တောင်တရုတ်ပင်လယ်အတွက် ဖိလစ်ပိုင်က တရုတ်နှင့် စစ်ဖြစ်ရန် အသင့်ပြင်ထား

မေ ၃၀၊ ၂၀၁၈
M-Media

– တောင်တရုတ်ပင်လယ်က အငြင်းပွားရေပိုင်နက်ကို ထိခိုက်လာပြီဆိုရင် တရုတ်နဲ့ စစ်တိုက်ဖို့အထိ ပြင်ဆင်ထားတယ်လို့ ဖိလစ်ပိုင် ထိပ်တန်း လုံခြုံရေးတာဝန်ရှိသူတစ်ဦးက ဒီကနေ့မှာ ပြောကြားလိုက်ပြီး တရုတ်နဲ့ ပတ်သက်လာရင် ပျော့ပျောင်းလွန်းနေတယ်ဆိုတဲ့ ဝေဖန်မှုတွေကို တုန့်ပြန်လိုက်တာလည်း ဖြစ်ပါတယ်။

ဖိလစ်ပိုင်ရဲ့ စီးပွားရေးဇုန်အပါအ၀င် ကျွန်းတုတွေမှာ တရုတ်က ဒုံးစနူစ်တွေ ချထားတယ်ဆိုတဲ့ သတင်းတွေ ထွက်လာခဲ့ပြီးတဲ့နောက် ဖိလစ်ပိုင်အတိုက်အခံတွေက ဒူတာတေးအစိုးရဟာ သံတမန်နည်းလမ်းနဲ့ ကန့်ကွက်ဆန့်ကျင်တာမျိုးတောင် မလုပ်ဘူးလို့ ဝေဖန်ခဲ့ကြပါတယ်။

ဒူတာတေးဟာ တရုတ်ဆီက ရင်းနှီးမြှုပ်နှံမှုတွေကို လိုချင်တဲ့အတွက် ဆက်ဆံရေးကောင်းတည်ဆောက်ချင်နေပြီး၊ သူတို့ထက် အဆမတန်အင်အားကြီးတဲ့ တရုတ်နဲ့ စစ်တိုက်ဖို့ မဖြစ်နိုင်ဘူးလို့လည်း အရင်က ပြောကြားဖူးပါတယ်။

ဖိလစ်ပိုင်အမျိုးသားလုံခြုံရေးအကြံပေး ဟာမိုဂီနက်စ် အက်စ်ပီရွန်က ဖိလစ်ပိုင်အနေနဲ့ တင်းမာမှုတွေ လျော့ပါးရေး ဆွေးနွေးမှုလုပ်ဖို့ အမြဲတမ်းကြိုးစားနေကြောင်း၊ ဒါပေမယ့် ရန်စလာမယ်ဆိုရင်တော့ မလွှဲမရှောင်သာ စစ်ဖြစ်ရမှာဖြစ်ကြောင်း ပြောကြားခဲ့ပါတယ်။

“ကျွန်တော်တို့တပ်တွေကို ထိပါးလာပြီဆိုရင် ဒါဟာ စည်းဖောက်တာပဲလို့ သမ္မတက မနေ့မှာ ပြောကြားခဲ့ပါတယ်”

ဖိလစ်ပိုင်ရဲ့ အချုပ်အခြာအာဏာ တည်နေတဲ့ Scarborough Shoal မှာ တရုတ်ရဲ့ ဘယ်လိုအဆောက်အဦးကိုမှ လက်ခံမှာမဟုတ်ဘူးဆိုတာ သမ္မတဒူတာတေးက တရုတ်နိုင်ငံကို အသိပေးထားတယ်လို့ နိုင်ငံခြားရေးဝန်ကြီး ပီတာ ကာယီတာနိုက တနင်္လာနေ့မှာ သူ့လက်အောက်က၀န်ထမ်းတွေကို ပြောကြားခဲ့ပါတယ်။

Ref: CNA