ပါကစ္စတန်တွင် ရွေးကောက်ပွဲမဲဆွယ်သည့် လူအုပ်အတွင်း အသေခံဗုံးခွဲမှုများ ဖြစ်ပွား

ဇူလိုင် ၁၄၊ ၂၀၁၈
M-Media

ဗုံးခွဲမှုကြောင့် ဒဏ်ရာရသူကို ဆေးရုံသို့ ယူဆောင်လာမှု မြင်ကွင်း

– ရွေးကောက်ပွဲနီးလာတဲ့ ပါကစ္စတန်မှာ အခုရက်ပိုင်းအတွင်း ဗုံးခွဲမှုတွေ ဖြစ်ပွားခဲ့တာကြောင့် အနည်းဆုံး လူ ၁၃၀ လောက် သေဆုံးခဲ့ပါတယ်။

ဘာလိုချစ္စတန်ပြည်နယ်က ဒရ်ဂါမြို့မှာ BAP ပါတီက ရွေးကောက်ပွဲမဲဆွယ်ရေး ချီတက်လမ်းလျှောက်မှုကို လုပ်ဆောင်နေစဉ် မနေ့က အသေခံဗုံးခွဲသမားတစ်ဦးက ဗုံးခွဲခဲ့တာကြောင့် အနည်းဆုံး ၁၂၃ ယောက် သေဆုံးခဲ့ပါတယ်။

ဒီနေ့မနက် ဘာလိုချစ္စတန်မှာပဲ နောက်ထပ် အသေခံဗုံးခွဲမှုတစ်ခု ဖြစ်ပွားခဲ့ပြီး လူ ၆ ဦး ထပ်မံ သေဆုံး ခဲ့ပါတယ်။

ပေါက်ကွဲမှုတွေကြောင့် လူအများအပြား ဒဏ်ရာရရှိခဲ့ပါတယ်။

ဘာလိုချစ်စ္စတန်ပြည်နယ်မှာ LeJ စစ်သွေးကြွးအဖွဲ့ဟာ အဓိကအားဖြင့် ရှီအာမွတ်စလင်တွေကို ပစ်မှတ်ထား တိုက်ခိုက်လေ့ရှိပြီး၊ ပါကစ္စတန်ကနေ ခွဲထွက်လိုတဲ့ ဘာလို့ခ်ျတိုင်းရင်းသား လက်နက်ကိုင် တွေကလည်း အရင်က ရွေးကောက်ပွဲဝင်မယ့်သူတွေကို တိုက်ခိုက်လေ့ရှိပါတယ်။

မနေ့ကနဲ့ ဒီနေ့ တိုက်ခိုက်မှုတွေကို ဘယ်အဖွဲ့လုပ်လဲဆိုတာကိုတော့ ထုတ်ပြန်ပြောကြားခြင်း မရှိသေးပါဘူး။

Ref: Aljazeera