အာဖရိကရှိ ကွန်ဂိုနိုင်ငံတွင် အီဘိုလာပြန့်နှံ့မှု စိုးရိမ်စရာဖြစ်လာ

မေ ၁၇၊ ၂၀၁၈
M-Media

– အာဖရိကအလယ်ပိုင်းက ကွန်ဂိုနိုင်ငံမှာ အီဘိုလာဗိုင်းရပ်စ်ဟာ မြို့ပေါ်တွေအထိ ရောက်လာတဲ့အတွက် စိုးရိမ်စရာကောင်းတယ်လို့ ကမ္ဘာ့ကျန်းမာရေးအဖွဲ့ WHO က ဒီနေ့မှာ သတိပေးလိုက်ပါတယ်။

အီဘိုလာ ပြန်လည်ဖြစ်ပွားနေကြောင်း ကွန်ဂိုက မေလ ၈ ရက်နေ့မှာ ကြေငြာခဲ့တာဖြစ်ပြီး အခုအချိန်အထိ လူ ၂၃ ဦးလောက် သေဆုံးခဲ့ပြီ ဖြစ်ပါတယ်။

အရင်က နိုင်ငံအနောက်မြောက်ပိုင်း ဝေးလံခေါင်ဖျားတဲ့ဒေသတွေမှာ ဖြစ်တာဖြစ်ပေမယ့် အခုအချိန်မှာတော့ စတင်ဖြစ်ပွားတဲ့ ဘီကိုရိုဒေသနဲ့ ကီလိုမီတာ ၁၅၀ လောက်ဝေးတဲ့ မဘန်ဒါကာမြို့မှာပါ ကူးစက်ဖြစ်ပွားမှု ရှိလာတယ်လို့ WHO က ဒီကနေ့မှာ အတည်ပြုပါတယ်။

WHO ရဲ့ ညွှန်ကြားရေးမှူး တီဒရို့စ် အဒ်ဟာနွန်က ဒါဟာ စိုးရိမ်စရာကိစ္စတစ်ခုဖြစ်တယ်လို့ သတိပေးခဲ့ပါတယ်။

ပြီးခဲ့တဲ့တစ်ပတ်မှာ WHO တာဝန်ရှိသူတစ်ဦးက အီဘိုလာဟာ မဘန်ဒါကာကို ရောက်လာမယ်ဆိုရင် ကွန်ဂိုအနေနဲ့ နောက်ထပ် အီဘိုလာ ပြဿနာကြီးတစ်ခုနဲ့ ရင်ဆိုင်ရနိုင်တယ်လို့ သတိပေးခဲ့ပါတယ်။ အဲဒီမြို့မှာ နေထိုင်သူဟာ ၁ သန်းဝန်းကျင်လောက် ရှိနေပါတယ်။

Ref: Aljazeera