လုပ်ငန်းရှင်များနှင့် ကျောင်းသားများကို ယူအေအီးက ဗီဇာ ၁၀ နှစ်ပေးမည်

မေ ၂၁၊ ၂၀၁၈
M-Media

– ရင်းနှီးမြှုပ်နှံသူတွေ၊ ကျွမ်းကျင်သူတွေနဲ့ ကျောင်းသားတွေကို နေထိုင်ခွင့် ၁၀ နှစ်အထိပေးသွားမယ်လို့ အာရပ်စော်ဘွားများပြည်ထောင်စု (ယူအေအီးနိုင်ငံ) က ကြေငြာလိုက်ပါတယ်။

ဒူဘိုင်းအုပ်ချုပ်ရေးမှူး ရှိခ် မိုဟာမက် ဘင် ရာရှစ်ဦးဆောင်တဲ့ ယူအေအီးအစိုးရက နိုင်ငံခြားရင်းနှီးမြှုပ်နှံသူတွေကို စီးပွားရေးလုပ်ငန်းတွေ ၁၀၀ ရာခိုင်နှုန်း ပိုင်ဆိုင်ခွင့်ပြုဖို့လည်း အတည်ပြုခဲ့ပါတယ်။

“ကျွန်တော်တို့ရဲ့ ပွင့်လင်းတဲ့ဝန်းကျင်၊ သည်းခံနိုင်စွမ်းတွေ၊ အခြေခံအဆောက်အဦးနဲ့ ပြောင်းလွယ်ပြင်လွယ်ရှိတဲ့ ဥပဒေတွေက နိုင်ငံတကာ ရင်းနှီးမြှုပ်နှံမှုတွေနဲ့ ပါရမီရှင်တွေကို စွဲဆောင်နိုင်မယ့် အကောင်းဆုံး အစီအမံတွေဖြစ်ပါတယ်” လို့ ရှိခ် မိုဟာမက် ဘင် ရာရှစ်က ပြောကြားခဲ့ပါတယ်။

“ယူအေအီးဟာ အခွင့်အလမ်းတွေရှိရာမြေ၊ လူသားတွေရဲ့ အိပ်မက်တွေ အမှန်တကယ်ဖြစ်လာဖို့ အကောင်းဆုံး ပတ်ဝန်းကျင်၊ သူတို့ရဲ့ တစ်မူထူးခြားတဲ့ အလားအလာတွေကို ဖော်ဆောင်ပေးရာမြေအဖြစ် ဆက်လက်ရှိနေမှာပါ”

စီးပွားရေးလုပ်ငန်းရှင်တွေ၊ ကျွမ်းကျင်သူတွေနဲ့ ကျောင်းသားတွေအပြင် သူတို့ရဲ့ မိသားစုတွေကို နေထိုင်ခွင့်ဗီဇာ ၁၀ နှစ်စီ ထုတ်ပေးဖို့အတွက်လည်း ယူအေအီး ၀န်ကြီးများကောင်စီက အတည်ပြုခဲ့ပါတယ်။

Ref: Alarabiya