အမေရိကန်၏ ဒရုန်းဖြင့်တိုက်ခိုက်မှုကြောင့် ပါကစ္စတန်တာလီဘန်အဖွဲ့ခေါင်းဆောင် သေဆုံး

ဇွန် ၁၅၊ ၂၀၁၈
M-Media

ပါကစ္စတန် တာလီဘန်အဖွဲ့ခေါင်းဆောင် မွလ္လာ ဖဇ်လွလ္လာဟ် (လယ်)

– ပါကစ္စတန်က တာလီဘန်အဖွဲ့ခေါင်းဆောင် မွလ္လာ ဖဇ်လွလ္လာဟ်ဟာ သူတို့ရဲ့ တိုက်ခိုက်မှုတစ်ခုအတွင်း သေဆုံးသွားတယ်လို့ အာဖဂန်နစ္စတန် ကာကွယ်ရေးဝန်ကြီးဌာနက ဒီကနေ့မှာ ထုတ်ပြန်ကြေငြာလိုက်ပါတယ်။

ပါကစ္စတန်နဲ့ထိပ်စပ်နေတဲ ကူနာရ်ပြည်နယ် မာရာဝီရာ ခရိုင်မှာ ကြာသာပတေးနေ့မနက် ၉ နာရီအချိန်က အမေရိကန်နဲ့ အာဖဂန်တပ်ဖွဲ့က ပူးပေါင်ပြုလုပ်တဲ့ လေကြောင်းတိုက်ခိုက်မှုမှာ သေဆုံးခဲ့တာဖြစ်ပါတယ်။

အာဖဂန် ကာကွယ်ရေးဝန်ကြီးဌာနက ပြောရေးဆိုခွင့်ရှိသူ မိုဟာမက် ရဒ်မာနစ်ရ်ှက အဲဒီတိုက်ခိုက်မှုအတွင်း ဖဇ်လွလ္လာနဲ့အတူ အခြား တိုက်ခိုက်ရေးသမား ၂ ဦးလည်း သေဆုံးခဲ့တယ်လို့ ပြောကြားခဲ့ပါတယ်။

ပါကစ္စတန် တာလီဘန်အဖွဲ့ Tehreek-i-Taliban (TTP) က သူတို့ခေါင်းဆောင် အသတ်ခံခဲ့ရကြောင်း အတည်ပြုခဲ့ပြီး အာဖဂန် ထောက်လှမ်းရေးအဖွဲ့ NDS က ဒရုန်းနဲ့တိုက်ခိုက်ဖို့အတွက် သတင်းအချက်အလက်တွေ ပေးခဲ့တယ်လို့ ပြောကြားခဲ့ပါတယ်။

ပါကစ္စတန်က NDS ဟာ ဖဇ်လွလ္လာကို အာဖဂန်မှာ ခိုလှုံခွင့်ပေးထားတယ်လို့ အရင်က စွပ်စွဲဖူးပါတယ်။

အာဖဂန်က အမေရိကန်တပ်ဖွဲ့ရဲ့ ထုတ်ပြန်ချက်မှာ အာဖဂန်နဲ့ ပါကစ္စတန်ကြားက နယ်စပ်ဒေသ တိုက်ခိုက်မှုမှာ အကြမ်းဖက်အဖွဲ့အစည်တစ်ခုရဲ့ ခေါင်းဆောင် သေဆုံးခဲ့တယ်လို့ ဖော်ပြပေမယ့် အမည်အတိအကျကို မပြောခဲ့ပါဘူး။

မတ်လအတွင်းကလည်း ကူနာရ်ပြည်နယ်မှာ အမေရိကန်ရဲ့ ဒရုန်းနဲ့တိုက်ခိုက်မှုအတွင်း ဖဇ်လွလ္လာရဲ့သား အဘ်ဒူလာအပါအ၀င် TTP က တိုက်ခိုက်ရေးသမား ၂၀ လောက် သေဆုံးခဲ့ပါတယ်။

Ref: Aljzeera