မြန်မာ့ကျောက်စိမ်းလုပ်ငန်းရှိ လူ့အခွင့်အရေးချိုးဖောက်မှုများတွင် ကမ္ဘာ့ကုမ္ပဏီများ ပါဝင်နေ

ဇွန် ၂၂၊ ၂၀၁၈
M-Media

– ကချင်ပြည်နယ်က ပြည်သူတွေ လူ့အခွင့်အရေးချိုးဖောက်ခံရမှုမှာ သတ္တုတွင်းလုပ်ငန်းသုံးပစ္စည်းတွေ ထုတ်လုပ်တဲ့ ကမ္ဘာ့အကြီးဆုံးကုမ္ပဏီ ၃ ခု ပါဝင်နေတယ်လို့ ဆွီဒင်အခြေစိုက် ပရဟိတအဖွဲ့ Swedwatch က အခုတစ်ပတ်အတွင်း ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

မြန်မာနိုင်ငံက ကျောက်စိမ်းနဲ့ အခြား တန်ဖိုးကြီး တွင်းထွက်ပစ္စည်းတွေ အမြောက်အများထွက်ရာ နေရာတွေဟာ တိုင်းရင်းသားတွေနေထိုင်တဲ့ ဒေသတွေ ဖြစ်ပါတယ်။

ကချင်ပြည်နယ်က ကျောက်မြတ်ရတနာ လုပ်ငန်းတွေမှာ စစ်တပ်နဲ့ ဆက်နွယ်နေတဲ့ ကုမ္ပဏီတွေရဲ့ မဆင်မခြင် လုပ်ငန်းလုပ်ကိုင်မှုကြောင့် ဒေသခံတွေရဲ့ မြေယာတွေ ဆုံးရှုံးတာ၊ အသက်မွေးဝမ်းကြောင်းလုပ်ငန်းတွေ ပျက်ဆီးတာ၊ မြေပြိုတာ၊ သဘာဝပတ်ဝန်းကျင် ထိခိုက်တာတွေ ဖြစ်ပေါ်နေပါတယ်။

ဒေါ်အောင်ဆန်းစုကြည်ဦးဆောင်တဲ့ အစိုးရက တွင်းထွက်လုပ်ငန်းတွေကို ပိုမိုတင်းကြပ်စွာ ကိုင်တွယ်သွားမယ်လို့ ပြောကြားခဲ့ပေမယ့် အခုအချိန်အထိ အကောင်အထည်မဖော်နိုင်သေးပါဘူး။

“ကျောက်စိမ်းထွက်ရာဒေသတွေမှာ စက်ကိရိယာတွေကို အသုံးပြုမှုရဲ့ ထိခိုက်မှုက တော်တော်လေး ဆိုးဝါးနေပါတယ်။ (၂၀၀၀ ပြည့်နှစ်တွေနောက်ပိုင်း) ဧရာမစက်ကြီးတွေကို အသုံးပြီး လုပ်ငန်းတွေ စတင်လုပ်ဆောင်ကတည်းက မြေပြိုမှုတွေ၊ ရေကြီးမှုတွေကြောင့် လူရာနဲ့ချီ သေဆုံးခဲ့ပါတယ်။ မြေယာအခွင့်အရေး ချိုးဖောက်ခံရမှုကြောင့် အိမ်ထောင်စု တော်တော်များများဟာ အသက်မွေးဝမ်းကြောင်းလုပ်ငန်းတွေ ဆုံးရှုံးခဲ့ရသလို၊ အမျိုးသမီးတွေ၊ ကလေးတွေနဲ့ ရွှေ့ပြောင်းလုပ်သားတွေလို အကာကွယ်မဲ့တဲ့သူတွေဟာလည်း ကျန်းမာရေး သိသိသာသာ ဆိုးရွားမှုတွေ၊ မလုံခြုံမှုတွေကို ခံစားခဲ့ရပါတယ်။ သဘာဝပတ်ဝန်းကျင် ယိုယွင်းမှုလည်း ဆိုးရွားလာပြီး ဒေသခံပြည်သူတွေရဲ့ ရေရရှိမှု၊ တစ်ကိုယ်ရည် သန့်ရှင်းမှုတွေအပေါ် ထိခိုက်စေပါတယ်” လို့ Swedwatch ရဲ့ အစီရင်ခံစာမှာ ဖော်ပြထားပါတယ်။

ကျောက်မြတ်ရတနာ တူးဖော်မှုနဲ့ သတ္တုတွင်းလုပ်ငန်းတွေဟာ ဒေသခံပြည်သူတွေအပေါ် ထိုခိုက်မှုအပြင် တစ်နိုင်ငံလုံး အတိုင်းအတာနဲ့ ပျက်ဆီးဆုံးရှုံးမှုတွေ ရှိတယ်လို့လည်း ဆိုပါတယ်။

ခြစားမှု စောင့်ကြည့်ရေးအဖွဲ့ဖြစ်တဲ့ Global Witness က မြန်မာ့ ကျောက်မြတ်ရတနာလုပ်ငန်းဟာ ကန်ဒေါ်လာ ၃၁ ဘီလီယံတန်ဖိုးရှိနေပြီး ထွက်ကုန် ၅၀ ရာခိုင်နှုန်းကနေ ၈၀ ရာခိုင်နှုန်းလောက်က တိုင်းပြည်အပြင်ဖက်ကို တရားမ၀င် ထွက်နေတယ်လို့ ပြီးခဲ့တဲ့နှစ် အစီရင်ခံစာမှာ ဖော်ပြထားပါတယ်။

လူ့အခွင့်အရေးချိုးဖောက်မှု ကိစ္စတွေမှာ သူတို့ဆီကထုတ်တဲ့ စက်ပစ္စည်းတွေကို အသုံးပြုနေတယ်ဆိုတာ သတ္တုထွင်းလုပ်ငန်းသုံး ပစ္စည်းတွေထုတ်လုပ်တဲ့ Caterpillar၊ Volvo နဲ့ Komatsu တို့က လွန်ခဲ့တဲ့ နှစ်များစွာ ကတည်းက သိရှိခဲ့ကြကြောင်း၊ ဒါပေမယ့် ဒါကို လျော့ပါးသွားအောင် မလုပ်ဆောင်ခဲ့ကြောင်း Swedwatch ရဲ့ အစီရင်ခံစာမှာ ဖော်ပြခဲ့ပါတယ်။

Ref: Coconuts