ကမ္ဘာ့အလုံခြုံဆုံးနိုင်ငံအဖြစ် စင်ကာပူ ၃ နှစ်ဆက် ရပ်တည်

ဇွန် ၂၁၊ ၂၀၁၈
M-Media

– ကမ္ဘာပေါ်က အလုံခြုံဆုံးနိုင်ငံတွေစာရင်းမှာ စင်ကာပူဟာ ၃ နှစ်ဆက်တိုက် ထိပ်ဆုံးမှာရှိပြီး အရှေ့တောင်အာရှက အင်ဒိုနီးရှားနိုင်ငံကလည်း အလုံခြုံဆုံး ၁၀ နိုင်ငံထဲမှာ ပါဝင်လာခဲ့ပါတယ်။

သုတေသနအဖွဲ့တစ်ခုဖြစ်တဲ့ Gallup က နိုင်ငံပေါင်း ၁၄၂ နိုင်ငံမှာရှိတဲ့ နေထိုင်သူတွေကို မေးမြန်းကာ စစ်တမ်းကောက်ယူခဲ့တာဖြစ်ပြီး Law and Order Index ဆိုတဲ့အမည်နဲ့ ရလဒ်တွေကို ထုတ်ပြန်ခဲ့ပါတယ်။

မေးခွန်းတွေထဲမှာ ရဲတပ်ဖွဲ့အပေါ် ယုံကြည်မှု၊ တစ်ကိုယ်ရည် လုံခြုံမှုနဲ့ သူခိုးသူဝှက် အန္တရာယ်၊ အနိုင်ကျင့်ခံရမှု၊ လုယက်ခံရမှု စတဲ့ အကြောင်းအရာတွေ ပါဝင်ပါတယ်။

၂၀၁၈ ခုနှစ်နဲ့ ၂၀၁၇ ခုနှစ် ၂ နှစ်စလုံးမှာ စင်ကာပူဟာ အမှတ် ၁၀၀ မှာ ၉၇ မှတ်နဲ့ ထိပ်ဆုံးမှာ ရှိနေခဲ့ပါတယ်။ ၂၀၁၆ ခုနှစ်ကလည်း ၉၃ မှတ်နဲ့ ကမ္ဘာ့အလုံခြုံဆုံးနိုင်ငံအဖြစ် စာရင်းဝင်ပါတယ်။

၂၀၁၈ ခုနှစ် အလုံခြုံဆုံးစာရင်း ဒုတိယနေရာမှာ နော်ဝေ၊ အိုက်စလန်နဲ့ ဖင်လန်နိုင်ငံတို့က ၉၃ မှတ်စီနဲ့ ရှိနေကြပါတယ်။ အဆင့် ၁၀ အတွင်းဝင်တဲ့ အာရှက နောက်ထပ်နှစ်နိုင်ငံဟာ ဟောင်ကောင်နဲ့ အင်ဒိုနီးရှားတို့ ဖြစ်ပါတယ်။

ဒီစာရင်းမှာ အဆင့်အနိမ့်ဆုံးက ဗင်နီဇွဲလားနိုင်ငံဖြစ်ပြီး ၄၄ မှတ်ရရှိကာ၊ အာဖဂန်နစ္စတန်က ၄၅ မှတ်နဲ့ သူ့အထက်မှာ ရှိနေပါတယ်။

နိုင်ငံအတွင်း ညဖက် တစ်ယောက်တည်းလမ်းလျှောက်သွားဖို့ လုံခြုံတယ်လို့ ဖြေကြားသူဟာ ဗင်နီဇွဲလားမှာ ၁၇ ရာခိုင်နှုန်းသာရှိပြီး အာဖဂန်က ၂၀ ရာခိုင်နှုန်း ရှိပါတယ်။

တစ်ကမ္ဘာလုံး အတိုင်းအတာနဲ့ ကြည့်မယ်ဆိုရင် ဖြေကြားသူ ၆၉ ရာခိုင်နှုန်းက ရဲတပ်ဖွဲ့အပေါ် ယုံကြည်မှုရှိကြောင်း တွေ့ရပြီး၊ ညဖက် လမ်းလျှောက်ရာမှာ လုံခြုံမှုရှိတယ်လို့ ဖြေကြားသူက ၆၈ ရာခိုင်နှုန်းရှိပါတယ်။

ကမ္ဘာ့အလုံခြုံဆုံး ၁၀ နိုင်ငံက စင်ကာပူ၊ နော်ဝေ၊ အိုက်စလန်၊ ဖင်လန်၊ ဥဇဘက်ကစ္စတန်၊ ဟောင်ကောင်၊ ဆွစ်ဇာလန်၊ ကနေဒါ၊ အင်ဒိုနီးရှားနဲ့ ဒိန်းမတ်နိုင်ငံတို့ ဖြစ်ပါတယ်။

Ref: CNA