အီရန်နှင့် ဆော်ဒီကို အမေရိကန်က ရန်တိုက်ပေးနေသည်ဟု အီရန်အဓိပတိ ပြော

မေ ၁၊ ၂၀၁၈
M-Media

အီရန်အဓိပတိ အယာတိုလာ ခါမေနီ

– အမေရိကန်ဟာ ဆော်ဒီနဲ့ အီရန်ကို လှည့်တိုက်ပေးပြီး ဒေသတွင်းမှာ ပြဿနာတစ်ခု ထပ်ဖြစ်လာအောင် ဆောင်ရွက်နေတယ်လို့ အီရန်အဓိပတိ အယာတိုလာ ခါမေနီက ပြောကြားလိုက်ပါတယ်။

မနေ့က ရုပ်သံမိန့်ခွန်းမှာ ခါမေနီက အရှေ့အလယ်ပိုင်းကနေ အမေရိကန်ထွက်သွားဖို့ ထပ်မံတောင်းဆိုခဲ့ပြီး အီရန်ကိုစိန်ခေါ်တဲ့ ဘယ်လိုအင်အားကြီးနိုင်ငံမျိုးမဆို အရှုံးနဲ့ရင်ဆိုင်ရမယ်လို့လည်း ပြောကြားခဲ့ပါတယ်။

“အီရန်ကိုရန်စဖို့ နည်းလမ်းတွေထဲကတစ်ခုဟာ ဒေသတွင်းက အတွေ့အကြုံမရှိတဲ့ အုပ်စိုးသူတွေကို မြှောက်ပေးတာမျိုးပါ။ အမေရိကန်ဟာ ဆော်ဒီနဲ့ အီရန်ကို ရန်တိုက်ပေးဖို့ ကြိုးစားနေပါတယ်။ သူတို့ရဲ့ ရည်ရွယ်ချက်က ဒေသတွင်းမှာ နောက်ထပ် ပြဿနာတစ်ခုဖန်တီးကာ မွတ်စလင်အချင်းအချင်း တိုက်ပေးဖို့ ဖြစ်ပါတယ်။ အဲဒီ အစိုးရအနေနဲ့ အသိဉာဏ်သာရှိမယ်ဆို အီရန်ကို လာစမ်းမှာ မဟုတ်ပါဘူး။ လာစမ်းရင်တော့ အရှုံးနဲ့ ကြုံတွေ့ရပါလိမ့်မယ်”

အတွေ့အကြုံမရှိတဲ့ အုပ်စိုးသူဆိုတာ ဆော်ဒီက အသက် ၃၂ နှစ်အရွယ် အိမ်ရှေ့မင်းသား မိုဟာမက် ဘင် ဆလ်မန်ကို ခါမေနီက ရည်ညွှန်းခဲ့တာဖြစ်ပါတယ်။

အီရန်အနေနဲ့ အရှေ့အလယ်ပိုင်း သြဇာသက်ရောက်မှုကို ကန့်သတ်သွားမှာမဟုတ်ဘူးလို့လည်း ခါမေနီက ပြောပါတယ်။

“အမေရိကန်ကသာ ထွက်သွားသင့်သူပါ။ အရှေ့အလယ်ပိုင်း၊ အနောက်အာရှနဲ့ ပါရှန်ပင်လယ်ကွေ့ဟာ ငါတို့မြေပါပဲ”

ဆော်ဒီဟာ အမေရိကန်ရဲ့ အဓိကမဟာမိတ်ဖြစ်ပြီး ဒေသတွင်း ပဋိပက္ခတွေမှာ အီရန်နဲ့ အားပြိုင်မှုတွေ ရှိနေပါတယ်။

အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဘဟ်ရမ် ကာဆီမီက အမေရိကန်အနေနဲ့ အီရန်ရဲ့သြဇာကို တားဆီးဖို့ ကြိုးစားပေမယ့်လည်း ဒေသတွင်း မိတ်ဆွေတွေကို မိမိတို့က ဆက်လက် ပံ့ပိုးကူညီသွားမယ်လို့ ပြောကြားကြောင်း နိုင်ငံပိုင်သတင်းဌာနကနေ ဖော်ပြခဲ့ပါတယ်။

Ref: Aljazeera