မလေးရှား အတိုက်အခံခေါင်းဆောင် အန်ဝါရ် အီဘရာဟင် မကြာမီ ပြန်လွတ်မည်

မေ ၁၁၊ ၂၀၁၈
M-Media

ဖမ်းဆီးခံထားရသည့် အတိုက်အခံခေါင်းဆောင် အန်ဝါရ် အီဘရာဟင်

– လက်ရှိ ထောင်ဒဏ်ကျခံနေရတဲ့ အတိုက်အခံခေါင်းဆောင် အန်န၀ါရ် အီဘရာဟင်ဟာ မကြာခင်မှာ ဘုရင်ရဲ့ လွတ်ငြိမ်းချမ်းသာခွင့်ရပြီး ပြန်လည်လွတ်မြောက်လာလိမ့်မယ်လို့ မလေးရှားဝန်ကြီးချုပ် မဟာသီယာ မိုဟာမက်က ဒီကနေ့ပြုလုပ်တဲ့ သတင်းစာရှင်းလင်းပွဲမှာ ပြောကြားလိုက်ပါတယ်။

မနေ့က တွေ့ဆုံမှုအတွင်း ဘုရင်က အန်န၀ါရ်ကို လွတ်ငြိမ်းချမ်းသာခွင့်ပေးဖို့ ဆန္ဒရှိတယ်လို့ ပြောကြားခဲ့ကြောင်း မဟာသီယာက ဆိုပါတယ်။

“ချွင်းချက်မရှိတဲ့ လွတ်ငြိမ်းချမ်းသာခွင့်မျိုး ဖြစ်မှာပါ။ ဒါ့ကြောင့် လွတ်ငြိမ်းချမ်းသာခွင့် ရပြီးတာနဲ့ သူဟာ ချက်ခြင်း ပြန်လည်လွတ်မြောက်လာမှာ ဖြစ်ပါတယ်။ အဲဒီနောက် နိုင်ငံရေးမှာ အပြည့်အ၀ ပါဝင်ဆောင်ရွက်ခွင့် ရမှာပါ”

အတိုက်အခံခေါင်းဆောင် အန်ဝါရ်အီဘရာဟင်ဟာ ၀န်ကြီးချုပ် နာဂျစ်လက်ထက်မှာ လိင်တူဆက်ဆံမှုနဲ့ ထောင်ဒဏ် ၅ နှစ် ကျခံနေရတာဖြစ်ပြီး ဒါဟာ နိုင်ငံရေးအရ လုပ်ကြံမှုလို့ ကျယ်ကျယ်ပြန့်ပြန့် ရှုမြင်နေကြပါတယ်။

လွတ်ငြိမ်းချမ်းသာခွင့်နဲ့ အန်ဝါရ်အီဘရာဟင် လွတ်မြောက်လာရင် အမတ်အဖြစ် ၀င်ရောက်အရွေးခံခိုင်းကာ ၀န်ကြီးချုပ်နေရာ ပေးသွားမယ်လို့ မဟာသီက ထည့်သွင်းပြောဆိုခဲ့ပါတယ်။

အစိုးရအဖွဲ့ကို ကျစ်ကျစ်လစ်လစ် ဖွဲ့စည်းကာ ၀န်ကြီး ၁၀ ဦးသာ ထားရှိသွားမှာဖြစ်ပြီး မနက်ဖြန်မှာ ၀န်ကြီးနာမည်တွေ ထုတ်ပြန်သွားမယ်လို့ မဟာသီက ဆိုပါတယ်။

မဟာသီက အစိုးရသစ်အနေနဲ့ ခြစာမှုတိုက်ဖျက်ရေး၊ နိုင်ငံပိုင် 1MDB လုပ်ငန်းက ပျောက်ဆုံးသွားတဲ့ငွေတွေ ရရှိရေး အဓိကထား လုပ်ဆောင်သွားမှာဖြစ်ကြောင်း၊ မလေးရှားဟာ ကုန်သွယ်ရေးနိုင်ငံတစ်ခုဖြစ်ပြီး ဘယ်လိုအယူအဆရှိတဲ့ နိုင်ငံမျိုးနဲ့မဆို ဆက်ဆံရေးကောင်းကို ဆက်လက်ထိန်းသိမ်းသွားမှာဖြစ်ကြောင်း ဒီကနေ့ သတင်းစာရှင်းလင်းပွဲမှာ ထည့်သွင်းပြောကြားခဲ့ပါတယ်။

Ref: CNA