“အစ္စလာမ့် ယဉ်ကျေး လိမ္မာသင်ရိုး မြန်မာမှုပြုရေး – ဖိနှိပ်မှုလား အခွင့်အလမ်းလား”

ဇွန် ၃၀ ၊ ၂၀၁၈

By မြင်သစ်နှင့် ညီနောင်များ

ဒီရက်ပိုင်းအတွင်း အာဏာပိုင်တွေဖက်က အစ္စလာမ့်ယဉ်ကျေးလိမ္မာ သင်တန်းတွေနဲ့ ပတ်သက်ပြီး ညွှန်ကြားစာဟာ မြန်မာမွတ်စလင်မ် လူမှုမီဒီယာသုံးစွဲသူတွေ အကြား ပြန့်နှံ့ခဲ့ပြီး ဝေဖန်မှုများ ထောက်ခံမှုအချို့နဲ့ ပွက်လောရိုက်စေခဲ့ပါတယ်။

ဒီစာမှာ ညွှန်ကြားချက်ကတော့ နှစ်ပိုင်းလို့ မြင်မိပါတယ်။ ပထမအနေနဲ့က ယဉ်ကျေးလိမ္မာသင်တန်းတွေ၊ ဘာသာရေးဆိုင်ရာ စုပေါင်း လုပ်ဆောင်မှုတွေကို အစိုးရက တရားဝင်ခွင့်ပြုထားတဲ့ ဗလီဝတ်ကျောင်းနဲ့ ဘာသာရေးစာသင်ကျောင်းမှာသာ သင်ဖို့နဲ့ လုပ်ဖို့၊ သင်ကြားပို့ချချက်တွေကို မြန်မာလိုသာ ပြုလုပ်ဖို့ပါ။ ဒုတိယအပိုင်းကတော့ ပိုအရေးပါမလားဘဲ၊ သင်တန်းဖွင့်လှစ်ပို့ချမှု မလုပ်ခင်မှာ ပို့ချချက်တွေကို မြန်မာလိုပြန်ဆိုပြီး သက်ဆိုင်ရာကို တင်ပြဖို့နဲ့၊ အဲ့ဒီ့နောက် တိုင်းဒေသပြည်နယ်အဆင့်သက်ဆိုင်ရာက ခွင့်ပြုမှသာ ပို့ချဖို့ဆိုတာ ဖြစ်ပါတယ်။

ပြည်တွင်းမှာ လူများစုကိုးကွယ်တဲ့ ဘာသာရေးအခြေပြုနိုင်ငံရေးနဲ့ အမျိုးသားရေးဝါဒီ ဦးမော့နေပြီး လူနည်းစုဘာသာတရားကိုးကွယ်သူတွေ ပစ်မှတ်ထားခံနေရချိန်မှာ အခုအမိန့်စာကို မြန်မာမွတ်စလင်မ်အများစုက အာဏာပိုင်တွေရဲ့ မွတ်စလင်မ်တွေအပေါ် အသစ်တိုးလုပ်လာတဲ့ ချုပ်ချယ်မှုလို့ မြင်နေကြပါတယ်။

‘လက်ရှိ အစ္စလာမ့်ဘာသာရေးအခြေခံ သင်ကြားခြင်းပုံစံ’

မွတ်စလင်မ်တွေက သူတို့ရဲ့ သားငယ်သမီးငယ်တွေကို ဘာသာရေးအခြေခံကို စနစ်တကျ သင်ကြားဖို့အတွက် အစ္စလာမ့်ယဉ်ကျေးလိမ္မာသင်တန်းကို ပို့ကြပါတယ်။ အချို့ကတော့ အစိုးရ/ပုဂ္ဂလိက အခြေခံစာသင်ကျောင်းအပြီး ညနေပိုင်းနဲ့ စနေတနင်္ဂနွေကျောင်းပိတ်ရက် ပုံမှန်ပို့ကြပြီး၊ အများစုကတော့ နွေရာသီကျောင်းပိတ်ရက်ရှည်မှာ ပို့ကြပါတယ်။

အဲ့ဒီ့သင်တန်းတွေဟာ ဗလီဝတ်ကျောင်းတော် သို့မဟုတ် သီးသန့်ဖွင့်ထားတဲ့ ဘာသာရေးအခြေခံ စာသင်ကျောင်းနေရာတွေမှာ ဖွင့်လှစ်ပါတယ်။

အချို့ ငွေကြေးတတ်နိုင်သူ၊ သားသမီးကို မျက်ကွယ်မပို့လိုသူ စသဖြင့် အကြောင်းအမျိုးမျိုးနဲ့ ဘာသာရေးဆရာ ဆရာမ ကို အိမ်ခေါ် အချိန်ပိုင်း သင်တန်းပေးခိုင်းတာမျိုးလည်း ရှိကြပါတယ်။

သင်ရိုးက ကွဲပြားမှုတွေ ရှိနေပေမယ့် အဓိကကျောရိုးကတော့ ကုရ်အာန်ကျမ်းမြတ်ကို ဌာန်ကရိုဏ်းကျ ရွတ်ဖတ်နည်း အခြေခံ၊ အစ္စလာမ့်ယုံကြည်ချက်နှင့် ကျင့်ဝတ် အခြေခံများ၊ စနစ်တကျဝတ်ပြုနည်း၊ တမန်တော်မြတ် မုဟမ္မဒ်သခင်(ကိုယ်တော့်အား ငြိမ်းချမ်းပါစေကြောင်း စလာမ်မေတ္တာပို့သအပ်ပါသည်)ရဲ့ အတ္ထုပ္ပတ္တိအကျဉ်းစတာတွေပဲ ဖြစ်ပါတယ်။

‘မြန်မာမွတ်စလင်မ်တွေ စိုးရမ်ပူပန်’

အဲ့တော့ မြန်မာမွတ်စလင်မ်တွေရဲ့ စောဒကက ဘာသာရေးလွတ်လပ်ခွင့်အောက်မှာ အိမ်မှာ ယဉ်ကျေးလိမ္မာသင်တန်းလေးတောင်ပေးလို့ မရဘူးလားပေါ့၊ စိုးရိမ်မှုကတော့ ဒါဟာ ဒီမိုကရေစီခေတ်ပြောင်းမှာ လူနည်းစုမွတ်စလင်မ်တွေအပေါ် ထပ်မံကန့်သတ်ချုပ်ချယ်မှု ဖိနှိပ်မှုတွေရဲ့ ခြေလှမ်းတစ်လှမ်းလား၊ နောက်ခြေလှမ်းတွေက ဘာတွေ ဖြစ်မလဲဆိုတာပါ။

‘ညွှန်ကြားချက် နောက်ကွယ်အကြောင်းတရား’

အစိုးရနဲ့ အာဏာပိုင်တွေရဲ့ ဒီညွှန်ကြားချက်နဲ့ လုပ်ဆောင်ချက်အရွေ့နောက်ကွယ်က ရည်ရွယ်ချက်ကို အတိအကျ မသိနိုင်ပါ။

မျှမျှတတတွက်ဆကြည့်ရရင်တော့ စိုးရိမ်မှုရော စေတနာရော နှစ်ခုစလုံးပါမယ်လို့ မြင်ပါတယ်။ လူနည်းစုဘာသာတရားတွေ အပေါ် အထူးသဖြင့် အစ္စလာမ်ပေါ့၊ ပိုမို ထိန်းချုပ်လိုပြီး တစ်ဖက်ကလည်း မြန်မာမှုပြု ပုံစံနဲ့ သွားစေလိုတာမျိုး ဖြစ်နိုင်ပါတယ်။

စိုးရိမ်မှုကတော့ အစ္စလာမ့်နာမည်အောက်မှာ အစွန်းရောက်ခြင်းပေါ့။ လက်ရှိ အမျိုးသားခေါင်းဆောင်လို့ လူအများစု အသိအမှတ်ပြုထားတဲ့ နိုင်ငံတော်အတိုင်ပင်ခံ အန်တီစု ကိုယ်တိုင်က ကမ္ဘာ့နေရာအချို့မှ ဖြစ်ပျက်နေတဲ့ အစွန်းရောက်အကြမ်းဖက်မှုတွေနဲ့ ပတ်သက်ပြီး ဒီမှာလည်း စိုးရိမ်မှုတွေ အထိုက်အလျောက်ရှိနေတယ် ဆိုတဲ့ ပုံစံမျိုး ပြောဖူးပါတယ်။

စေတနာကတော့ မြန်မာ့မြေက မြန်မာမွတ်စလင်မ်တွေအတွက် မြန်မာမှုပြု အစ္စလာမ်ပုံစံကို ယှဉ်သန်စေလိုတာမျိုးလို့ အကောင်းမြင်ကြည့်ရမှာပါ။

‘ချဉ်းကပ်မှု လမ်းကြောင်း မှန်စေ’

စိုးရိမ်မှုနဲ့ အဲ့ဒီ့အပေါ် အကောင်အထည်ဖော်ဆောင်ရွက်ခြင်း အမှန်တကယ်အောင်မြင်ဖို့ ဒီစိန်ခေါ်မှုအပေါ်မှာ ချဉ်းကပ်တဲ့ လမ်းကြောင်း မှန်ကန်ဖို့ လိုအပ်ပါမယ်။

ဘာသာရေး အစွန်းရောက်ခြင်းဟာ လွှဲမှားစွာ ဖွင့်ဆိုကောက်ချက်ဆွဲခြင်းနဲ့ ဘာသာရေးကို နိုင်ငံရေး လက်နက်အဖြစ်အသုံးချခြင်းတို့ဟာ အဓိက အကြောင်းတရားတွေပါ။ အဲ့ဒီအကြောင်းတရားတွေကို ဦးတည်စေတာကတော့ သက်ဆိုင်ရာဘာသာရေးကိုးကွယ်သူတွေရဲ့ နေ့စဉ်ဘဝအပေါ် သက်ရောက်နေတဲ့ နိုင်ငံရေး စီးပွားရေး လူမှုရေးစတဲ့ လူ့ဘဝအခြေခံအကြောင်းအချက်တွေပါပဲ။

အစိုးရတစ်ရပ် ဒါမှမဟုတ် အာဏာပိုင်အဖွဲ့အစည်းဟာ အယူဝါဒတစ်ခုကနေ အစွန်းရောက်ဝါဒ ရှင်သန်ခြင်း ဒါမှမဟုတ် အစွန်းရောက်ဝါဒီတွေ ပေါ်လာမှာ စိုးရိမ်တယ်၊ အဲ့ဒါကို တားဆီးလိုတဲ့ စေတနာမှန် စေတနာကောင်းရှိတယ်ဆိုရင် အပေါ်က ဖော်ပြထားတဲ့ အကြောင်းတရားတွေဆီကို ရဲရဲဝံ့ဝံ့သွားဖို့ ဖြေရှင်းဖို့လိုပါမယ်။

ကျွန်တော် မြန်မာနိုင်ငံမှာ ဘယ်ဘုရားမှ မပွင့်ခဲ့ပါ၊ လူများစုသုံး မြန်မာ(ဗမာ)စကားဟာလည်း ဘယ်အလင်းပြပုဂ္ဂိုလ်ရဲ့ မိခင်ဘာသာစကားမှ မဖြစ်ခဲ့ပါ။

အဲ့လို့အခြေအနေမှာ လူများစုကိုးကွယ်တဲ့ ဗုဒ္ဓဘာသာမှာသည် လူနည်းစု ကိုးကွယ်တဲ့ ဘဟာအီဘာသာထိ ဘာသာတရားကို မြန်မာလို သီးသန့် သင်ကြားဖို့ဆိုတာမျိုးထက် ဘာသာသာသနာရဲ့ အဓိက ဘာသာတရားကို မြန်မာဘာသာနဲ့ တွဲဖက်သင်ကြားရန်ဆိုတာမျိုးက ပိုလက်တွေ့ကျ အပေါင်းဆန်ပါလိမ့်မယ်။

ပါဠိနဲ့ မြန်မာ၊ လက်တင် သို့မဟုတ် အင်္ဂလိပ်နဲ့ မြန်မာ၊ သင်္ကရိုက်နဲ့ မြန်မာ၊ အရဗီနဲ့ မြန်မာစသည်ပေါ့။

ဘာသာရေးသင်ရိုးတစ်ခုကို စီစစ်သုံးသပ်တယ်ဆိုရာမှာ စံတစ်ခုလိုလာပါပြီ။ စံကတော့ မှန်ကန်စွာ ဖွင့်ဆိုထားတဲ့ သင်ကြားချက်တွေဆိုတာပေါ့။

အဲ့ဒီ့မှာ စိန်ခေါ်မှုက ဘာသာသာသနာတွေဟာ တစ်ခုနဲ့ တစ်ခု မတူလို့ဘဲ အမည်တွေကွဲနေပြီ၊ ကျင့်သုံးမှုတွေကွဲနေပြီ၊ ပန်းတိုင်တွေ ကွဲနေပြီ (တူညီတဲ့ အခြေခံကျင့်ဝတ်တွေ ရှိတာကလည်း အမှန်ပါ)။ အစ္စလာမ်က အလ္လာဟ်ရှင်မြတ်ကို ပြောတယ်၊ ခရစ်ယာန်က ထာဝရဘုရားသခင်ကို ပြောတယ်၊ တစ်ဖက်မှာ ထေရဝါဒဗုဒ္ဓဘာသာက အနတ္တကို ပြောတယ်။

အဲ့တော့ စံနှုန်းနဲ့ ပန်းတိုင် မတူတဲ့ ဘာသာတရားတွေမှာ ကိုယ့်စံနှုန်းနဲ့ သူ့သင်ရိုးကို စီစစ်တာ၊ သူ့စံနဲ့ ကိုယ့်သင်ရိုးကို စီစစ်တာဟာ လက်တွေ့မဆန်ပါ။ ဥပမာ အစ္စလာမ့်ယဉ်ကျေးလိမ္မာသင်ရိုးကို သင်ခွင့်ပြုဖို့ မပြုဖို့ စီစစ်ရာမှာ မှန်ကန်တဲ့ အစ္စလာမ့် ဖွင့်ဆို သင်ကြားချက်တွေကို စံထားဖို့လိုပါမယ်။

ဒီနှစ်ပိုင်းတွေမှာ ဘာသာတရားနဲ့ အစွန်းရောက်မှု ကျွန်တော်တို့နိုင်ငံအတွက်ရော အရှေ့တောင်အာရှဒေသတွင်းရော ကမ္ဘာမှာပါ ပြဿနာဟောင်းက အသစ်ပြန်ဖြစ်လာတဲ့ ငြင်းလို့မရတဲ့ စိန်ခေါ်မှုပါ။

လူပြိန်းကြိုက် ဘာသာရေးအခြေပြု နိုင်ငံရေးဆွယ်၊ ဘာသာအသီးသီးရဲ့ တရားပလ္လင်ထက် ဘာသာရေးဝတ်စုံ (အရေ)ခြုံ အမုန်းတရားတွေ ပေါ်ပေါ်ထင်ထင်ဟော အဲ့ဒီ့ရဲ့ နောက်ဆက်တွဲအနေနဲ့ ဘုရားတွေ အမည်ကြွေးကြော် သတ်ဖြတ်မှုတွေ ရှိနေတာဟာ ဝမ်းနည်းစွာနဲ့ အသိအမှတ်ပြုရမယ့် ဖြစ်ရပ်မှန်ပါ။

တရားဥပဒေစိုးမိုးရေးတာဝန်ခံဖြစ်တဲ့ အစိုးရနဲ့ အာဏာပိုင်ဟာ ပြည်သူကို ကျောသားရင်သား မခွဲခြားဘဲ စိုးရိမ်ဖို့ ဆောင်ရွက်ဖို့လိုပါမယ်။

လူနည်းစုဘာသာတရားတွေနဲ့ ဘာသာဝင်တွေကို ပစ်မှတ်ထားနေတဲ့ ခြိမ်းခြောက်နေတဲ့ အစွန်းရောက်သင်ကြားမှုတွေ သင်ရိုးတွေကိုလည်း အမှန်တကယ် စီစစ်ဆောင်ရွက်ပေးစေလိုပါတယ်။

အစိုးရအနေနဲ့ အစ္စလာမ့်ခေါင်းစဉ်အောက် အစွန်းရောက်ခြင်းကို စိတ်ပူကာကွယ်တာ အမှန်ဖြစ်ခဲ့ရင် ဝမ်းအသာဆုံးသူတွေက မြန်မာမွတ်စလင်မ်တွေနဲ့ ကမ္ဘာ့မွတ်စလင်မ်အများစုကြီး ဖြစ်ပါလိမ့်မယ်။

ကိုယ့်ဘာသာတရားကို တလွှဲအသုံးချပြီး နာမည်ပျက်စေတာကို ဘယ်စစ်မှန်တဲ့ ဘာသာဝင် ကျင့်သုံးသူ မှန်သမျှ မနှစ်မြို့လိုပါပဲ။

အစိုးရအနေနဲ့ အာဏာပိုင်တွေအနေနဲ့ ပွင့်လင်းမြင့်သာမှုနဲ့ လက်တွေ့ဆန်မှု ပိုချပြနိုင်မယ်ဆို မြန်မာမွတ်စလင်မ်တွေ နားလည်မှုအပြည့်နဲ့ ရင်ဖွင့်ကြို ပူးပေါင်းဆောင်ရွက်မယ်လို့ မြင်မိပါတယ်။

‘မြန်မာမွတ်စလင်မ်တို့ အဖြေရှာစို့’

မြန်မာမွတ်စလင်မ်တွေ အနေနဲ့ အစိုးရရဲ့ ဒီချဉ်းကပ်မှုကို ဘာသာရေးဖိနှိပ်မှုလို့ သတ်မှတ်ဖို့ စောလွန်းပြီး ဒီကောက်ချက်မျိုးဟာ အနုတ်ဆောင်လွန်းနေပါတယ်။

ရခိုင်ဒေသနဲ့ နေရာအချို့မှာ ပြဿနာကြီးကြီးမားမားတွေ ရှိနေပေမယ့်၊ လက်တွေ့ဘဝရဲ့ အခန်းကဏ္ဍအချို့မှာ ခွဲခြားဆက်ဆံခံရမှုတွေရှိနေပေမယ့် ကျွန်တော်တို့ရဲ့ ယုံကြည်ချက်နဲ့ ဘာသာရေးကျင့်သုံးမှုကို ပွင့်ပွင့်လင်းလင်းနဲ့ ဘောင်တစ်ခုအတွင်းက လွတ်လွတ်လပ်လပ် ကျင့်သုံးလို့ရနေသေးပါတယ်။

အဲ့တော့ အခုကိစ္စကို ဖိနှိပ်မှုဆိုတာမျိုးထက် အခက်အခဲဆိုတာမျိုးထက် စိန်ခေါ်မှုနဲ့ အခွင့်အလမ်းပုံစံ မျိုး ပြန်လည် ချဉ်းကပ်အဖြေရှာဖို့ လိုပါမယ်။

အစ္စလာမ့်တမန်တော်ရဲ့ သွန်သင်ချက်ကိုက အဆိုးထဲမှာ ဘာအကောင်းပါလဲ၊ အခက်အခဲထဲမှာ ဘာလွယ်ကူမှုပါလဲ အဲ့ဒီကနေ ချဉ်းကပ်အဖြေရှာတဲ့ ပုံစံမျိုးမို့ပါ။

အစ္စလာမ်ကို မှန်ကန်စွာ ဖွင့်ဆိုချဉ်းကပ်မှု စံရဲ့ ကျွမ်းကျင်မှုဟာ ကျွန်တော်တို့ အစ္စလာမ်ဘာသာဝင်တွေဆီမှာပဲ ရှိပါတယ်။

ကျွန်တော့်တို့ လူ့အသိုင်းဝိုင်းအနေနဲ့ ဒီကျွမ်းကျင်မှုကို ပညာရေးလူ့အဆောက်အဦး Institution တစ်ခုပုံစံနဲ့ အစိုးရနဲ့ အာဏာပိုင်တွေကို လက်တွဲဆောင်ရွက်ဖို့ ကမ်းလှမ်းညှိနှိုင်းတာမျိုးအတွက် အဆင့်သင့်ဖြစ်နေပြီလား။

ကျွန်တော် ရိုးရိုးသားသား သုံးသပ်မိသလောက် ကျောင်းတော်ဝါဒတစ်ခုချင်း တစ်ဦးချင်း ကျွမ်းကျင်မှုတွေ ရှိနေပေမယ့် မြန်မာမွတ်စလင်မ်တစ်ရပ်လုံးအတွက် ကိုယ်စားပြုရပ်တည်နိုင်မယ့် အစိုးရနဲ့ ညှိုနှိုင်းဆောင်ရွက်နိုင်လောက်တဲ့ စနစ်ကျတဲ့ အစ္စလာမ့်ပညာရေးစံ Institution တစ်ခု မတည်ဆောက်ထားရသေးပါ။

အခုတွန်းအားတစ်ခု လာပါပြီ၊ အဆင့်သင့် မဖြစ်သေးရင် ပြင်ဆင်သင့်ပါပြီ။

ဒါဝဟ်လို့ ခေါ်တဲ့ အစ္စလာမ့် သတင်းစကားပေးခြင်းဟာ အရှင့်တစ်ဆူတည်း သောဝ်ဟီးဒ်တရားကို သတင်းစကားပေးခြင်းဟာ အလွန်အရေးကြီးတဲ့ တာဝန်တစ်ရပ်ဖြစ်တဲ့ အပေါ် အစ္စလာမ့် အခြေခံသင်ကြားချက်တွေကို မြန်မာမှုပြုပြီး အာဏာပိုင်တွေကို တင်ပြခွင့်ရတာဟာ အင်မတန် ကောင်းမွန်တဲ့ အခွင့်ရေးပါ။ အလ္လာဟ်အရှင်မြတ်အား ကျေးဇူးတင်မိပါတယ်။

ကျွန်တော်တို့ ဘာသာရေးခေါင်းဆောင် အီမာမ်များနဲ့ ဘာသာရေးဆရာ မော်လဝီ မုဖ်သီ ကာရီ ဟာဖိဇ်များမှာ

(** အီမာမ် = ရှေ့ဆောင်၊ မော်လဝီ = ကုရ်အာန်ကျမ်းတော်ကိုအဓိပ္ပါယ်နှင့်တကွနားလည် ဘာသာရေး အခြေခံပညာရပ်များ ကျွမ်းကျင်တတ်မြောက်ထားတဲ့ သူ၊

** မုဖ်သီ= မော်လဝီတန်းပြီးနောက် အဆင့်မြင့်တန်းတက်ရောက်ပြီး ဘာသာရေးဓမ္မသတ် ဆုံးဖြတ်ချက်များပေးနိုင်သူ၊

** ကာရီ = ကုရ်အာန်ကျမ်းတော်ကို တမန်တော်မြတ်မှ ဆရာဆက် ဌာန်ကရိုဏ်းစနစ်တကျ ရွတ်ဖတ်နိုင်အောင် လေ့ကျင့်သင်ကြားထား သူ၊

** ဟာဖိဇ်= ကုရ်အာန်ကျမ်းအာဂုံဆောင်ထားသူ)

ဘာသာရေးရော မြန်မာစာပေပါ ကျွမ်းကျင်စွာ တတ်မြောက် ပြန်လည်ပို့ချ ဟောပြောနိုင်သူ အချို့ရှိသော်လည်း၊ အများစုမှာ လက်ရှိ (အဓိက) အူရဒူနှင့် အရဗီ အသားပေး ဘာသာရေးပညာစနစ်ကြောင့် မြန်မာစာ အားနည်းမှု အထိုက်အလျောက်ရှိနေတာဟာ အမှန်တရားပါ။

မိမိတို့သင်ကြားတတ်မြောက်ထားတဲ့ ဘာသာရေးအသိပညာကို မိမိတို့ပတ်ဝန်းကျင်အသိုင်းအဝိုင်းကို ဖြန့်ဝေ အလုပ်အကျွေးပြုဖို့ဆိုရာမှာ ကိုယ့်ဒေသ ကိုယ့်ပတ်ဝန်းကျင်မှာ လူများစုကြီး နေ့စဉ်ပြောနေတဲ့ ဘာသာစကားရဲ့ အရေးပါမှုကို မျက်ကွယ်ပြုလို့ မရပါ။

အကယ်၍ မလွဲမရှောင်သာ မြန်မာဘာသာစကားကို အဓိကထားရမယ်ဆိုရင် bottom up သဘောတရားအရ အခြေခံအဆင့်မှာ တပည့်တွေကို ကလေးငယ်တွေကို သင်ကြားရတော့မယ်ဆိုတော့ အဆင့်မြင့်ပိုင်းမှာ ဆရာတွေ မွေးထုတ်ရေးအပိုင်းမှာ မြန်မာစာပေဟာ မလေ့လာလို့ မရတဲ့ ပုံစံတစ်ခုဖြစ်လာတော့ပါမယ်။

အဲ့ဒီ့ရဲ့ ကောင်းကျိုးကတော့ ကျွန်တော်တို့ဘာသာရေးဆရာတွေအနေနဲ့ မိမိရဲ့ ပတ်ဝန်းကျင် လူများစုကြီးကို မိမိတို့ရဲ့ ပညာတွေ ပိုမိုဖြန့်ဝေလာနိုင်မယ်၊ ပိုမို အလုပ်အကျွေးပြုလာနိုင်တော့မယ်ဆိုတာပါပဲ။ အလ္လာဟ်အရှင်မြတ်အား ကျေးဇူးတင်မိပါတယ်။

နိုင်ငံတော်ရဲ့ တရားဥပေဒအစောင့်အရှောက်အတွင်းမှာ ယဉ်ကျေးလိမ္မာကျောင်းတွေကို တရားဝင် ဖွင့်ခွင့်ရလာမယ်။ ကျွန်တော်တို့ ကလေးငယ်တွေကို ဒီတရားဝင်ဖွင့်ခွင့်ရလာမယ့် ကျောင်းတွေမှာ ပုံမှန်တက်ရောက်နိုင်ဖို့ ကျောင်းတက်မှန်စေဖို့ အရင်က အကြောင်းအမျိုးမျိုးနဲ့ ဘာသာရေးအခြေခံတွေနဲ့ ဝေးနေတဲ့ ကလေးငယ်တွေလည်း ပိုမိုတက်ရောက်လာနိုင်ဖို့ အဖက်ဖက်ကနေ အဆင်ပြေအောင် စီစဉ် နှိုးဆော် ဆောင်ရွက်တာတွေ လုပ်ရပါမယ်။ ဒါဟာလည်း အမှန်တကယ်တော့ အခွင့်လမ်းကောင်းတစ်ခုပါ။

တစ်ဖက်မှာ အိမ်တွေမှာ သင်ခွင့်မရှိဘူးလားဆိုတဲ့ အချက်ပါ။ မိသားစုတွင်း ဘာသာရေးနဲ့ ယဉ်ကျေးလိမ္မာစေဖို့ မိဘနဲ့ သားသမီး၊ အဘိုးအဘွားနဲ့ မြေးမြစ်၊ ဦးလေးအဒေါ်နဲ့ တူ၊တူမကြားကို ကန့်သတ်ချုပ်ချယ်တဲ့ ဥပဒေမျိုး အခုလည်း မရှိပါ နောင်လည်း မရှိပါ။ အဲ့တော့ ဆရာကိုသက်သက်သာ အားကိုးပြီး မိသားစုတွင်း ကိုယ်တိုင် ဘာသာရေးလေ့လာအားနည်း သင်ပေးသင်ယူနည်းနေတဲ့ ကျွန်တော်တို့ မြန်မာမွတ်စလင်မ်အသိုင်းအဝိုင်းအတွက် ဒါဟာ အခွင့်အလမ်းကောင်းပါ။

ငြီးငြူ အပြစ်ပြောနေမယ့်အစား မိသားစု စာဖတ်ဝိုင်းနဲ့ ဘာသာရေးသင်ပေးသင်ယူခြင်း အလေ့အကျင့်တွေကို ပြန်ရှင်သန်စေဖို့ ဒီနေ့ပဲ စလိုက်ပါ။

နည်းပညာနဲ့ သတင်းအချက်အလက်ခေတ်ကြီးမှာ ကြီးငယ်လူတိုင်း ဖေစ့်ဘုခ်ပွတ်နေတဲ့ ခေတ်မှာ ရပ်ကွက် ဒေသ နိုင်ငံမပြောနဲ့ ကမ္ဘာဟာ ရွာဖြစ်နေပါပြီ။

ကမ္ဘာ့ရှေ့ခြမ်းက အိမ်မှာထိုင်နေပြီး ကမ္ဘာ့အနောက်ခြမ်းက ဘွဲ့ကို လှမ်းလေ့လာသင်ယူ ဘွဲ့ယူတဲ့ ခေတ်ကြီးမှာ အိမ်ကို ဆရာခေါ်လို့ မရလို့ ထိုင်ငြီးငြူနေရင်တော့…။

တွန်းအားတစ်ခု မရှိရင် ထိုင်နေ ငြိမ်နေတတ်တဲ့ လူ့အသိုင်းအဝိုင်းတစ်ခုအတွက် ဒီစိန်ခေါ်မှုဟာ လမ်းသစ်တွေဖောက်ဖို့ အားတွေပါပဲ။

‘နိဂုံး သို့မဟုတ် ခြေလှမ်းငယ်’

ဒီအရေးကိစ္စမှာ အစိုးရအာဏာပိုင်တွေနဲ့ ကျွန်တော်တို့ မြန်မာမွတ်စလင်မ်ပြည်သူတွေနဲ့ အလယ်ဆုံမှတ်မှာ ဆုံကြဖို့ပါပဲ၊ ဆုံမှတ်ကို သူ့နဲ့ နီးရာ ကိုယ်နဲ့ နီးရာ ဆွဲနေရင်တော့ အလုပ်မဖြစ်ပါ။

အစိုးရအာဏာပိုင်တွေဖက်က ပိုမိုပွင့်လင်းမြင်သာ လက်တွေ့ကျ မျှတမှုနဲ့ ညွှန်ကြားမယ် မြန်မာ မွတ်စလင်မ်ပြည်သူတွေကလည်း စိန်ခေါ်မှုကယူဆောင်လာမယ့် အခွင့်လမ်းပုံစံနဲ့ အပေါင်းဆောင် ချဉ်းကပ်မယ်ဆိုရင် ဒီကိစ္စဟာ အစိုးရနဲ့ ပြည်သူအကြား နီးကပ်တဲ့ ပူးပေါင်းဆောင်ရွက်မှုတစ်ခုဖြစ်လာပြီး ညီညွတ်ငြိမ်းချမ်း သဟဇတဖြစ်မှုတွေနဲ့ ဒီမိုကရေစီပြည့်ဝနိုင်ငံတော်ဆီသွားတဲ့ ခြေလှမ်းငယ် တစ်ခုဖြစ်လာမှာပါ။