ကမ္ဘာ့ ဒုက္ခသည်အများဆုံးစာရင်းတွင် မြန်မာနိုင်ငံက အဆင့် ၄ နေရာ ရှိနေ

ဇွန် ၂၀၊ ၂၀၁၈
M-Media

ဘင်္ဂလားဒေ့ရ်ှနိုင်ငံရှိ ကူတူပါလောင် ဒုက္ခသည်စခန်း

– ကမ္ဘာပေါ်က ဒုက္ခသည်အရေအတွက်မှာ မြန်မာနိုင်ငံက ထွက်ပြေးရသူတွေဟာ ၁.၂ သန်းလောက်ရှိနေပြီး စတုတ္ထမြောက်အများဆုံးဖြစ်နေတယ်လို့ ကုလ ဒုက္ခသည်များဆိုင်ရာ မဟာမင်းကြီးရုံးက ဒီကနေ့ ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

မြန်မာနိုင်ငံက ထွက်ပြေးရတဲ့ ဒုက္ခသည်အရေအတွက်ဟာ ၂၀၁၆ ခုနှစ် နှစ်ကုန်ပိုင်းမှာ သန်းဝက်လောက် ရှိခဲ့ရာကနေ ၂၀၁၇ ခုနှစ် နှစ်ကုန်ပိုင်းမှာတော့ နှစ်ဆကျော် တက်လာတာဖြစ်ပါတယ်။

အိုးအိမ်စွန့်ခွာ ထွက်ပြေးရသူ အများဆုံးရှိတဲ့နိုင်ငံဟာ ၇ နှစ်ကြာ ပြည်တွင်းစစ်ဖြစ်နေတဲ့ ဆီးရီးယားနိုင်ငံ ဖြစ်ပြီး သူ့နောက်မှာ အာဖဂန်နစ္စတန်၊ တောင်ဆူဒန်နဲ့ မြန်မာတို့က အသီးသီး ရပ်တည်နေပါတယ်။

ဘင်္ဂလားဒေ့ရ်ှဟာ မြန်မာနိုင်ငံက ဒုက္ခသည် အများဆုံးလက်ခံထားရတဲ့ နိုင်ငံအဖြစ် စာရင်းဝင်နေပြီး ၉၃၂၀၀၀ လောက်ရှိနေပါတယ်။ ထိုင်းနိုင်ငံမှာ မြန်မာနိုင်ငံကနေ ထွက်ပြေးရတဲ့ ဒုက္ခသည် တစ်သိန်းလောက် ရှိနေကာ မလေးရှားမှာ ၉၈၀၀၀၊ အိန္ဒိယမှာ ၁၈၁၀၀ လောက်ရှိနေပါတယ်။

ကုလ ဒုက္ခသည်များဆိုင်ရာ မဟာမင်းကြီး ဖိလစ်ပို ဂရန်ဒီက ကမ္ဘာတစ်ဝှမ်း အိုးအိမ်စွန့်ခွာ ထွက်ပြေးရတဲ့ ဒုက္ခသည်အရေအတွက်ဟာ ၆၈.၅ သန်းအထိ မြင့်တက်လာပြီး စံချိန်တင် မြင့်တက်လာတာဖြစ်တယ်လို့ ဒီကနေ့ ကျရောက်တဲ့ ကမ္ဘာ့ဒုက္ခသည်များနေ့ ကြေငြာချက်မှာ ပြောကြားခဲ့ပါတယ်။

အိုးအိမ်စွန့်ခွာ ထွက်ပြေးရသူတွေကို ကူညီစောင့်ရှောက်ပေးတဲ့ သူတွေကိုလည်း မဟာမင်းကြီးက ချီးကျူးခဲ့ပါတယ်။

မြန်မာနိုင်ငံမှာ UNHCR ဟာ ကရင်ပြည်နယ်နဲ့ တနင်္သာရီ တိုင်းဒေသကြီးတွေမှာ ‘ကမ္ဘာ့ဒုက္ခသည်များနေ့’ အခမ်းအနားတွေ ကျင်းပခဲ့ပြီး အစိုးရတာဝန်ရှိသူတွေ၊ ကရင်အမျိုးသားအစည်းအရုံးက ကိုယ်စားလှယ်တွေ၊ အိုးအိမ်စွန့်ခွာ ထွက်ပြေးရသူတွေ၊ ဒုက္ခသည်ဘ၀ကနေ မိမိနေရပ် ပြန်ရောက်လာကြသူတွေ တက်ရောက်ခဲ့ကြပါတယ်။

Ref: Frontier Myanmar