စနေနေ့မနက် နိုင်ငံတကာသတင်းများ

ဇွန် ၂၊ ၂၀၁၈
M-Media

ကုလဆိုင်ရာ အမေရိကန်သံအမတ် နစ်ကီဟာလေး

ပါလက်စတိုင်းပြည်သူများအား ကာကွယ်ပေးရေးမူကြမ်းကို အမေရိကန်ကန့်ကွက်
==============
အစ္စရေးရဲ့ သတ်ဖြတ်မှုရန်ကနေ ပါလက်စတိုင်းပြည်သူတွေကို ကာကွယ်ပေးရေး ကူဝိတ်က လုံခြုံရေးကောင်စီမှာ မနေ့ကတင်သွင်းတဲ့အဆိုကို အဖွဲ့ဝင်အားလုံးက ထောက်ခံခဲ့ကြပေမယ့် အမေရိကန်တစ်နိုင်ငံတည်းရဲ့ ဗီတိုကြောင့် အတည်မပြုနိုင်ခဲ့ပါဘူး။ မတ်လ ၃၀ ရက်နေ့က ဂါဇာမှာ စတင်ခဲ့တဲ့ ပါလက်စတိုင်းပြည်သူတွေရဲ့ ငြိမ်းချမ်းစွာ ဆန္ဒပြမှုကို အစ္စရေးက အင်အားသုံးဖြိုခွင်းတာကြောင့် သေဆုံးသူဟာ အခုဆိုရင် ၁၂၀ ကျော်လာခဲ့ပြီး ဒဏ်ရာရသူတွေလည်း ထောင်ချီရှိနေပါတယ်။ ကုလဆိုင်ရာ အမေရိကန်သံအမတ် နစ်ကီဟာလေးက ကူဝိတ်ရဲ့အဆိုဟာ တစ်ဖက်သတ်ဖြစ်နေတယ်လို့ ပြောကြားခဲ့ပြီး ပါလက်စတိုင်းတွေ ထိခိုက်ခံစားရတာဟာ ဟားမက်စ်ကြောင့်လို့ အပြစ်တင်ခဲ့ပါတယ်။

ကင်ဂျုံအွန်နှင့်တွေ့မည်ဟု ထရမ့်အတည်ပြု
===============
ဇွန်လ ၁၂ ရက်နေ့မှာ ပြုလုပ်ဖို့ စီစဉ်ထားတဲ့အတိုင်း မြောက်ကိုရီးယားခေါင်းဆောင် ကင်ဂျုံအွန်နဲ့ တွေ့ဆုံသွားမယ်လို့ အမေရိကန်သမ္မတ ဒေါ်နယ်ထရမ့်က မနေ့မှာ ပြောကြားလိုက်ပါတယ်။ ကင်ဂျုံအွန်ရဲ့ ထိပ်တန်းအကြံပေး ကင်ယွန်ချိုလ်နဲ့ အိမ်ဖြူတော်မှာ တွေ့ဆုံခဲ့ပြီးတဲ့နောက် ဒီလိုပြောလိုက်တာပါ။ ဒါပေမယ့် မြောက်ကိုရီးယား နျူအစီအစဉ် ရပ်တန့်ရေး သဘောတူညီချက်တစ်ခုကိုတော့ အလျင်စလို လက်မှတ်ထိုးမှာ မဟုတ်ဘူးလို့လည်း ထရမ့်က ပြောပါတယ်။

အကြမ်းဖက်သံသယရှိသူ ၁၅ ဦးကို မလေးရှား ဖမ်းဆီးထိန်းသိမ်း
==================
ပြီးခဲ့တဲ့ ရွေးကောက်ပွဲမှာ မွတ်စလင်မဟုတ်တဲ့ မဲပေးသူတွေကို တိုက်ခိုက်ဖို့ စီစဉ်ခဲ့တဲ့ အကြမ်းဖက် သံသယရှိသူ ၁၅ ဦးကို မလေးရှား အကြမ်းဖက်တိုက်ဖျက်ရေး ရဲတပ်ဖွဲ့က ပြီးခဲ့တဲ့ရက်ပိုင်းမှာ ဖမ်းဆီးခဲ့ပြီး အဲဒီအထဲမှာ အသက် ၅၁ နှစ်အရွယ် အိမ်ထောင်ရှင်မတစ်ဦးလည်း ပါဝင်ပါတယ်။ ထောက်လှမ်းရေးအကြီးအကဲတစ်ဦးက အဲဒီအမျိုးသမီးဟာ အကြမ်းဖက်တိုက်ခိုက်ဖို့ အစီအစဉ်မှာ ဦးဆောင်သူဖြစ်ပြီး ကားပေါ်မှာ ဂက်စ်အိုးတင်ကာ မွတ်စလင်မဟုတ်တဲ့ မဲပေးသူတွေ၊ အခြားဘာသာဝင်တွေရဲ့ ၀တ်ပြုရာနေရာတွေကို တိုက်ခိုက်ဖို့အတွက် အပေါင်းအပါတွေစုကာ ကြံတာဖြစ်တယ်လို့ ဆိုပါတယ်။ ဒါဟာ မလေးရှားမှာ အမျိုးသမီးက ဦးဆောင်ပြီး အကြမ်းဖက်မှုလုပ်ဖို့ ပထမဆုံးစီစဉ်မှုလည်း ဖြစ်ပါတယ်။

ကင်ညာအစိုးရ၀န်ထမ်းများ အလိမ်ဖော်စက်ဖြင့် စစ်ဆေးခံရမည်
============
ခြစားမှုတိုက်ဖျက်ရေးအစီအစဉ် တစ်စိတ်တစ်ပိုင်းအဖြစ် အစိုးရ၀န်ထမ်းတွေအားလုံးဟာ အလိမ်ဖော်စက်နဲ့ စစ်ဆေးခံရမယ်လို့ ကင်ညာသမ္မတ အူရူ ကန်ယက်တာက ပြောကြားလိုက်ပါတယ်။ ကင်ညာအစိုးရရဲ့ အဖွဲ့အစည်းတစ်ခုဖြစ်တဲ့ National Youth Service (NYS) ဟာ ကန်ဒေါ်လာ ၇၈ သန်းလောက်ကို အလွဲသုံးစားလုပ်ထား တဲ့သတင်း ပေါ်ထွက်လာခဲ့ပြီးတဲ့နောက် ကန်ယက်တာဟာ ခြစားမှုတိုက်ဖျက်ရေးကို ထိထိရောက်ရောက် ကိုင်တွယ်ဖို့ ကြိုးစားလာခဲ့တာဖြစ်ပါတယ်။ ကန်ယက်တာဟာ ၂၀၁၃ ခုနှစ် ရွေးကောက်ပွဲမှာ ခြစားမှုကို တိုက်ဖျက်သွားမယ်လို့ ကတိပြုခဲ့သူလည်း ဖြစ်ပါတယ်။

Ref: Aljazeera, CNA, BBC