ကမန် (သို့မဟုတ်) ခွဲခြားမှု၊ အကြမ်းဖက်မှုခံနေရတဲ့ ရခိုင်က လူမျိုးစုတစ်ခု

မေ ၂၉၊ ၂၀၁၈
M-Media

– ကမန်လူမျိုးတွေဟာ မြန်မာနိုင်ငံက တရားဝင်သတ်မှတ်ထားတဲ့ တိုင်းရင်းသားလူမျိုး ၁၃၅ မျိုးစာရင်းမှာ ပါဝင်ပေမယ့် ဗုဒ္ဓဘာသာဝင် မဟုတ်တဲ့အတွက် လူ့အဖွဲ့အစည်းရဲ့ခွဲခြားမှု၊ အစိုးရရဲ့ ခွဲခြားဆက်ဆံမှုတွေကို ခံနေရပါတယ်။

ရခိုင်မျိုးနွယ်စုတွေထဲမှာ ပါဝင်ပြီး တိုင်းရင်းသား ၁၃၅ မျိုးမှာ တစ်ခုတည်းသော အစ္စလာမ်ဘာသာဝင်အုပ်စုဖြစ်တဲ့ ကမန်တွေဟာ လူဦးရေးအနည်းဆုံး တိုင်းရင်းသားလူမျိုးစုတွေထဲက တစ်ခုဖြစ်ကာ ၂၀၁၄ ခုနှစ် သန်းခေါင်စာရင်း ကောက်ယူမှုအရ ရခိုင်ပြည်နယ်မှာ ၂၈၀၀၀ လောက်ရှိပါတယ်။ ကမန်ခေါင်းဆောင်တွေကတော့ တစ်နိုင်ငံလုံးအတိုင်းအတာနဲ့ဆိုရင် ၄၅၀၀၀ လောက်ရှိမယ်လို့ ဆိုပါတယ်။

တိုင်းပြည်က လူများစု ဗုဒ္ဓဘာသာဝင်တွေနဲ့ မွတ်စလင်တွေအကြား တင်းမာမှုတွေ မြင့်တက်လာတာတဲ့အချိန် ရခိုင်ပြည်နယ်က ပဋိပက္ခကို တုန့်ပြန်တဲ့ အစိုးရနဲ့ သဘောထားတင်းမာသူ အမျိုးသားရေးဝါဒီတွေရဲ့ နိုင်ငံရေးလွန်ဆွဲပွဲအကြားမှာ ကမန်တွေဟာ မကြာခဏဆိုသလို မြေဇာပင်ဖြစ်ရပါတယ်။

မကြာသေးခင်က ပြည်သူ့လွှတ်တော် ဆွေးနွေးငြင်းခုံမှုတစ်ခုဟာ ကမန်လူမျိုးတွေ ပုံမှန်လိုလို ရင်ဆိုင်နေရတဲ့ ရန်လိုမုန်းထားမှုတွေကို မီးမောင်းထိုးပြနေပါတယ်။

မတ်လ ၅ ရက်နေ့မှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအမတ် ဦမောင်မြင့် (စစ်ကိုင်း၊ မင်းကင်း မဲဆန္ဒနယ်) က လူ ၁၅၇ ဦးပါဝင်တဲ့ ကမန်မိသားစု ၅၅ စုကို ရန်ကုန်မှာ နေရာချထားပေးတဲ့ အစိုးရရဲ့ဆုံးဖြတ်ချက်ကို ပြန်လည်သုံးသပ်ဖို့ တိုက်တွန်းတဲ့ အဆိုတစ်ခု လွှတ်တော်မှာ တင်သွင်းခဲ့ပါတယ်။ အဲဒီမိသားစုတွေဟာ ၂၀၁၂ ခုနှစ် ရခိုင်ပြည်နယ်မှာဖြစ်ပွားတဲ့ လူမျိုးရေးအကြမ်းဖက်မှုတွေကြောင့် ရမ်းဗြဲမြို့က ဒုက္ခသည်စခန်းမှာ နေခဲ့ရသူတွေ ဖြစ်ပါတယ်။

“ရခိုင်မှာဖြစ်ပွားနေတဲ့ ကင်ဆာကို ရခိုင်မှာပဲဖြေရှင်းတာက ပိုပြီးသင့်လျော်မယ်လို့ ကျွန်တော် ထင်ပါတယ်” လို့ အရင် ကြံ့ဖွံ့အစိုးရလက်ထက်က ၀န်ကြီးဖြစ်ခဲ့ဖူးတဲ့ ဦးမောင်မြင့်က ပြောပါတယ်။ ကမန်မိသားစုတွေကို ရန်ကုန်မှာ အခြေချခွင့်ပြုလိုက်တာဟာ ‘နိုင်ငံတစ်ဝှမ်း ကင်ဆာဆဲလ်တွေ ပြန့်နှံ့ခွင့်ပြုလိုက်တာဖြစ်တယ်’ လို့လည်း သူက ဆိုပါတယ်။

မတ်လ ၁၅ ရက်နေ့ ဒီကိစ္စကို ပြန်လည်ဆွေးနွေးခဲ့တဲ့ အမတ် ၁၉ ဦးမှာ ပါဝင်သူ ဦးဖေသန်း (ရခိုင်အမျိုးသားပါတီ၊ မြေပုံ) က ဦးမောင်မြင့်ရဲ့ ကင်ဆာမှတ်ချက်အတွက် စိတ်ပျက်ရတယ်လို့ ပြောကြားခဲ့ပါတယ်။

“ဒီဟာကို ရခိုင်ပြည်နယ်မှာပဲ ကုသရမယ်လို့ ဦးမောင်မြင့်ရဲ့ ပြောကြားမှုအတွက် ကျွန်တော် စိတ်မကောင်းဖြစ်မိပါတယ်။ ခန္ဓာကိုယ်မှာ ကင်ဆာဖြစ်ပြီဆိုရင် ဘယ်နေရာမှာပဲဖြစ်ဖြစ် သေနိုင်ပါတယ်” လို့ ဦးဖေသန်းကဆိုပြီး ကိုဖီအန်နန်ကော်မရှင်ရဲ့ နောက်ဆုံးအစီရင်ခံစာက အစိုးရအတွက် အကြံပြုချက်တစ်ခုဟာ ဒုက္ခသည်စခန်းတွေကို ပိတ်ပစ်ဖို့ဖြစ်တယ်လို့လည်း ထောက်ပြခဲ့ပါတယ်။

ဦးဘရှင် (ရခိုင်အမျိုးသားပါတီ၊ ကျောက်ဖြူ) ကလည်း တိုင်းရင်းသား ၁၃၅ မျိုးထဲမှာ ပါဝင်တဲ့ ကမန်တွေဟာ လွတ်လပ်စွာသွားလာခွင့်ရှိပြီး ရန်ကုန်မှာ သူတို့ကို အခြေချစေတာဟာ ဥပဒေနဲ့ညီတယ်လို့ ပြောကြားခဲ့ပါတယ်။

“နောက်ထပ်အရေးကြီးတာက ဘင်္ဂလားဒေ့ရ်ှက ပြန်လာတဲ့သူတွေ နိုင်ငံသားဖြစ်ပြီဆိုရင် သူတို့ကိုလည်း ဒီလို သွားလာခွင့် ပေးရပါမယ်”

ဦးမောင်မြင့်ရဲ့အဆိုကို ထောက်ခံမဲ ၁၃၆ မဲ၊ ကန့်ကွက်မဲ ၂၃၆ မဲနဲ့ ပယ်ချခဲ့ပါတယ်။ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရချထားရေးဝန်ကြီး ဒေါက်တာဝင်းမြတ်အေးက ဒုက္ခသည်စခန်းတွေမှာ နေထိုင်နေရတဲ့ ကမန်တွေဟာ အစိုးရ၀န်ထမ်းတွေနဲ့ သူတို့ရဲ့ မိသားစုတွေဖြစ်တယ်လို့ ပြောကြားခဲ့ပါတယ်။

“ပြဿနာတွေ ရုတ်တရက်ဖြစ်လာတဲ့အခါမှာ သူတို့ဟာ စခန်းတွေထဲကို အဓမ္မပို့ဆောင်ခံရပြီး အပြင်ထွက်ခွင့် မရတော့ပါဘူး။ ဒါဟာ ချုပ်နှောင်ထားမှုတစ်မျိုးပါ။ သူတို့ဟာ နိုင်ငံသားတွေဖြစ်ပြီး စခန်းတွေမှာ အချိန်တော် တော်ကြာကြာ ပိတ်လှောင်ခံထားရမယ်ဆိုရင် လူမှုရေး၊ စီးပွားရေး၊ ပညာရေးတွေ ထိခိုက်မှာဖြစ်တာကြောင့် ကျွန်တော်တို့အစိုးရ တက်လာတဲ့အခါ ဒီစခန်းတွေကို ပိတ်ပစ်ဖို့ စီစဉ်တာ ဖြစ်ပါတယ်”

ပိုင်ဆိုင်မှုတွေအတွက် လျော်ကြေးယူပြီး ရန်ကုန်ပြောင်းဖို့၊ ဒါမှမဟုတ် ရမ်းဗြဲက နဂိုမူလနေရာတွေကို ပြန်သွားဖို့ ကမန်တွေကို ရွေးချယ်ခွင့်ပေးခဲ့တယ်လို့လည်း ၀န်ကြီးက ပြောပါတယ်။

“သူတို့ပိုင်ဆိုင်မှုတွေအတွက် နစ်နာကြေးကို လက်ရှိပေါက်ဈေးနဲ့ တွက်ပေးတာဖြစ်ပါတယ်။ လူနည်းစုက ရမ်းဗြဲမှာပဲဆက်နေဖို့ ရွေးခဲ့ပြီး သူတို့အတွက် နယ်စပ်ဒေသ၀န်ကြီးဌာနက အိမ်သစ်တွေ ဆောက်လုပ်ပေးခဲ့ပါတယ်။ အားလုံး အေးဆေးပါပဲ”

ဒါပေမယ့် ၀န်ကြီးရဲ့ ဒီပြောကြားချက်တွေဟာ ရန်ကုန်ကိုပြောင်းလာတဲ့ ကမန်တွေရဲ့ လက်တွေ့အခြေအနေတွေနဲ့ ကိုက်ညီမှု မရှိပါဘူး။ ဒုက္ခသည်စခန်းတွေကနေ ထွက်ခွင့်ရလို့ သူတို့ ကျေနပ်ကြပေမယ့်လည်း စီးပွားရေးမြို့တော်မှာ ဘ၀သစ်စတင်ရတာ သူတို့အတွက် မလွယ်ကူပါဘူး။ အထူးသဖြင့် အစိုးရ၀န်ထမ်းမရှိတဲ့ မိသားစုတစ်ချို့အတွက် ဖြစ်ပါတယ်။

ဘ၀တွေ ပြန်တည်ဆောက်နေရ

ကမန်မိသားစုတွေဟာ ၂၀၁၂ ခုနှစ်ကတည်းက ရန်ကုန်ကို တစ်ဖြည်းဖြည်း ပြောင်းရွှေ့အချေခြလာကြပြီး လူမျိုးရေး အကြမ်းဖက်မှုတွေကနေ လွတ်မြောက်ဖို့ ဖြစ်ပါတယ်။

ကမန်လူမှုကွန်ယက်ကို ဦးဆောင်နေတဲ့ ကမန်လူမျိုးစုခေါင်းဆောင် ဦးထွန်းငွေက အဲဒီမိသားစုတွေထဲက တစ်ချို့ကို ကူညီနေပါတယ်။

ဦးထွန်းငွေဟာ ရန်ကုန်မြောက်ပိုင်းမှာ တပ်မတော်ဆီက မြေငှားပြီး မွေးမြူခြံလုပ်ကိုင်လာတာ ၁၅ နှစ်နီးပါးလောက် ရှိနေပါပြီ။ ၂၀၁၄ ခုနှစ် တပ်မတော်က အဲဒီမြေကို လက်လွှတ်ခဲ့ပြီးတဲ့နောက် ဦးထွန်းငွေနဲ့ အခြား ကမန်တစ်ချို့ဟာ ငွေစုပြီး ထောက်ကြံ့မှာ မြေ၀ယ်ကာ မွေးမြူရေးလုပ်ငန်းကို လုပ်ကိုင်ခဲ့ပါတယ်။ သူတို့လုပ်ငန်းက အလုပ်သမားအများစုဟာ ရမ်းဗြဲက ကမန်တွေဖြစ်ပြီး ရမ်းဗြဲ ဒုက္ခသည်စခန်းကနေ မကြာသေးခင်က ထွက်လာတဲ့ မိသားစု ၅ စုအပါအ၀င် ကမန် မိသားစု ၃၂ စုက လူ ၁၀၀ ကျော်လောက် သူတို့ခြံထဲမှာ နေထိုင်နေကြပါတယ်။

လူမျိုးရေးအကြမ်းဖက်မှု ထပ်ဖြစ်လာမှာကို စိုးရိမ်တာနဲ့ ရန်ကုန်မှာ လွတ်လပ်စွာသွားလာလို့ရမယ်ဆိုတဲ့ မျှော်လင့်ချက်ကြောင့် ကမန်တွေဟာ ရန်ကုန်မှာ အခြေချချင်တာဖြစ်တယ်လို့ ဦးထွန်းငွေက ပြောကြားခဲ့ပါတယ်။

မိသားစုတစ်စုကို လေယာဉ်လက်မှတ် တစ်စောင်နဲ့ ငွေငါးသိန်း၊ တစ်ဦးချင်းစီကို ငွေတစ်သိန်း ရခဲ့တယ်လို့ သူက ပြောပါတယ်။ ရန်ကုန်ကို ရောက်လာတဲ့အချိန်မှာ ရန်ကုန်တိုင်းဒေသကြီး ရခိုင်တိုင်းရင်းသားရေးရာဝန်ကြီးက ပြီးခဲ့တဲ့နှစ်မှာ ထောက်ကြံ့ကို လာရောက်ကြည့်ရှုပြီးတဲ့နောက် အစိုးရထံကနေ အကူအညီတောင်းဖို့ တိုက်တွန်းခဲ့ပေမယ့် သူတို့တွေဟာ အစိုးရရဲ့ကူညီမှု ဘာမှ မရတော့ပါဘူး။

“ရန်ကုန်မှာရှိနေသူတွေကို အကူအညီပေးဖို့ အစိုးရအာဏာပိုင်တွေထံ အကြိမ်ကြိမ်တောင်းဆိုခဲ့ပေမယ့် ဘာအဖြေမှ မရပါဘူး” လို့ ဦးထွန်းငွေက ပြောပါတယ်။

ရလဒ်အနေနဲ့ ကမန်မိသားစုတွေဟာ ဆွေမျိုးတွေ၊ ရန်ကုန်မှာနေထိုင်တဲ့ ကမန်လူမျိုးတွေအပေါ်မှာပဲ အလွန်အမင်း မှီခိုနေရပါတယ်။

“သူတို့ရဲ့အခြေအနေက ပင်လယ်ထဲမှာ ကမ်းမမြင်လမ်းမြင် မျောနေတဲ့သူတွေနဲ့ တူပါတယ်။ သူတို့မှာ ဘာမှမရှိဘူး၊ အလုပ်လည်းမရှိဘူး။ ရရစာစားအခြေအနေမျိုးပါ” လို့ ဦးထွန်းငွေက ထည့်သွင်းပြောကြားခဲ့ပါတယ်။

ကမန်တွေဟာ နစ်နာကြေး လုံလုံလောက်လောက်ရခဲ့တယ်ဆိုတဲ့ လူကယ်ပြန်ဝန်ကြီးရဲ့ စကားကို ဦးထွန်းငွေက ငြင်းဆိုခဲ့ပြီး ရမ်းဗြဲက သူတို့မြေတွေ မလိမ့်တစ်ပတ်နဲ့ စွန့်လွှတ်ခဲ့ရတာ ဖြစ်နိုင်တယ်လို့လည်း ပြောကြားခဲ့ပါတယ်။

အစိုးရကပေးတဲ့ ငွေသားဟာ ကမန်တွေ ရန်ကုန်မှာ အခြေချရေးအတွက်သာ ဖြစ်ပေမယ့် နောက်ပိုင်း နိုင်ငံပိုင်မီဒီယာက ဒီငွေဟာ သူတို့ပိုင်တဲ့မြေတွေအတွက် လျော်ကြေးပေးတာဖြစ်တယ်လို့ ဖော်ပြခဲ့ပါတယ်။

“သူတို့ရတဲ့ငွေဟာ သူတို့ဆုံးရှုံးတာနဲ့ မကာမိဘူးလို့ အစိုးရကို ကျွန်တော်တို့ ပြောထားပါတယ်။ သူတို့ပိုင်ဆိုင်ခဲ့တဲ့ မြေတွေ၊ အိမ်တွေဟာ သူတို့ရတဲ့ငွေထက် အများကြီး ပိုတန်ပါတယ်။ နောက်တစ်ခုက ရမ်းဗြဲက ကျွန်တော်တို့မြေတွေဟာ ကျွန်တော်တို့ရဲ့ သစ္စာစောင့်သိမှုကြောင့် ရခိုင်ဘုရင်တွေက ချီးမြှင့်ထားတာ ဖြစ်ပါတယ်။ ဒီမြေတွေကို ဘယ်သူ့ကိုမှ လွှဲပြောင်းပေးလို့မရဘူး။ ကျွန်တော်တို့သာ ထာဝရပိုင်ဆိုင်တာပါ။ ဘယ်တော့မှ မစွန့်လွှတ်ပါဘူး” လို့ ဦးထွန်းငွေက ပြောကြားခဲ့ပါတယ်။

ကမန်လူ့အဖွဲ့အစည်းကို အရပ်ဝတ်ရဲတွေက အနီးကပ်စောင့်ကြည့်နေပြီး၊ ဂျာနယ်လစ်တွေနဲ့ စကားမပြောခင် စစ်တပ်ကထိန်းချုပ်ထားတဲ့ အထွေထွေအုပ်ချုပ်ရေးဦးစီးဌာနကို အကြောင်းကြားဖို့လည်း ညွှန်ကြားထားပါတယ်။

ဦးထွန်းငွေနဲ့ အခြားကမန်တိုင်းရင်းသားတွေကို Frontier က အင်တာဗျူးတဲ့အခါ ဒေသခံအာဏာပိုင်တွေရဲ့ ဖိအားပေးမှုကြောင့် သူတို့အိမ်မှာ မေးလို့မရဘဲ မင်္ဂလာဒုံက လက်ဖက်ရည်ဆိုင်တစ်ခုမှာ မေးခဲ့ရပါတယ်။

အာဏာပိုင်တွေဟာ ပြောဆိုမှုတွေကို အနီးကပ် စောင့်ကြည့်ခဲ့ပြီး Frontier က အင်တာဗျူးနေတဲ့အချိန် ဦးထွန်းငွေကို ဖုန်းလှမ်းခေါ်ကာ ဘယ်မှာရှိနေလဲလို့ မေးမြန်းခဲ့ပါတယ်။ ဂျာနယ်လစ်တွေနဲ့ စကားပြောတာကို အထွေထွေအုပ်ချုပ်ရေးဦးစီးဌာနက တားဆီးဖို့ ကြိုးစားတာဟာ မမျှတဘူးလို့ ဦးထွန်းငွေက ပြောပါတယ်။

“ကျွန်တော်တို့မှာ မီဒီယာကို ပြောပိုင်ခွင့် ရှိသင့်ပါတယ်”

ရခိုင်ကိုပြန်ချင်တယ်

အသက် ၅၁ နှစ်အရွယ်ရှိပြီး သမီးနှစ်ယောက် သားနှစ်ယောက် မိခင်ဖြစ်သူ မုဆိုးမ ဒေါ်နွယ်နွယ်ဝင်းက ရမ်းဗြဲဒုက္ခသည်စခန်းမှာ ဘယ်လိုမှ နေလို့အဆင်မပြေတော့တဲ့အတွက် ရန်ကုန်မှာ အခြေချဖို့ ဆုံးဖြတ်ခဲ့တာဖြစ်တယ်လို့ Frontier ကို ပြောကြားခဲ့ပါတယ်။

“ရန်ကုန်ကိုပြောင်းလာတဲ့ ကျွန်မရဲ့ တစ်ခုတည်းသော မျှော်လင့်ချက်က စခန်းက ဒုက္ခတွေကနေ လွတ်မြောက်ဖို့ပါ”

ရန်ကုန်ကိုပြောင်းလာတဲ့ ကမန်တွေကို အစိုးရက နေစရာမပေးဘူးဆိုရင် ရန်ကုန်ဟာလည်း သူတို့ဘ၀ရှင်သန်မှုအတွက် ဘာမှ ထူးခြားမှာမဟုတ်ဘူးလို့ ဒေါ်နွယ်နွယ်ဝင်းက ပြောကြားခဲ့ပါတယ်။

“ကျွန်မတို့မှာ အိမ်မရှိတဲ့အတွက် ဒုက္ခရောက်နေဆဲပါ။ အိမ်လေးတစ်လုံး ဒါမှမဟုတ် စီးပွားရေးတစ်ခုမရှိဘူးဆိုရင် ကျွန်မတို့ ဘယ်လိုလုပ် အဆင်ပြေနိုင်ပါ့မလဲ။ ဘာမှမရှိဘဲ ဒီမှာနေရမယ့်အတူတူ အစိုးရက တရားဥပဒေစိုးမိုအောင်လုပ်ပေးရင် ရခိုင်ပြန်ချင်ပါတယ်” လို့ ဒေါ်နွယ်နွယ်ဝင်းက ပြောပါတယ်။

၂၀၁၂ ခုနှစ် ဇွန်လမှာ ဖြစ်ပွားခဲ့တဲ့ ပထမအကျော့ လူမျိုးရေး အကြမ်းဖက်မှုအတွင်း ရမ်းဗြဲမှာ မီးရှို့ဖျက်ဆီးခံရတဲ့ အိမ် ၂၁ အိမ်ထဲမှာ သူမရဲ့ အိမ်လည်း ပါသွားပါတယ်။ ဒါပေမယ့် အစိုးရကတော့ ဘာမှ မလုပ်ပေးပါဘူး။ အဲဒီနှစ်အောက်တိုဘာလက ဒုတိယအကျော့ ရမ်းဗြဲအကြမ်းဖက်မှုမှာ အိမ်တွေမီးရှို့ခံလိုက်ရတဲ့ အိမ်ထောင်စု ၄၅ စုဟာ အစိုးရထံကနေ လျော်ကြေးရတယ်လို့ သူမက ပြောကြားခဲ့ပါတယ်။

အိမ်ထောင်စု ၅၅ ခုကို အစိုးရက ရန်ကုန်မပို့ခင်မှာ လူပေါင်း ၆၀ လောက်ရှိတဲ့ ကမန်မိသားစုအချို့ဟာ ရန်ကုန်ကို သူ့တို့နည်းသူတို့ဟန်နဲ့ ပြောင်းလာကြပါတယ်။

အဲဒီအထဲက အသက် ၄၂ နှစ်အရွယ် ဒေါ်မဆိုင်းကေဟာ ကမန်တစ်ယောက်နဲ့ အိမ်ထောင်ပြုထားသူဖြစ်ပြီး ၂၀၁၂ ခုနှစ် အကြမ်းဖက်မှုနောက်ပိုင်းမှာ သား ၃ ဦးနဲ့အတူ ဒုက္ခသည်စခန်းကို ပြောင်းရွှေ့နေထိုင်ခဲ့ရပါတယ်။

စခန်းမှာ အစာရေစာပြတ်လတ်တဲ့အခါ သူမရဲ့ ဗုဒ္ဓဘာသာ ဆွေမျိုးတွေက သူတို့မိသားစုကို ကူညီခဲ့ကြတယ်လို့ Frontier ကို မဆိုင်းကေက ပြောပါတယ်။

“ပေးတာတွေ မလောက်တော့ ကျွန်မမိသားစုဆီ ဖုန်းခေါ်ပြီး ဆန်နည်းနည်းထပ်ပေးဖို့ တောင်းခဲ့ရပါတယ်။ ဒီလိုမျိုး ကျွန်မတို့ နေခဲ့ရတာပါ”

ပြီးခဲ့တဲ့နှစ်တွေအတွင်း မဆိုင်းကေဟာ ရန်ကုန်ကို ဖြည်းဖြည်းချင်း ပြောင်းရွှေ့လာခဲ့ပါတယ်။ ခင်ပွန်းဖြစ်သူ သွားရောက်ပြီး ၂ နှစ်ကြာတဲ့နောက် ၂၀၁၆ ခုနှစ်မှာ သူမဟာ တစ်ယောက်တည်း ရန်ကုန်ကို တက်လာခဲ့ပါတယ်။ မွတ်စလင်တွေဟာ ရမ်းဗြဲကနေ ရန်ကုန်ကို တိုက်ရိုက်ကားစီးလို့ မရတဲ့အတွက်ကြောင့် သူမရဲ့ သား ၃ ဦးဟာ သံတွဲကနေတစ်ဆင့် ကားနဲ့ ခွဲခွဲပြီး ရန်ကုန်ကို လာရောက်ခဲ့ရပါတယ်။ ပိုက်ဆံမရှိတာနဲ့ ကိုးကွယ်တဲ့ဘာသာတွေကြောင့် သူတို့မိသားစုဟာ အတူတကွ ခရီးသွားလို့မရဘူးလို့ မဆိုင်းကေက ပြောကြားခဲ့ပါတယ်။

ရမ်းဗြဲထက်စာရင် ရန်ကုန်မှာနေရတာ ပိုပြီးလွတ်လပ်တယ်လို့သူမက ခံစားနေရပါတယ်။

“ဒီမှာ အန္တရာယ်ရှိတော့ ကျွန်မလည်း သောကရောက်စရာ မလိုတော့ဘူးပေါ့” လို့ သူမက ပြောကြားခဲ့ပြီး မိသားစုကို လွမ်းတာကြောင့် ရခိုင်မှာ အေးချမ်းသွားတဲ့အချိန်ကျရင် ပြန်သွားဖို့ သူမမှာ ယုံကြည်ချက် ရှိနေပါတယ်။

“ကျွန်မရဲ့ ညီအစ်ကိုမောင်နှစ်မ ၇ ဦးစလုံးက အဲဒီမှာ ရှိနေတယ်လေ။ ဒီမှာက ကျွန်မတို့အိမ်မရှိဘူး။ ကြက်ခြံဘေးက ကျောတစ်ခင်းစာ အဖီလေးမှာ ကျွန်မတို့ နေရတာ”

ယုံကြည်မှုပျက်သုဉ်း

ကမန်လူမှုကွန်ယက်ရဲ့ ဒုတိယဥက္ကဌဖြစ်တဲ့ ဦးမင်းနိုင်က အရင်တုန်းက သဟဇာတဖြစ်ခဲ့တဲ့ ရမ်းဗြဲမှာ ၂၀၁၂ ခုနှစ်မှာ အကြမ်းဖက်မှု၊ မီးရှို့မှုတွေ ဖြစ်ခဲ့တဲ့အတွက် အံ့အားသင့်ရတယ်လို့ ပြောကြားခဲ့ပါတယ်။

ရမ်းဗြဲက ကမန်အများစုမှာ ဗုဒ္ဓဘာသာဝင်ဆွေမျိုးတွေရှိတယ်လို့ ဦးမင်းနိုင်ကပြောပြီး သူ့ရဲ့ အဘိုးအဘွားတွေတောင် ဗုဒ္ဓဘာသာတွေလို့ ဆိုပါတယ်။

သူ့ရဲ့ တစ်ချို့ဗုဒ္ဓဘာသာဝင်အမျိုးတွေဟာ ကမန်အများစုနေထိုင်တဲ့ ရမ်းဗြဲ ၆ ရပ်ကွက်ကို မီးတိုက်ခဲ့တဲ့အထဲမှာ ပါဝင်ခဲ့တယ်လို့ သူက ပြောပါတယ်။

မေတ္တာတရားကို တန်ဖိုးထားတဲ့ ဗုဒ္ဓဘာသာဝင်အများစုရှိတဲ့ တိုင်းပြည်မှာ ဒီလိုတွေ ဘာ့ကြောင့်ဖြစ်လဲဆိုတာ နားမလည်ဘူးလို့လည်း သူက ဖွင့်ဟခဲ့ပါတယ်။

ဘာသာမတူသူတွေကြားထဲက ယုံကြည်မှုဟာ ပျက်သုဉ်းသွားနိုင်ပြီး အထူးသဖြင့် နိုင်ငံရေးရည်ရွယ်ချက်တွေက တင်းမာမှုတွေကို မီးထိုးပေးနေတယ်လို့လည်း ဦးမင်းနိုင်က ထည့်သွင်းပြောဆိုပါတယ်။

“ရခိုင်ပြည်နယ်က အခြေအနေဟာ နိုင်ငံရေးကစားပွဲတစ်ခုပါ”

မွတ်စလင်တွေအပေါ် ခွဲခြားဆက်ဆံမှုတွေရှိတယ်လို့ နိုင်ငံတကာရဲ့ ဝေဖန်မှုတွေ ခံနေရတဲ့အစိုးရဟာ နိုင်ငံသားတွေဖြစ်တဲ့ ကမန်တွေကို တန်းတူအခွင့်အရေးပေးခြင်းအားဖြင့် သူတို့ရဲ့ ပုံရိပ်ကို ကာကွယ်နိုင်လိမ့်မယ်လို့ သူက ပြောပါတယ်။

“ဒီလိုဆောင်ရွက်ဖို့၊ ပုံရိပ်ဆိုးကို ဖယ်ရှားဖို့အတွက် အခုအချိန်ဟာ အချိန်ကောင်းပါပဲ”

ဦးထွန်းငွေက ကမန်တွေကို ပြန်လည်နေရာချထားပေးတဲ့ ဆုံးဖြတ်ချက်ကို ကြံ့ဖွံ့လွှတ်တော်အမတ် ဦးမောင်မြင့်က ကန့်ကွက်တာဟာ နိုင်ငံသားတိုင်း လွတ်လပ်စွာ သွားလာခွင့် ရှိရမယ်ဆိုတဲ့ အခြေခံဥပဒေပါ ပြဌာန်းချက်နဲ့ ဆန့်ကျင်နေတယ်လို့ ပြောကြားခဲ့ပါတယ်။

“သူတို့ (လွှတ်တော်အမတ်တွေ) ဟာ အခြေခံဥပဒေကို လေ့လာသင့်ပါတယ်”

Ref : Frontier

(Frontier တွင် ဖော်ပြထားသည့် The Kaman: Citizens who suffer ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်။)