အမေရိကန်၊ တရုတ်နှင့် ဆော်ဒီတို့က စစ်အသုံးစားရိတ် အမြင့်ဆုံးနိုင်ငံများအဖြစ် ရပ်တည်

မေ ၂၊ ၂၀၁၈
M-Media

– ၂၀၁၇ ခုနှစ် ကမ္ဘာ့နိုင်ငံတွေရဲ့ စစ်အသုံးစားရိတ်ဟာ စစ်အေးခေတ်နောက်ပိုင်း အမြင့်ဆုံးအဖြစ် ကန်ဒေါ်လာ ၁.၇၃ ထရီလီယံအထိ ရောက်ရှိခဲ့ပြီး အမေရိကန်၊ တရုတ်နဲ့ ဆော်ဒီအာရေဗျတို့ဟာ စစ်အသုံးစားရိတ် အများဆုံးဆုံး နိုင်ငံတွေအဖြစ် ရပ်တည်နေပါတယ်။

Stockholm International Peace Research Institute (SIPRI) က ကမ္ဘာ့နိုင်ငံတွေရဲ့ စစ်အသုံးစားရိတ် အချက်အလက်ဆိုင်ရာ အစီရင်ခံစာတစ်ခုကို ဒီကနေ့မှာ ထုတ်ပြန်ခဲ့တာဖြစ်ပြီး ၂၀၁၇ ခုနှစ် ကမ္ဘာ့နိုင်ငံတွေရဲ့ စစ်အသုံးစားရိတ်ဟာ ၂၀၁၆ ခုနှစ်ကထက် ၁.၁ ရာခိုင်နှုန်း မြင့်တက်လာတာ ဖြစ်ပါတယ်။

အမေရိကန်ဟာ ဒေါ်လာ ဘီလီယံ ၆၁၀ နဲ့ ကမ္ဘာပေါ်မှာ စစ်အသုံးစားရိတ်အများဆုံး နိုင်ငံအဖြစ် ရပ်တည်နေပါတယ်။ ၂၀၁၆ ခုနှစ်ကနဲ့ ပမာဏ အတူတူပဲဖြစ်ပြီး ကမ္ဘာ့ စစ်အသုံးစားရိတ်ရဲ့ ၃၅ ရာခိုင်နှုန်း ရှိပါတယ်။ ဒါဟာ သူ့အောက်က နိုင်ငံ ၇ နိုင်ငံပေါင်းတဲ့ ပမာဏထက်ကို ကျော်လွန်နေတာပါ။

အမေရိကန်ရဲ့ ကာကွယ်ရေး အသုံးစားရိတ်ဟာ ဒီနှစ်မှာ ထပ်မံ မြင့်တက်သွားဖို့ ရှိပါတယ်။

တရုတ်ကတော့ စစ်အသုံးစားရိတ် ၂၂၈ ဘီလီယံနဲ့ ဒုတိယနေရာမှာ ရှိနေကာ ၂၀၁၆ ခုနှစ်ကထက် ၁၂ ဘီလီယံ ပိုမိုသုံးစွဲခဲ့တာပါ။

SIPRI က တရုတ်နိုင်ငံရဲ့ ဒီပမာဏဟာ ကမ္ဘာ့စုစုပေါင်း စစ်အသုံးစားရိတ်ရဲ့ ၁၃ ရာခိုင်နှုန်းရှိပြီး ၂၀၀၈ ခုနှစ်ကထက် ၂ ဆ တက်လာတာဖြစ်တယ်လို့ ဆိုပါတယ်။

ဆော်ဒီက ၂၀၁၇ ခုနှစ်မှာ ကာကွယ်ရေးအတွက် ဒေါ်လာ ၆၉.၄ ဘီလီယံ အသုံးပြုခဲ့ပြီး တတိယနေရာမှာ ရပ်တည်နေပါတယ်။ ၂၀၁၆ ခုနှစ် ကာကွယ်ရေးအသုံးစားရိတ်စာရင်းမှာ တတိယနေရာ ရရှိခဲ့တဲ့ ရုရှားကတော့ ၂၀၁၇ ခုနှစ်မှာ သုံးစွဲမှု ၂၀ ရာခိုင်နှုန်း ကျဆင်းကာ ၆၆.၃ ဘီလီယံ ရှိခဲ့ပါတယ်။ ဒါဟာ ၁၉၉၈ ခုနှစ်ကတည်းက ပထမဆုံး ကျဆင်းတာပါ။

အိန္ဒိယနဲ့ ပြင်သစ်တို့က အသုံးစားရိတ် ၆၄ ဘီလီယံနဲ့ ၅၇.၈ ဘီလီယံသုံးစွဲကာ နံပါတ် ၅ နဲ့ ၆ နေရာတွေမှာ ရှိနေပြီး၊ ယူကေက ၄၇.၂ ဘီလီယံနဲ့ အဆင့် ၇၊ ဂျပန်က ၄၅.၄ ဘီလီယံနဲ့ အဆင့် ၈၊ ဂျာမနီက ၄၄.၃ ဘီလီယံနဲ့ အဆင့် ၉၊ တောင်ကိုရီးယားက ၃၉.၂ ဘီလီယံနဲ့ အဆင့် ၁၀ နေရာတွေမှာ အသီးသီး ရပ်တည်နေပါတယ်။

အားလုံးခြုံကြည့်ရင် ၂၀၁၇ ခုနှစ်အတွင်း နေတိုးအဖွဲ့ဝင်နိုင်ငံတွေက စစ်အသုံးစားရိတ်အတွက် စုစုပေါင်း ကန်ဒေါ်လာ ဘီလီယံ ၉၀၀ လောက် သုံးခဲ့ပြီး ကမ္ဘာ့နိုင်ငံတွေအားလုံးပေါင်း စစ်အသုံးစားရိတ်ရဲ့ ၅၂ ရာခိုင်နှုန်း ရှိနေပါတယ်။

Ref: Aljazeera