နိုင်ငံခြားချေးငွေကြောင့် သီရိလင်္ကာနိုင်ငံ အကြွေးနွံနစ်မည့် အခြေအနေတွင် ရှိနေ

မေ ၂၀၊ ၂၀၁၈
M-Media

အရှုံးပြနေသည့် သီရိလင်္ကာ လေကြောင်းလိုင်း

– ယခင်အစိုးရလက်ထက်မှာ နိုင်ငံခြားကငွေတွေချေးကာ စီမံကိန်းကြီးတွေ မဆင်မခြင်လုပ်ခဲ့တဲ့ နောက်ဆက်တွဲအဖြစ် နိုင်ငံဟာ အကြွေးနွံနစ်မယ့် အနေအထားကို ဦးတည်နေတယ်လို့ သီရိလင်္ကာ ဘဏ္ဍာရေးဝန်ကြီးက ဒီကနေ့မှာ သတိပေးလိုက်ပါတယ်။

အခုနှစ်အတွင်း နိုင်ငံကပေးရမယ့် အကြွေးနဲ့ အတိုးတွေဟာ ကန်ဒေါ်လာ ၂.၈၄ ဘီလီယံလောက်အထိ ရောက်လာနိုင်တယ်လို့ ၀န်ကြီး မန်ဂါလာ ဆာမာရာဝီရာက ဆိုပါတယ်။ ဒီအကြွေးတွေဟာ သမ္မတ မာဟင်ဒါ ရာဂျာပက်ဆီလက်ထက်မှာ ဆောင်ရွက်ခဲ့တဲ့ စီမံကိန်းတွေကြောင့် ဖြစ်ပါတယ်။

“အကြွေးပြဿနာက နောက်နှစ်စ်မှာ ပိုဆိုးဖို့ရှိပါတယ်။ ရာဂျာပက်ဆီလက်ထက်က သူနဲ့ နောက်လိုက်တစ်စု ဖြုန်းခဲ့တာ၊ ခြစားခဲ့တာ၊ လိမ်လည်ခဲ့တာတွေကို ပြန်ပေးရမယ့် အကြွေးတွေပါ” လို့ ဆာမာရာဝီရာက ပြောကြားခဲ့ပြီး ၂၀၁၉ ခုနှစ်မှာ အကြွေးဟာ ၄.၂၈ ဘီလီယံအထိ ရောက်နိုင်တယ်လို့ ဆိုပါတယ်။

သိရီလင်္ကာရဲ့ နိုင်ငံခြားအရန်ငွေဟာ ဧပြီလအကုန်မှာ ၉.၉ ဘီလီယံရှိတယ်လို့ ဗဟိုဘဏ်က ပြောပါတယ်။

ဆာမာရာဝီရာက ရာဂျာပက်ဆီဟာ ၁၀ နှစ်တာကြာမြင့်ခဲ့တဲ့ သူရဲ့ အုပ်ချုပ်မှုအတွင်း နောက်ဆုံးနှစ်မှာ ကန်ဒေါ်လာ ၁.၅ ဘီလီယံလောက်ကို အတိုးအများအပြားနဲ့ ချေးခဲ့တယ်လို့ ပြောကြားခဲ့ပါတယ်။

ရာဂျာပက်ဆီဟာ သူ့ရဲ့ အခြေခံအဆောက်အဦး မဟာစီမံကိန်းကြီးအတွက် တရုတ်ဆီက အလွန်အမင်း ပိုက်ဆံတွေ ချေးယူတဲ့အတွက် စီးပွားရေးတန်ဖိုး ကန်ဒေါ်လာ ၈၇ ဘီလီယံရှိတဲ့ သီရိလင်္ကာနိုင်ငံအတွက် ၀န်ထုတ်ဝန်ပိုး ဖြစ်ခဲ့ပါတယ်။

နောက်ဆက်တွဲအဖြစ် လက်ရှိအစိုးရဟာ ရေနက်ဆိပ်ကမ်းတစ်ခုကို တရုတ်လက်ထဲ နှစ် ၁၀၀ လောက် ထိုးအပ်ခဲ့ရပါတယ်။

သီရိလင်္ကာဟာ အကြွေးတွေဆပ်ဖို့အတွက် ၂၀၁၆ ခုနှစ် ဇွန်လမှာ နိုင်ငံတကာငွေကြေးရန်ပုံငွေအဖွဲ့က ကန်ဒေါ်လာ ၁.၅ ဘီလီယံလောက် ချေးယူဖို့ မေတ္တာရပ်ခံခဲ့ပြီး လက်ရှိအချိန်အထိ ဆွေးနွေးနေဆဲ ဖြစ်ပါတယ်။

Ref: CNA