မံမီပြုလုပ်နည်းကို ဖော်ထုတ်နိုင်မည့် ရှေးဟောင်းနေရာတစ်ခု အီဂျစ်တွင် တွေ့ရှိ

ဇူလိုင် ၁၅၊ ၂၀၁၈
M-Media

– အီဂျစ်က ရှေးဟောင်း သုတေသန ပညာရှင်တွေဟာ ရှေးဟောင်း ဂူသင်္ချီုင်းတစ်ခုနဲ့ အလုပ်ခန်းတစ်ခုကို တွေ့ရှိခဲ့ပြီး အဲဒီကပစ္စည်းတွေကို လေ့လာမှုကနေတစ်ဆင့် မံမီရုပ်ပြုလုပ်မှုရဲ့ လျှို့ဝှက်ချက်တွေကို ဖော်ထုတ်နိုင်မယ်လို့ မျှော်လင့်နေကြပါတယ်။

မြို့တော် ကိုင်ရိုတောင်ဘက် ပိရမစ်ကြီးတွေရှိရာ နေရာအနီးမှာ တွေ့ရှိခဲ့တာဖြစ်ပြီး နှစ်ပေါင်း ၂၅၀၀ သက်တမ်းရှိမယ့် ဂူသင်္ချီုင်းထဲမှာ မံမီရုပ်တွေ အပါအ၀င် မံမီရုပ်ပြုလုပ်ရာမှာ အသုံးပြုတဲ့ မျက်နှာဖုံးတွေ၊ အဆီတွေကိုပါ တွေ့ရှိခဲ့ကြပါတယ်။

ပညာရှင်တွေကတော့ ဒါဟာ အရေးပါတဲ့ တွေ့ရှိမှုတစ်ခု ဖြစ်တယ်လို့ ပြောကြားခဲ့ကြပါတယ်။

ကျောက်ဆစ်ရုပ်ထုငယ်လေးတွေ၊ ခရား၊ မြေအိုးတွေကိုလည်း ဂူရဲ့အခန်းတွေထဲမှာ တွေ့ခဲ့ရပါတယ်။ ဒါတွေအားလုံးဟာ မံမီရုပ်လုပ်ရာမှာ အသုံးပြုတာတွေ ဖြစ်ပါတယ်။

“မြေအိုးတွေကို အစုလိုက် တွေ့ရှိရမှုက ဒီဆီတွေထဲမှာ ဓာတုဗေဒအရ ဘာတွေပါဝင်နေလဲဆိုတာကို အတိအကျသိရဖို့ ကျွန်တော်တို့ရဲ့ လေ့လာဆန်းစစ်မှု လုပ်ငန်းအတွက် အခွင့်အလမ်းတစ်ခု ဖြစ်ပါတယ်” လို့ ဂူသင်္ချီုင်းများ ဖော်ထုတ်ရေး စီမံကိန်းအကြီးအကဲ ရာမဒန် ဘဒ်ရီ ဟူစိန်က ပြောကြားခဲ့ပါတယ်။

မံမီရုပ်လုပ်တဲ့ အလုပ်ခန်းဟာ အခုအချိန်အထိ တွေ့ရှိရသမျှထဲမှာ အကြီးဆုံးနဲ့ တန်ဖိုးအမြင့်ဆုံးဖြစ်ပြီး မံမီရုပ်တွေကို ဘယ်လိုလုပ်ဆောင်လဲဆိုတာ သိဖို့အတွက် အချိန်တစ်ခု လိုအပ်တယ်လို့လည်း သူက ဆိုပါတယ်။

သေဆုံးသူတွေကို မံမီရုပ်တွေအဖြစ် အသွင်ပြောင်းရာမှာ ရှေးဟောင်းအီဂျစ်တွေ အသုံးပြုတဲ့ ဆီတွေရဲ့ ဓာတုဗေဒဆိုင်ရာ ပါဝင်မှုတွေကို လေ့လာဖို့ အခုတွေ့ရှိတဲ့ အလုပ်ခန်းက အထောက်အကူ ဖြစ်စေမယ်လို့ ပညာရှင်တွေက မျှော်လင့်နေပါတယ်။

Ref: Press TV