စနေနေ့ ကမ္ဘာ့ဖလား သတင်းများ

ဇူလိုင် ၁၄၊ ၂၀၁၈
M-Media

အင်္ဂလန်ကိုအနိုင်ယူကာ ဘယ်လ်ဂျီယံအသင်း ကမ္ဘာ့ဖလား တတိယဆု ဆွတ်ခူး
==========
ဒီနေ့ည ကစားခဲ့တဲ့ ဘယ်လ်ဂျီယံနဲ့ အင်္ဂလန်တို့ရဲ့ ကမ္ဘာ့ဖလား တတိယနေရာလုပွဲမှာ ဘယ်လ်ဂျီယံအသင်းက ၂ ဂိုးဂိုးမရှိနဲ့ အနိုင်ရရှိသွားပါတယ်။ ပွဲအစ ၄ မိနစ်မှာပဲ မူနီယာက ဘယ်လ်ဂျီယံအသင်းအတွက် ဦးဆောင်ဂိုးသွင်းပေးပြီး ၈၂ မိနစ်မှာ ဟဇာ့ဒ်က ဒုတိယဂိုး သွင်းယူပေးခဲ့ပါတယ်။ ဘယ်လ်ဂျီယံဟာ သမိုင်းတစ်လျှောက် ကမ္ဘာ့ဖလားမှာ အမြင့်ဆုံးအဆင့် ရရှိခဲ့တာ ဖြစ်ပါတယ်။ အင်္ဂလန်ကတော့ ၁၉၉၀ ပြည့်နှစ်ကလိုပဲ စတုတ္ထနဲ့ ကျေနပ်ခဲ့ရပါတယ်။

ကမ္ဘာ့ဖလားဗိုလ်စွဲလျှင် ရာကီတစ် နဖူးတွင် တက်တူးထိုးမည်
==================
ဒီနေ့ညကစားမယ့် ကမ္ဘာ့ဖလား ဗိုလ်လုပွဲမှာ သူတို့အသင်းသာ အနိုင်ရခဲ့မယ်ဆိုရင် နဖူးမှာ တက်တူးထိုးမယ်လို့ ခရိုအေးရှားကွင်းလယ်လူ အိုင်ဗန် ရာကီတစ်က အရွှန်းဖောက် ပြောကြားလိုက်ပါတယ်။ သမိုင်းမှတ်တိုင်သစ် စိုက်ထူဖို့ လက်တစ်ကမ်းသာလိုတော့တဲ့ ခရိုအေးရှားအသင်းဟာ အစဉ်အလာကြီးမားတဲ့
ပြင်သစ်ကို ရင်ဆိုင်ရမှာပါ။ လူကာမိုဒရစ်နဲ့အတူ ခရိုအေးရှားအသင်းရဲ့ အဓိကကစားသမား ဖြစ်နေတဲ့ ရာကီတစ်က ကမ္ဘာတစ်ဝှမ်းက ဘောလုံးပရိသတ်တွေရဲ့ ချီးကျူးစကားတွေကို ရရှိခဲ့ပြီး အလွန်ပျော်ရွှင်ရတယ်လို့ ပြောကြားခဲ့ပါတယ်။

နေးမာကိုဝေဖန်မှု လွန်လွန်းသည်ဟု ဂီဘာတို ဆေးလ်ဗားပြော
===========
တိုက်စစ်မှူး နေးမားကို ဝေဖန်မှုတွေဟာ လွန်လွန်းတယ်လို့ ဘရာဇီးလ်ကစာသမားဟောင်း ဂီဘာတိုဆေးလ်ဗားက ပြောကြားလိုက်ပါတယ်။ ကမ္ဘာ့ဖလား မတိုင်ခင်လေးမှာမှ ဒဏ်ရာက သက်သာလာတဲ့ နေးမာဟာ ကွာတားမှာပြုတ်သွားတဲ့ ဘရာဇီးလ်အသင်းအတွက် ၅ ပွဲကစားပြီး ၂ ဂိုးသာ သွင်းယူနိုင်ခဲ့ပါတယ်။ နေးမာကို ဘရာဇီးလ် ကစားသမားဟောင်းတွေဖြစ်တဲ့ ဘက်ပ်တစ္စတာ၊ ရော်နယ်ဒိုတို့အပါအ၀င် တော်တော်များများက ဝေဖန်ခဲ့ကြပါတယ်။ ဆေးလ်ဗားက နေးမာဟာ တိုးတက်ဆဲကစားသမားဖြစ်ပြီး သင်ယူစရာတွေ အများကြီး ရှိသေးကြောင်း၊ ဝေဖန်တာကို အတိုင်းအတာတစ်ခုအထိ လက်ခံပေမယ့် နေးမာကိစ္စကတော့ လွန်လွန်းနေကြောင်း ပြောဆိုခဲ့ပါတယ်။

Ref: Goal