အစ္စလာမ်ဘာသာဝင်များ အလွယ်တကူဝတ်ပြုနိုင်မည့် ဂျပန်က ရွေ့လျားဗလီ 

ဇူလိုင် ၂၆၊ ၂၀၁၈
M-Media

– ဂျပန်နိုင်ငံအလယ်ပိုင်းက အားကစားကွင်းတစ်ခု အပြင်ဘက်မှာ ရပ်ထားပြီး အဖြူရောင်နဲ့ အပြာရောင် စပ်ထားတဲ့ ထရပ်ကားကြီးတစ်စီးဟာ တစ်ဖြည်းဖြည်းနဲ့ ၀တ်ပြုရာနေရာတစ်ခု ဖြစ်လာပါတယ်။

ဒါဟာ ရွေ့လျား ဗလီဝတ်ကျောင်းတော်တစ်လုံး ဖြစ်ပါတယ်။

၂၀၂၀ အိုလံပစ် အားကစားပြိုင်ပွဲအတွက် ကမ္ဘာတစ်ဝှမ်းက ဧည့်သည်တွေကို ကြိုဆိုဖို့ ပြင်ဆင်နေတဲ့အချိန် တိုကျိုအခြေစိုက် အားကစားနဲ့ ယဉ်ကျေးမှုအခမ်းအနား ကျင်းပပေးတဲ့ ကုမ္ပဏီတစ်ခုဟာ မွတ်စလင် ခရီးသွားတွေ အဆင်ပြေစေဖို့အတွက် ထရပ်ကားနဲ့ ရွေ့လျားဗလီကို ဖန်တီးပေးခဲ့ပါတယ်။

အဲဒီစီမံကိန်းကို Yasu Project လို့ခေါ်ပြီး စီမံကိန်းစီအီးအို ယာဆူဟာရူ အီနိုယူက ၂၀၂၀ မှာ ဧည့်သည်တွေလာတဲ့အချိန် ဗလီတွေမလောက်မယ့်ကိစ္စဟာ နိုင်ငံတကာအသိုင်းအ၀ိုင်းရဲ့ အစိတ်အပိုင်းတစ်ခုဖြစ်ရေး နိုင်ငံအတွက် စိုးရိမ်စရာဖြစ်နေတယ်လို့ ပြောကြားခဲ့ပါတယ်။ သူ့ရဲ့ ရွေ့လျားဗလီတွေဟာ လိုအပ်ရင်လိုအပ်သလို တခြား အိုလံပစ်ကွင်းတွေဆီ သွားရောက်နိုင်မယ်လို့လည်း ဆိုပါတယ်။

“ပွင့်လင်းပြီး ဖော်ရွေတဲ့ ကျွန်တော်တို့နိုင်ငံဟာ ကျွန်တော်တို့ရဲ့ ဖော်ရွေပျူငှာမှုကို မွတ်စလင်တွေကိုလည်း မျှဝေခံစားချင်ပါတယ်” လို့ အီနိုယူက ပြောကြားခဲ့ပါတယ်။

ရွေ့လျားဗလီတွင် ၀တ်ပြုနေကြစဉ်

ပထမဆုံးရွေ့လျားဗလီကို အခုတစ်ပတ်အစောပိုင်းက တိုယိုတာမြို့ ‘တိုကျိုအားကစားကွင်း’ ရှေ့မှာ စတင်အသုံးပြုခဲ့ပါတယ်။ တိုယာတာမြို့ဟာ နာမည်ကျော် တိုယိုတာကားကုမ္ပဏီ ဌာနချုပ်တည်ရှိရာမြို့လည်း ဖြစ်ပါတယ်။

၂၅ တန် ထရပ်ကားကို အသွင်ပြောင်းထားတဲ့ အဲဒီ ရွေ့လျားဗလီက ကားတံးခါးကိုဖွင့်ပြီး ဘေးအကာတွေကို ဖြန့်ချလိုက်တဲ့အခါမှာ လူ ၅၀ လောက် ၀တ်ပြုနိုင်တဲ့ ၄၈ စကွဲယားမီတာအကျယ် အခန်းတစ်ခု ဖြစ်သွားပါတယ်။

ဝတ်ပြုဆုတောင်းမှုကို ကားထဲမှာ ပြုလုပ်ရမှာဖြစ်ပြီး ၀တ်မပြုခင် ကိုယ်လက် ဆေးကြောသန့်စင်မှုကို ကားရဲ့အပြင်ဘက်မှာ စီစဉ်ပေးထားပါတယ်။

၂၀၀၄ ခုနှစ် အိန္ဒိယသမုဒ္ဒရာက ဆူနာမီဒဏ် ခံစားခဲ့ရတဲ့ အင်ဒိုနီးရှားကျောင်းသားတွေဟာ ဒီ ရွေ့လျားဗလီဖွင့်ပွဲမှာ ပါဝင်ခဲ့ကြပါတယ်။

“ဒီရွေ့လျားဗလီဟာ ဂျပန်မွတ်စလင်တွေအတွက်ပဲဖြစ်ဖြစ်၊ ခရီးသွားတွေအတွက်ပဲဖြစ်ဖြစ် အင်မတန်မှ အရေးပါပါတယ်။ ကျွန်မရဲ့သူငယ်ချင်းတွေကို မြင်စေချင်ပါတယ်” လို့ အသက် ၁၄ နှစ်အရွယ် နူရ်အဇီဇာက ပြောကြားခဲ့ပါတယ်။

ဂျပန်မှာ အစ္စလာမ်ဘာသာဝင်ဦးရေဟာ ၁ သိန်းကနေ ၂ သိန်းလောက်အထိ ရှိမယ်လို့ ခန့်မှန်းရပါတယ်။

ဂျပန်ဧည့်သည်တစ်ယောက်ဖြစ်တဲ့ တာဆူယာ ဆာကာဂူချီက ရွေ့လျားဗလီဟာ ကမ္ဘာ့တစ်ဝှမ်းက လူတွေရဲ့အမြင်ကို ဖွင့်ပေးရာမှာ အကူအညီဖြစ်လိမ့်မယ်လို့ မျှော်လင့်နေပါတယ်။

“ဗလီထဲကလူတွေကို အပြင်ကနေကြည့်လိုက်ရင် သူတို့ တော်တော်ပျော်ရွှင်နေတယ်ဆိုတာ တွေ့ရမှာပါ” လို့ အိုဆာကာအခြေစိုက် လက်ကားကုမ္ပဏီတစ်ခုက ကိုယ်စားလှယ် ဆာကာဂူချီက ပြောပါတယ်။

အီနိုယူဟာ လွန်ခဲ့တဲ့ ၄ နှစ် ကာတာကို သွားရောက်စဉ်မှာ ဒီစီမံကိန်းအတွက် စိတ်ကူးရခဲ့တယ်လို့ ပြောကြားခဲ့ပါတယ်။

အစပိုင်းမှာ သူဟာ ဂျပန်နဲ့ နိုင်ငံခြားက အားကစားပွဲတွအတွက် ဒီစီမံကိန်းကို ရည်ရွယ်ဖန်တီးခဲ့တာပါ။ ဒါပေမယ့် အခုတော့ ဒီရွေ့လျားဗလီတွေဟာ ဘာသာရေးအဆောက်အဦး လစ်ဟာမှုကို ဖြည့်ဆည်းပေးထာထက် ပိုပြီး အဓိပ္ပါယ်ရှိလိမ့်မယ်လို့ မျှော်လင့်နေပါတယ်။

“အင်ဒိုနီးရှား၊ မလေးရှား၊ အာဖရိက၊ အရှေ့အလယ်ပိုင်းကလူတွေ၊ ဆီးရီးယားက ဒုက္ခသည်တွေဟာ ဒီလို ရွေ့လျားဗလီတွေကို ကမ္ဘာကြီးငြိမ်းချမ်းမှုကို မြှင့်တင်ဖို့အတွက် အသုံးပြုနိုင်မယ်ဆိုရင် ကျွန်တော် တော်တော်လေး ပျော်ရွှင်မိမှာပါ”

Ref: Aljazeera