မွတ်စလင်များအား အကြမ်းဖက်ရန် ကြံစည်သူ ၃ ဦးကို ပြင်သစ်က ဖမ်းဆီးစစ်ဆေး

ဇူလိုင် ၂၈၊ ၂၀၁၈
M-Media

– နိုင်ငံအတွင်းက အစ္စလာမ်ဘာသာဝင်တွေအပေါ် အကြမ်းဖက်တိုက်ခိုက်ဖို့ လူ ၃ ဦးက ကြံစည်နေတဲ့ကိစ္စအတွက် ပြင်သစ်က စုံစမ်းစစ်ဆေးမှုတွေ ပြုလုပ်နေပြီး ဒါဟာ တစ်လအတွင်းမှာ ဒုတိအကြိမ်မြောက် မွတ်စလင်တွေကို တိုက်ခိုက်ဖို့ ကြံစည်မှု ဖြစ်ပါတယ်။

ပြင်သစ်နေ့စဉ်သတင်းစာ Le Figaro က တိုက်ခိုက်ဖို့ ကြံစည်နေသူတွေဟာ အမျိုးသား ၂ ဦးနဲ့ အမျိုးသမီး တစ်ဦးတို့ ဖြစ်ကြပြီး ပြင်သစ် အမိမြေလုံခြုံရေးအဖွဲ့က တနင်္လာနေ့မှာ ဖမ်းဆီးခဲ့တယ်လို့ ဖော်ပြပါတယ်။

ပြီးခဲ့တဲ့လကလည်း ပြင်သစ်အာဏာပိုင်တွေဟာ မွတ်စလင်တွေကို အကြမ်းဖက်တိုက်ခိုက်ဖို့ ကြံစည်နေတဲ့ လက်ယာစွန်းယောက် ၁၀ ဦးကို ဖမ်းဆီး တရားစွဲဆိုခဲ့ပါတယ်။

နိုင်ငံတစ်ဝှမ်း နေရာ ၃ နေရာမှာပြုလုပ်တဲ့ စစ်ဆင်ရေးတွေအတွင်းမှာ ဖမ်းဆီးရမိခဲ့တဲ့ ဒီ ၁၀ ဦးဟာ အစွန်းရောက်အဖွဲ့ Operational Forces Action က အဖွဲ့ဝင်တွေဖြစ်မယ်လို့ ယုံကြည်ရပြီး ရိုင်ဖယ်တွေ၊ ပစ္စတိုတွေ၊ လက်လုပ်လက်ပစ်ဗုံးတွေ၊ ဖောက်ခွဲရေးကိရိယာထုတ်လုပ်တဲ့ ပစ္စည်းတွေကိုလည်း သိမ်းဆည်းရမိခဲ့ပါတယ်။

ပြင်သစ်နိုင်ငံမှာ အစ္စလာမ်ဘာသာဝင် ၅.၇ သန်း ရှိနေတယ်လို့ ခန့်မှန်းရပြီး နိုင်ငံလူဦးရေရဲ့ ၉ ရာခိုင်နှုန်း ဖြစ်ပါတယ်။

Ref: AA