ပိတ်မိ ထိုင်းကလေးများအား ဂူပြင်ထုတ်ရေးလုပ်ငန်း စတင်

ဇူလိုင် ၈၊ ၂၀၁၈
M-Media

ဂူထဲဝင်ရောက်ကယ်ဆယ်မည့် ထိုင်း နေဗီဆီးလ် တပ်ဖွဲ့ဝင်များ

– ထိုင်းနိုင်ငံမြောက်ပိုင်း ချန်ရိုင်းပြည်နယ်က ထန်လွန်ဂူထဲမှာ ပိတ်မိနေတဲ့ လူငယ် ၁၂ ဦးနဲ့ သူတို့ရဲ့ နည်းပြတို့ကို ဂူပြင်ထုတ်ရေး လုပ်ငန်းကို ထိုင်း Navy Seal တပ်ဖွဲ့က ဒီကနေ့မှာ စတင်ခဲ့ပါတယ်။

ကလေးတွေရဲ့ အခြေအနေ၊ ဂူထဲက ရေအနေအထား၊ ရာသီဥတု စတဲ့ အချက်အတွေကို တွက်ချက်ပြီးတဲ့နောက် အပြင်ထုတ်ဖို့ စီစဉ်ခဲ့တာဖြစ်ပြီး စစ်ဆင်ရေးအမည်ကို D-Day လို့ပေးထားကြောင်း ကယ်ဆယ်ရေးလုပ်ငန်းဆိုင်ရာ အကြီးအကဲ Narongsak Osottanakorn က ပြောကြားခဲ့ပါတယ်။

ထိုင်းစံတော်ချိန် ည ၉ နာရီ (မြန်မာစံတော်ချိန် ည ၈ နာရီခွဲ) မှာ ၁၃ ယောက်စလုံး အပြင်ရောက်မယ်လို့ မျှော်မှန်းထားပါတယ်။

ထိုင်းစံတော်ချိန် ည ၇ နာရီ (မြန်မာစံတော်ချိန် ညနေ ၆ နာရီခွဲ) မှာ ကလေးငယ်နှစ်ဦး ဂူပြင်ရောက်လာခဲ့ပြီး ဆေးဝါးကုသမှုတွေ ခံယူနေတယ်လို့ ချန်ရိုင်း ကျန်းမာရေး ဌာနက အတည်ပြု ပြောဆိုပါတယ်။

အဲဒီကလေးငယ် ၁၂ ဦးနဲ့ ဘောလုံးနည်းပြတို့ဟာ ဇွန်လ ၂၃ ရက်နေ့က ထန်လွန်ဂူထဲ ၀င်ရောက်သွားခဲ့ပြီးတဲ့နောက် ဂူထဲရေတွေဝင်ကာ ပြန်မထွက်နိုင်ဘဲ ပိတ်မိခဲ့တာ ဖြစ်ပါတယ်။ ထိုင်းအာဏာပိုင်တွေက ကယ်ဆယ်ရေးလုပ်ငန်းတွေကို အပြင်းအထန် ဆောင်ရွက်ခဲ့ပြီး ပြီးခဲ့တဲ့ တနင်္လာနေ့မှာ ဂူထဲက သူတို့ရှိရာနေရာကို ရှာတွေ့ခဲ့ပါတယ်။

Ref : CNA