ဗုဒ္ဓဟူးနေ့ ကမ္ဘာ့ဖလားသတင်းများ

ဇွန် ၂၇၊ ၂၀၁၈
M-Media

အာဂျင်တီးနားနိုင်ပွဲအတွက် အောင်ပွဲခံနေသည့် မာရာဒိုနာ

လက်ရှိချန်ပီယံဂျာမနီ ကမ္ဘာ့ဖလားကို အုပ်စုအဆင့်မှ လက်ပြနှုတ်ဆက်
==========
တောင်ကိုရီးယားကို ၂ ဂိုးပြတ် ရှုံးနိမ့်ခဲ့တဲ့ လက်ရှိချန်ပီယံ ဂျာမနီဟာ ကမ္ဘာ့ဖလားပြိုင်ပွဲတစ်လျှောက် မထင်မှတ်ဘဲ အုပ်စုအဆင့်ကနေ လှည့်ပြန်ခဲ့ရတဲ့ အသင်းစာရင်းမှာ ပါဝင်သွားခဲ့ပါတယ်။ အုပ်စု F အဖွင့်ပွဲစဉ်မှာ မက္ကဆီကိုကို ရှုံးနိမ့်ခဲ့တဲ့ ဂျာမနီဟာ ဆွီဒင်နဲ့ ဒုတိယပွဲမှာ တိုနီကရုဇ်ရဲ့ နောက်ဆုံးမိနစ်သွင်းဂိုးနဲ့ ၃ မှတ်ရယူနိုင်ခဲ့ပါတယ်။ ဒီနေ့ပွဲမှာ ဂျာမနီနိုင်မယ်လို့ ထင်ကြေးပေးကြပေမယ့် တောင်ကိုရီးယားက အကောင်းဆုံး ကစားနိုင်ခဲ့ပြီး နောက်ဆုံးမိနစ် သွင်းဂိုး ၂ ဂိုးနဲ့ အနိုင်ယူနိုင်ခဲ့ပါတယ်။ ဂျာမနီဟာ အုပ်စုအဆင့်က ထွက်ရတဲ့ စတုတ္ထမြောက် ကမ္ဘာ့ဖလားချန်ပီယံ ဖြစ်လာပါတယ်။ ၁၉၉၈ ကမ္ဘာ့ဖလားချန်ပီယံဖြစ်ခဲ့တဲ့ ပြင်သစ်ဟာ ၂၀၀၂ ခုနှစ်မှာ အုပ်စုကနေ ထွက်ခဲ့ရပြီး၊ ၂၀၀၆ ကမ္ဘာ့ဖလားချန်ပီယံ အီတလီဟာ ၂၀၁၀ ခုနှစ်မှာ အုပ်စုအဆင့်ကနေ ထွက်ခဲ့ရပါတယ်။ ၂၀၁၀ ကမ္ဘာ့ဖလားချန်ပီယံ စပိန်ကတော့ ၂၀၁၄ ခုနှစ်မှာ အုပ်စုအဆင့်ကနေ လှည့်ပြန်ခဲ့ရပါတယ်။

မက္ကဆီကိုနောက်ခံလူ ကမ္ဘာ့ဖလား စံချိန်သစ်တစ်ခု တင်
===========
အုပ်စု F နောက်ဆုံးပွဲစဉ်အဖြစ် ဒီကနေ့ကစားတဲ့ ဆွီဒင်နဲ့ပွဲမှာ မက္ကဆီကို နောက်ခံလူ ဂျီးဆပ် ဂဲလာဒိုဟာ ပွဲအစ ၁၅ စက္ကန့်မှာပဲ အ၀ါကဒ်ပြခံခဲ့ရပြီး ကမ္ဘာ့ဖလားပြိုင်ပွဲမှာ အမြန်ဆုံး အ၀ါကဒ်ပြ သတိပေးခံရတဲ့ ကစားသမားအဖြစ် မှတ်တမ်းဝင်သွားခဲ့ပါတယ်။ ဒါဟာ ၁၉၈၂ ခုနှစ် ကမ္ဘာ့ဖလားမှာ အီတလီကွင်းလယ်ကစားသမား ဂီယမ်ပီယာရို မာရီနီ၊ ၁၉၉၄ ခုနှစ် ကမ္ဘာ့ဖလားမှာ ဆိုဗီယက်နောက်ခံလူ ဆာဂျီ ဂေါ်လူကိုဗစ်ခ်ျတို့နဲ့အတူ ပွဲအစ ၁ မိနစ်မှာပဲ အ၀ါကဒ်ပြခံရတဲ့ တတိယမြောက်ကစားသမား ဖြစ်လာပါတယ်။ ကမ္ဘာ့ဖလားမှာ အမြန်ဆုံး အနီကဒ်ပြခံရတဲ့ ကစားသမားက ဥရုဂွေးတိုက်စစ်မှူး ဘာတစ္စတာဖြစ်ပြီး ၁၉၈၆ ကမ္ဘာ့ဖလား စကော့တလန်နဲ့ကစားစဉ် ပွဲအစ ၅၆ စက္ကန့်မှာတင် အနီကဒ် ပြခံခဲ့ရတာ ဖြစ်ပါတယ်။

ပုံမှန်စံချိန်ကို နေးမာ ပြန်မရောက်သေးဟု ဘရာဇီးလ်နည်းပြ ပြော
===================
နေးမာဟာ ရှိသင့်ရှိထိုက်တဲ့ စံနှုန်းအတွင်း ပြန်မရောက်သေးတာကြောင့် ဘရာဇီးလ်ပြည်သူတွေအနေနဲ့ သူ့အပေါ် တာဝန်ပုံမပေးသင့်ဘူးလို့ ဘရာဇီးလ်နည်းပြ တီတီက ပြောကြားလိုက်ပါတယ်။ နေးမာဟာ ခြေထောက်ဒဏ်ရာကြောင့် ၃ လကြာ အနားယူခဲ့ရပြီး မကြာသေးခင်ကမှ ပြန်ကစားနိုင်တာ ဖြစ်ပါတယ်။ အုပ်စုမှာ ၂ ပွဲကစား ၄ မှတ်သာ ရရှိထားသည့် ဘရာဇီးလ်ဟာ ဒီည ဆားဘီးယားနဲ့ ကစားတဲ့ပွဲမှာ အနည်းဆုံး ၁ မှတ်ရမှ နောက်တစ်ဆင့်ကို တက်နိုင်မှာပါ။ တီတီက နေးမာဟာ ဒဏ်ရာကနေ ပြန်လည်သက်သာလာဆဲ အနေအထားမှာသာ ရှိသေးကြောင်း နောက်တစ်ပွဲလာက်ရောက်မှ ပုံမှန်အနေအထားကို ပြန်ရောက်မှာဖြစ်ကြောင်း ထည့်သွင်းပြောဆိုခဲ့ပါတယ်။

ကျန်းမာရေးအတွက် မစိုးရိမ်ကြဖို့ မာရာဒိုနာပြောကြား
===============
နိုက်ဂျီးရီးယားကို အာဂျင်တီးနားက အနိုင်ရခဲ့တဲ့ မနေ့ကပွဲမှာ အလွန်အကျွံအောင်ပွဲခံမှုကြောင့် ကျန်းမာရေး ဆိုးရွားခဲ့ပေမယ့် အခုအချိန်မှာ ပြန်ကောင်းနေပြီးလို့ အာဂျင်တီးနား ဂန္တ၀င်ကစားသမား မာရာဒိုနာက ဆိုရှယ်မီဒီယာကနေ ပြောကြားလိုက်ပါတယ်။ နောက်တစ်ဆင့်တက်ရေးအတွက် မဖြစ်မနေ အနိုင်ကစားရမယ့် အဲ ဒီပွဲမှာ အာဂျင်တီးယားဟာ ၈၆ မိနစ်ကျမှာ မားကို့စ် ရိုဂျိုးရဲ့ ဂိုးနဲ့ အနိုင်ရခဲ့ပါတယ်။ မာရာဒိုနာဟာ အဲဒီပွဲကြည့်နေစဉ် ပထမပိုင်းအပြီးမှာပဲ ကျန်းမာရေးမကောင်းတာကြောင့် အိမ်ပြန်နားဖို့ ဆရာဝန်က ပြောခဲ့ပေမယ့် နားမထောင်ခဲ့ပါဘူး။ အာဂျင်တီးနား အနိုင်ဂိုးသွင်းနိုင်တဲ့အခါဟာ မာရာဒိုနာဟာ အော်ဟစ် အောင်ပွဲခံခဲ့ပြီး နောက်ပိုင်း ပွဲကြည့်စင်ကနေ တွဲခေါ်ထုတ်သွားရတဲ့အတွက် ကျန်းမာရေး ဆိုးရွားခဲ့ပါတယ်။ မာရာဒိုနာကတော့ စိတ်ပူပေးတဲ့သူတွေကို ကျေးဇူးပဲလို့ ပြောကြားခဲ့ပါတယ်။

Ref : Goal, BBC