၎ နှစ်ကလေးကို သက်စွန့်ဆံဖျားကယ်တင်သည့် ရွှေ့ပြောင်းအခြေချသူကို ပြင်သစ်က နိုင်ငံသားပေးမည်

မေ ၂၈၊ ၂၀၁၈
M-Media

– ပဲရစ်က အထပ်မြင့်တိုက်ခန်းတစ်ခုမှာ တွဲလောင်းဖြစ်နေတဲ့ ကလေးငယ်လေးကို သက်စွန့်ဆံဖျား ကယ်တင်ခဲ့တဲ့ မာလီက ပြောင်းရွှေ့အခြေချသူ အမျိုးသားကို နိုင်ငံသားပေးသွားမယ်လို့ ပြင်သစ်က ကြေငြာလိုက်ပါတယ်။

အသက် ၂၂ နှစ်အရွယ် မာမူဒူ ဂါဆာမာဆိုတဲ့ အဲဒီအမျိုးသားရဲ့ ဗီဒီယိုဟာ အွန်လိုင်းစာမျက်နှာမှာ ပြန့်နှံ့သွားပြီးတဲ့နောက် နိုင်ငံတစ်ဝှမ်းက ချီးကျူးမှုတွေ ရရှိခဲ့ပါတယ်။

ပြင်သစ်သမ္မတ အီမန်နျူယဲလ် မာခရွန်ကလည်း မနေ့က သမ္မတအိမ်တော်မှာ ဂါဆာမာကို ခေါ်ယူတွေ့ဆုံခဲ့ပြီး ရဲရင့်မှုအတွက် ချီးကျူးခဲ့သလို၊ နိုင်ငံသားပေးမယ်လို့လည်း ပြောကြားခဲ့ပါတယ်။ ဂါဆာမာဟာ ပြင်သစ် မီးသပ်တပ်ဖွဲ့မှာလည်း အလုပ်ရဖို့ ရှိနေပါတယ်။

လမ်းသွားနေတဲ့အချိန် အထပ်မြင့်တိုက်တစ်လုံးမှာ အသက် ၄ နှစ်အရွယ် ကလေးတစ်ယောက် တွဲလောင်းဖြစ်နေတာကို မြင်တွေ့ခဲ့ပြီး ချက်ခြင်းဆိုသလိုပဲ ကယ်တင်ဖို့ ဆုံးဖြတ်ခဲ့တယ်လို့ ဂါဆာမာက သမ္မတကို ပြောကြားခဲ့ပါတယ်။

“ကျွန်တော် တွယ်တက်သွားတယ်။ ဘုရားသခင်က ကျွန်တော့်ကို ကူညီခဲ့တဲ့အတွက်လည်း ကျေးဇူးတင်ပါတယ်။ အထပ်မြင့်လေ ထပ်ပြီးတက်ဖို့အတွက် သတ္တိတွေ ပိုရှိလေပါပဲ”

အခင်းဖြစ်ပွားတဲ့အချိန်မှာ ကလေးငယ်ရဲ့ မိဘတွေက အိမ်မှာရှိမနေဘဲ ရဲတပ်ဖွဲ့က ကလေးကို ဂရုမစိုက်မှုအတွက် ဖခင်ကို ခေါ်ယူစစ်ဆေနေပါတယ်။ မိခင်ဖြစ်သူကတော့ ပဲရစ်မှာ မရှိဘူးလို့ ဆိုပါတယ်။

ဂါဆာမာက သူဟာ မြေထဲပင်လယ်ကိုဖြတ်ပြီး အီတလီ၊ အဲဒီကနေမှတစ်ဆင့် ပြင်သစ်ကို အန္တရာယ်အဆင့်ဆင်ဖြတ်ကျော်ကာ ပြီးခဲ့တဲ့နှစ်မှာ ရောက်ရှိခဲ့တယ်လို့ ပြောကြားခဲ့ပါတယ်။

ပဲရစ်မြို့တော်ဝန် အန်နီ ဟီဒါလ်ဂိုကလည်း ဂါဆာမာကို ချီးကျူးခဲ့ပြီး ဖုန်းဆက်ကာ ကျေးဇူးတင်ကြောင်း ပြောကြားခဲ့တယ်လို့ ဆိုပါတယ်။ အခင်းဖြစ်ပွားတဲ့ ၁၈ ရပ်ကွက်ကို ရည်ညွှန်းကာ ‘၁၈ ရပ်ကွက်က စပိုက်ဒါမန်း’ လို့ မြို့တော်ဝန်က တင်စားခဲ့သလို ‘နိုင်ငံသားတွေအတွက် နမူနာကောင်းဖြစ်တယ်’ လို့လည်း ထည့်သွင်းပြောဆိုခဲ့ပါတယ်။

Ref: BBC