ဆီးရီးယားသမ္မတအာဆတ် မြောက်ကိုရီးယားသို့ သွားရောက်မည်

ဇွန် ၃၊ ၂၀၁၈
M-Media

– ဆီးရီးယားသမ္မတ ဘာရှာ အလ်-အာဆတ်ဟာ မြောက်ကိုရီးယားနိုင်ငံကို လာရောက်လည်ပတ်မယ်လို့ မြောက်ကိုရီးယားနိုင်ငံပိုင်သတင်းဌာနက ဒီကနေ့မှာ ဖော်ပြခဲ့ပြီး ကင်ဂျုံအွန် အာဏာရပြီးနောက်ပိုင်း နိုင်ငံ့အကြီးအကဲတစ်ဦး ပထမဆုံးလာရောက်မှု ဖြစ်လာမှာ ဖြစ်ပါတယ်။

လာရောက်လည်ပတ်မယ့်အကြောင်းကို မေလ ၃၀ ရက်နေ့ မြောက်ကိုရီးယား သံတမန် မွန်ဂျုံနမ်နဲ့ ဒမတ်စကတ်မှာ တွေ့ဆုံမှုအတွင်း အာဆတ်က ပြောကြားခဲ့တယ်လို့ ဆိုပါတယ်။

“ကျွန်တော့်အနေနဲ့ မြောက်ကိုရီးယားကို သွားရောက်လည်ပတ်ပြီး၊ ကင်ဂျုံအွန်နဲ့ တွေ့ဆုံသွားမှာပါ။ သူဟာ နောက်ဆုံးအောင်ပွဲကို အနိုင်ရပြီး ကိုရီးယားကျွန်းဆွယ် ပြန်လည်ပေါင်းစည်းရေး အောင်မြင်အောင် ဆောင်ရွက်နိုင်မယ်လို့ ကျွန်တော် အသေအချာ ယုံကြည်ပါတယ်” လို့ အာဆတ်က ပြောကြားခဲ့ပါတယ်။

ဒီသတင်းနဲ့ပတ်သက်ပြီး ဆီးရီးယားသမ္မတရုံးက ဘာမှ မထုတ်ပြန်သေးပါဘူး။

မြောက်ကိုရီးယားနဲ့ ဆီးရီးယားတို့ဟာ ဆက်ဆံရေးကောင်းတွေ ရှိခဲ့ပြီး ကုလစောင့်ကြည့်ရေးတာဝန်ရှိသူတွေက သူတို့နှစ်နိုင်ငံဟာ ဓာတုလက်နက်တွေနဲ့ပတ်သက်လို့ ပူးပေါင်းဆောင်ရွက်မှုတွေ ရှိတယ်လို့ စွပ်စွဲပြောဆိုထားပါတယ်။ မြောက်ကိုရီးယားကတော့ ဒီကိစ္စကို ငြင်းဆိုခဲ့ပါတယ်။

၂၀၁၁ ခုနှစ် အာဏာရပြီးနောက်ပိုင်းမှာ ကင်ဂျုံအွန်ဟာ မြောက်ကိုရီးယားမှာ အခြားနိုင်ငံတစ်ခုက ခေါင်းဆောင်တွေနဲ့ တရားဝင် တွေ့ဆုံတာမျိုး မရှိပါဘူး။

Ref: Aljazeera