ပြောင်းရွှေ့အခြေချမှုကိစ္စတွင် ဝေဖန်ခံနေရသည့် ပေါ်လစီတစ်ခုကို အမေရိကန် ပယ်ဖျက်

ဇွန် ၂၁၊ ၂၀၁၈
M-Media

နယ်စပ်ရှိ ထိန်းသိမ်းရေးစခန်းတစ်ခုတွင် တွေ့ရသည့် ကလေးများ

– တရားမ၀င် နယ်စပ်ဖြတ်ကျော်လာသူတွေထဲက ကလေးတွေကို မိဘနဲ့ခွဲပြီး ထိန်းသိမ်းထားတဲ့ ပေါ်လစီကို ရုပ်သိမ်းကြောင်း အမေရိကန်သမ္မတ ဒေါ်နယ်ထရမ့်က မနေ့မှာ ကြေငြာလိုက်ပါတယ်။

ထရမ့်ရဲ့ ဒီပေါ်လစီအတွက် ကမ္ဘာတစ်ဝှမ်းက ဝေဖန်မှုတွေ မြင့်တက်လာခဲ့ပြီးတဲ့နောက် ရုပ်သိမ်းကြောင်းအမိန့် မူကြမ်းကို အမိမြေလုံခြုံရေးဆိုင်ရာဝန်ကြီး ကီရ်ဂျန် နီလ်ဆန်က ရေးဆွဲပေးကာ ထရမ့်က လက်မှတ်ရေးထိုးခဲ့တာ ဖြစ်ပါတယ်။

“နယ်စပ်ကို တင်းတင်းကြပ်ကြပ်ထိန်းချုပ်ထားမှာဖြစ်ပေမယ့် မိသားစုတွေကို ခွဲမထားတော့ပါဘူး” လို့ ထရမ့်က လက်မှတ်ရေးထိုးပြီးနောက်ပိုင်းမှာ ပြောကြားခဲ့ပါတယ်။

ကလေးတွေ မိဘနဲ့ခွဲနေရတာကို မကြည့်ရက်ဘူးလို့ဆိုပေမယ့် တရားမ၀င် ပြောင်းရွှေ့အခြေချမှုအပေါ် လုံးဝသည်းမခံတဲ့ပေါ်လစီကို ကျင့်သုံးသွားမှာဖြစ်တယ်လို့လည်း သူက ထည့်သွင်းပြောဆိုခဲ့ပါတယ်။

အမေရိကန်အစိုးရဟာ တရားမ၀င် ၀င်ရောက်လာသူတွေအပေါ် တရားစွဲဆိုတာတွေ ပြုလုပ်နေပြီး အရွယ်ရောက်သူတွေကို အမေရိကန် Marshals Service ဌာနက ထိန်းသိမ်းထားပါတယ်။ ကလေးတွေကိုတော့ ကျန်းမာရေးနဲ့ လူသားရေးရာ ဦးစီးဌာနက တာဝန်ယူပါတယ်။

သမ္မတအိုဘားမားလက်ထက်မှာ တရားမ၀င် ၀င်ရောက်လာတဲ့ မိသားစုတွေကို သီးသန့်ခွဲထားတာမျိုးမလုပ်ဘဲ အရပ်ဖက်ဥပဒေအရ နယ်နှင်တာမျိုးတွေသာ လုပ်ဆောင်ပါတယ်။

ဒါပေမယ့် ထရမ့်လက်ထက်မှာ မိဘတွေနဲ့ ကလေးတွေကို သီးခြားခွဲထားတာမျိုး ပိုမိုလုပ်ဆောင်လာခဲ့ပြီး မေလ ၅ ရက်နေ့ကနေ ၉ ရက်အတွင်း ဒီလို ခွဲပြီး ထိန်းသိမ်းထားတဲ့ ကလေးငယ်အရေအတွက်ဟာ ၂၃၀၀ အထိ ရှိလာတယ်လို့ အမိမြေလုံခြုံရေး ဦးစီးဌာနက ပြောကြားခဲ့ပါတယ်။

Ref: Aljazeera