မြန်မာချေးငွေကိစ္စအတွက် ထိုင်းဝန်ကြီးချုပ်ဟောင်း ၀ရမ်းထုတ်ခံရ

ဇူလိုင် ၄၊ ၂၀၁၈
M-Media

– မြန်မာနိုင်ငံကို နှစ်ရှည်ချေးငွေပေးရာမှာ မိသားစုလုပ်ငန်းကို မျက်နှာသာပေးခဲ့တယ်ဆိုတဲ့ စွဲချက်နဲ့ ၀န်ကြီးချုပ်ဟောင်း သက်ဆင် ရှင်နာဝပ်ထရာကို ထိုင်းတရားရုံးချုပ်က ဒီကနေ့မှာ ဖမ်းဝရမ်း ထုတ်လိုက်ပါတယ်။

သက်ဆင်ဟာ ၂၀၀၆ ခုနှစ် စစ်တပ်က အာဏာသိမ်းပြီးနောက်ပိုင်း နိုင်ငံရပ်ခြားမှာ နေထိုင်နေသူ ဖြစ်ပါတယ်။ ၀န်ကြီးချုပ်တာဝန် ထမ်းဆောင်နေစဉ် ၂၀၀၃ ခုနှစ်က သူ့ရဲ့ဇနီးဟာ ဘန်ကောက်မြို့က အစိုးရပိုင် မြေကွက်တစ်ခုကို ၀ယ်ရာမှာ မသမာမှုတွေ ရှိခဲ့တယ်ဆိုတဲ့ စွဲချက်အတွက် ၂၀၀၈ ခုနှစ်မှာ ထောင်ဒဏ် ၂ နှစ်ချမှတ်ခြင်းကိုလည်း ခံထားရပါတယ်။

အခု ထောင်ဒဏ် ထပ်ချခံရတဲ့အမှုဟာ ၂၀၀၄ ခုနှစ်က ထိုင်းနိုင်ငံရဲ့ သွင်းကုန်-ထုတ်ကုန်ဘဏ် Exim Bank ကနေ မြန်မာအစိုးရကို ဂြိုဟ်တုဆက်သွယ်ရေးစနစ် တည်ဆောက်ရေးအတွက် ဘတ် ၄ ဘီလီယံ ချေးခဲ့တဲ့ကိစ္စ ဖြစ်ပါတယ်။ ၁၂ နှစ်ကြာ ပြန်ဆပ်ရမယ့် အဲဒီချေးငွေရဲ့ အတိုးနှုန်းဟာ ဘဏ်ရဲ့ operating cost အောက် ၃ ရာခိုင်နှုန်းနဲ့ ချေးတာ ဖြစ်ပါတယ်။

မြန်မာအစိုးရက သက်ဆင်မိသားစု ရှယ်ယာအများစု ပိုင်ဆိုင်တဲ့ Shin Satellite ကနေ ဂြိုဟ်တုဆက်သွယ်ရေးပစ္စည်းတွေ ၀ယ်ယူခဲ့တာကြောင့် ဒီချေးငွေကိစ္စမှာ သက်ဆင်မိသားစုက အမြတ်ထွက်ခဲ့ပါတယ်။ ဘဏ်ကတော့ ဘတ် သန်းပေါင်း ၆၇၀ ဆုံးရှုံးခဲ့ပါတယ်။

Exim ဘဏ်က မြန်မာနိုင်ငံအတွက် Credit line ကို ဘတ် ၃ ဘီလီယံ သတ်မှတ်ထားပေမယ့် သက်ဆင်က ဘတ် ၁ ဘီလီယံ ထပ်တိုးပေးဖို့ ပြောခဲ့ပြီး အတိုးနှုန်းကိုလည်း ၅.၅ ရာခိုင်နှုန်းကနေ ၃ ရာခိုင်နှုန်းကို ချပေးခဲ့ပါတယ်။

ထိုင်း အမျိုးသားခြစားမှုတိုက်ဖျက်ရေး ကော်မရှင်က ၂၀၀၈ ခုနှစ်မှာ ဒီအမှုကို ရုံးတင်ခဲ့ပေမယ့် သက်ဆင် တိုင်းပြည်မှာမရှိတဲ့အတွက် မစစ်ဆေးနိုင်ခဲ့ပါဘူး။ ဒါပေမယ့် ပြီးခဲ့တဲ့နှစ်မှာ အသက်ဝင်လာတဲ့ ရာဇ၀တ်မှုဆိုင်ရာ လုပ်ထုံးလုပ်နည်း အသစ်အရ အမှုကို ပြန်လည်စစ်ဆေးခဲ့ပြီး အခုလို ဖမ်းဝရမ်း ထုတ်ခဲ့တာပါ။

ဒါပေမယ့် ၃ လထပ်စောင့်မှာဖြစ်ပြီး အောက်တိုဘာလ ၃၁ ရက်နေ့မှ သက်သေတွေကို စစ်ဆေးမှာ ဖြစ်ပါတယ်။

Ref : Bangkok Post