ကုရ်အာန်ကိုစော်ကားသည့် ဗိုလ်လောင်း ၃ ဦးကို ကနေဒါစစ်တပ်က ထုတ်ပယ်မည်

မေ ၂၆၊ ၂၀၁၈
M-Media

ကနေဒါစစ်သည်များ

– ကုရ်အာန်ကျမ်းစာကို မလေးမစားလုပ် စော်ကားခဲ့တဲ့ ဗိုလ်လောင်း ၃ ဦးကို စစ်တပ်ကနေ ထုတ်ပယ်သွားမယ်လို့ ကနေဒါစစ်တပ် အာဏာပိုင်တွေက မနေ့မှာ ပြောကြားလိုက်ပါတယ်။

ဒီအဖြစ်အပျက်ဟာ ပြီးခဲ့တဲ့ အီစတာအားလပ်ရက်မှာ ဖြစ်ပွားခဲ့တာပါ။ ဗိုလ်လောင်း ၄ ဦးဟာ ကုရ်အာန်ကျမ်းစာကို ၀က်အူချောင်း၊ ခန္ဓာကိုယ်က မသန့်ရှင်းတဲ့အရည်တွေနဲ့ သုတ်လိမ်းကာ စော်ကားခဲ့တာဖြစ်ပြီး အဲဒါကို ဗီဒီယိုရိုက် မှတ်တမ်းတင်ထားခဲ့တာ ဖြစ်ပါတယ်။

ဗီဒီယိုကို တစ်ခြားဗိုလ်လောင်းတွေကို ပြသရာကနေတစ်ဆင့် အထက်အရာရှိတွေဆီကို တိုင်ကြားခံခဲ့ရတာပါ။

မနေ့ကထုတ်ပြန်တဲ့ စစ်တပ်ရဲ့ကြေငြာချက်မှာ အဖြစ်အပျက်အတွင်း ပါဝင်ခဲ့တဲ့ ဗိုလ်လောင်း ၄ ဦးထဲက ၃ ဦးကို ထုတ်ပယ်သွားမယ်လို့ ဖော်ပြခဲ့ပါတယ်။ စတုတ္ထတစ်ဦးကိုတော့ သတိပေးခဲ့ပြီး၊ ခေါ်ယူဆုံးမမှု ပြုလုပ်သွားမယ်လို့ ဆိုပါတယ်။

“ဒီလို မလျော်ကန်တဲ့လုပ်ရပ်ဟာ ကျွန်တော်တို့ရဲ့ စစ်သည်တော်ကျင့်ဝတ်တွေနဲ့ ဆန့်ကျင်ပြီး ကနေဒါစစ်တပ်ရဲ့ အနာဂတ်ခေါင်းဆောင်တွေကို လေ့ကျင့်သင်ကြားပေးနေတဲ့ RMC (ဗိုလ်သင်တန်းကျောင်း) မှာ ဒါမျိုးကို သည်းခံမှာမဟုတ်ပါဘူး” လို့ ကြေငြာချက်မှာ ထည့်သွင်းဖော်ပြခဲ့ပါတယ်။

စစ်ရေးချုပ် ဒုတိယဗိုလ်ချုပ်ရေး ချားလ်စ် လာမာရီကလည်း နောက်ပိုင်းမှာ ဗိုလ်ချုပ်တွေဖြစ်လာမယ့် ဒီလူငယ်တွေကို စစ်တပ်မှာ ထားမှာမဟုတ်ကြောင်း ပြောကြားခဲ့ပါတယ်။

ဗီဒီယိုဟာ ဆိုရှယ်မီဒီယာကို ရောက်မလာဘဲ စစ်တပ်အရာရှိတွေက ဖျက်ဆီးလိုက်ပါတယ်။

စစ်တပ်ကထုတ်ပယ်မယ့်ကိစ္စကို ဗိုလ်လောင်းတွေက အယူခံဝင်ဖို့ရှိနေပြီး ဇွန်လအလယ်ပိုင်းမှာ ဆုံးဖြတ်ချက်ချမှာ ဖြစ်ပါတယ်။

Ref: Muslim News