မြောက်ကိုရီးယားခေါင်းဆောင် ကင်ဂျုံအွန်၏ ထိပ်တန်းအကြံပေး စင်ကာပူရောက်လာ

မေ ၂၉၊ ၂၀၁၈
M-Media

– မြောက်ကိုရီးယားခေါင်းဆောင် ကင်ဂျုံအွန်ရဲ့ ထိပ်တန်းအကြံပေး ကင်ချန်ဆွန်ဟာ မနေ့က စင်ကာပူကို ရောက်လာခဲ့ပြီး ဇွန်လ ၁၂ ရက်နေ့ အမေရိကန်-မြောက်ကိုရီးယား ထိပ်သီးအစည်းအဝေး ဖြစ်လာရေး ဆွေးနွေးမှု တစ်စိတ်တစ်ပိုင်းလည်း ဖြစ်ပါတယ်။

ကင်ချန်ဆွန်ဟာ တရုတ်ကနေတစ်ဆင့် လေယာဉ်နဲ့ စင်ကာပူကို ရောက်ရှိလာတာပါ။ စင်ကာပူသွားရောက်တဲ့ကိစ္စဟာ အမေရိကန်နဲ့ ဆွေးနွေးမှုလုပ်ဖို့လားလို့ ဘေဂျင်းလေဆိပ်မှာ သတင်းထောက်တစ်ယောက်က မေးတဲ့အခါ သူက ‘သွားကစားမှာ’ လို့ ဖြေခဲ့ကြောင်း Nippon Television Network က ထုတ်ပြန်တဲ့ ဗီဒီယိုမှာ တွေ့ရပါတယ်။

အိမ်ဖြူတော်က ထိပ်တန်းတာဝန်ရှိသူ ဂျိုး ဟာဂင်ဦးဆောင်တဲ့ အမေရိကန်အစိုးရ ကိုယ်စားလှယ်အဖွဲ့ဟာလည်း ဂျပန်က US Yokota လေတပ်စခန်းကနေ မနေ့က စင်ကာပူကို ထွက်ခွာခဲ့တယ်လို့ NHK သတင်းဌာနက ဖော်ပြပါတယ်။

အိမ်ဖြူတော်ကတော့ အဲဒီရှေ့ပြေးအဖွဲ့ဟာ မြောက်ကိုရီးယားအဖွဲ့နဲ့ တွေ့ဆုံဖို့ သွားရောက်တာဖြစ်တယ်လို့ ထုတ်ပြန်ပါတယ်။

မြောက်ကိုရီးယား အာဏာရ အလုပ်သမားပါတီ ဗဟိုကော်မတီရဲ့ ဒုတိယဥက္ကဌ ကင်ယွန် ချိုလ်ကလည်း တရုတ်အာဏာပိုင်တွေနဲ့ ဘေဂျင်းမှာတွေ့ဆုံပြီးနောက် ဗုဒ္ဓဟူးနေ့မှာ အမေရိကန်သွားဖို့ ရှိနေတယ်လို့ တောင်ကိုရီးယား Yonhap သတင်းဌာနက အမည်မဖော်လိုတဲ့ သတင်းရင်းမြစ်ကို ကိုးကားပြီး ဖော်ပြခဲ့ပါတယ်။

မြောက်အမေရိကဆိုင်ရာ ကိစ္စတွေမှာ ပါဝင်နေတဲ့ မြောက်ကိုရီးယား နိုင်ငံခြားရေးဝန်ကြီးဌာန တာဝန်ရှိသူ ချိုကန်အီလ်ကိုလည်း ဘေဂျင်းနိုင်ငံတကာလေဆိပ်မှာ တွေ့ခဲ့ရတယ်လို့ Yonhap က ဆိုပြီး ကင်ယွန်ချိုလ်နဲ့ အမေရိကန်လိုက်သွားမလားဆိုတာ တိတိကျကျ မသိရသေးပါဘူး။

ပြီးခဲ့တဲ့တစ်ပတ် ကြာသာပတေးနေ့မှာ သမ္မတထရမ့်က ကင်ဂျုံအွန်နဲ့ တွေ့ဆုံမယ့်ကိစ္စကို ဖျက်သိမ်းတယ်လို့ ပြောကြားခဲ့ပေမယ့် မြောက်ကိုရီးယားဖက်က အပြုသဘောဆောင်တဲ့ တုန့်ပြန်မှုတွေကြောင့် ဇွန်လ ၁၂ ရက်နေ့ ထိပ်သီးအစည်းအဝေး ဖြစ်မြောက်ရေး ဆွေးနွေးမှုတွေ ဆက်လုပ်နေပါတယ်။

အဲဒီထိပ်သီးအစည်းအဝေးကို တောင်ကိုရီးယားသမ္မတ မွန်ဂျယ်အင်လည်း တက်ရောက်မယ်လုိ့ သတင်းတွေ ထွက်နေပါတယ်။

Ref: CNA