့ပြီး တော်တော်များများ ဒဏ်ရာရခဲ့ပါတယ်။ IS အကြမ်းဖက်အဖွဲ့ကတော့ ဒါဟာ သူတို့လက်ချက်ဖြစ်တယ်လို့ ပြောကြားခဲ့ပါတယ်။ ပထမပေါက်ကွဲမှုဖြစ်တဲ့နေရာကို သတင်းယူနေရင်း ဒုတိယပေါက်ကွဲမှု ထပ်ဖြစ်တဲ့အတွက် သတင်းထောက်တွေ သေဆုံးခဲ့ရတာဖြစ်ပါတယ်။

လက်တင်အမေရိကန်တွင် အင်တာပိုလ်က လူကုန်ကူးခံရသူများကို ကယ်တင်
==================
လက်တင်အမေရိကနဲ့ ကာရစ်ဘီယံက နိုင်ငံ ၁၃ နိုင်ငံမှာ မိမိတို့ဟာ လူကုန်ကူးခံရသူပေါင်း ၃၅၀ နီးပါးလောက်ကို ကယ်တင်ခဲ့တယ်လို့ နိုင်ငံတကာရဲတပ်ဖွဲ့ အင်တာပိုလ်က မနေ့မှာ ထုတ်ပြန်ပါတယ်။ ကယ်တင်ခဲ့ရသူတွေထဲမှာ လိင်အမြတ်ထုတ်မှု၊ အဓမ္မ လုပ်အားခိုင်းစေမှုတွေကို ခံရနိုင်သူတွေ၊ ညကလပ်၊ လယ်လုပ်ငန်း၊ စက်ရုံတွေ၊ ပျံကျဈေးတွေမှာ အလုပ်လုပ်နေရတဲ့ ကလေးငယ်တွေ၊ အရွယ်ရောက်သူတွေလည်း ပါဝင်ပါတယ်။ အဲဒီ ၁၃ နိုင်ငံထဲမှာ ဘရာဇီးလ်၊ ဂျမေကကာ၊ ထရီနီဒတ်နှင့် တိုဘာကို၊ ဗင်နီဇွဲလားနိုင်ငံတို့လည်း ပါဝင်ပါတယ်။

Ref: Aljazeera