အထောက်အထားမဲ့ နိုင်ငံခြားသားများအား ဖမ်းဆီးမှု မလေးရှား တိုးမြှင့်ဆောင်ရွက်မည်

ဇူလိုင် ၂၁၊ ၂၀၁၈
M-Media

– နိုင်ငံအတွင်း တရားမ၀င် ၀င်ရောက်လာသူတွေ ဖမ်းဆီးထိန်းသိမ်းမှုကို သြဂုတ်လ ၃၁ ရက်နေ့ကနေစပြီး တိုးမြှင့်ဆောင်ရွက်သွားမယ်လို့ မလေးရှား လူဝင်မှုကြီးကြပ်ရေးဌာန ညွှန်ကြားရေးမှူးချုပ် မူစတာဖာ အလီက သောကြာနေ့မှာ ပြောကြားလိုက်ပါတယ်။

တရားမ၀င် အလုပ်သမားတွေကို ခန့်ထားတဲ့ အလုပ်ရှင်တွေ၊ ဖွက်ထားပေးတဲ့သူတွေကိုပါ ဖမ်းဆီးသွားမယ်လို့ သူက ဆိုပါတယ်။

“3+1 အစီအစဉ်လို့ခေါ်တဲ့ ကိုယ်တိုင် လာအဖမ်းခံတဲ့ အစီအစဉ်တစ်ခုကို ကျွန်တော်တို့ စတင်ဆောင်ရွက်ထားပါတယ်။ ဒီအစီအစဉ်ဟာ တရားမ၀င်နိုင်ငံခြားသားတွေအားလုံး သူတို့ရဲ့ မူရင်းနိုင်ငံတွေကို ကိုယ့်သဘောဆန္ဒနဲ့ ပြန်နိုင်မှာဖြစ်ပါတယ်။ ဒါ့ကြောင့် သြဂုတ်လ ၃၀ ရက်နေ့အထိ သူတို့ ဒီလို လာရောက်အဖမ်းခံဖို့ အခွင့်အရေးရမှာဖြစ်ပြီး အဲဒီနောက်မှာ ကျွန်တော်တို့ ပိုမိုတင်းကြပ်သွားမှာပါ”

ဇူလိုင်လ ၁ ရက်နေ့က စတင်ခဲ့တဲ့ Op Mega စစ်ဆင်ရေးအတွင်း နိုင်ငံတစ်ဝှမ်း တရားမ၀င် ၀င်ရောက်သူ ၃၀၀၀ ကျော်လောက်ကို မလေးရှားက ဖမ်းဆီးထားပါတယ်။

တရားမ၀င် အလုပ်သမားတွေအနေနဲ့ ဖမ်းဆီးခံရပြီဆိုရင် အမည်ပျက်စာရင်းသွင်းကာ၊ ပြည်နှင်ဒဏ် ပေးခံရမှာဖြစ်ပြီး၊ တရားမ၀င် နိုင်ငံခြားသားတွေကို အလုပ်ခန့်တဲ့ အလုပ်ရှင်တွေဟာလည်း ထောင်ဒဏ်၊ ငွေဒဏ်၊ ကြိမ်ဒဏ်တွေ ခံရမယ်လို့ မလေးရှား လူဝင်မှုကြီးကြပ်ရေးဌာနက ကြေငြာထားပါတယ်။

Ref: CNA