၂၀၂၂ တွင် အိန္ဒိယက အာကာသသို့ လူစေလွှတ်မည်

သြဂုတ် ၁၅၊ ၂၀၁၈
M-Media

– ၂၀၂၂ မှာ အာကာသထဲ လူလွှတ်သွားမယ်လို့ အိန္ဒိယ၀န်ကြီးချုပ် မိုဒီက ဒီကနေ့ လွတ်လပ်ရေးနေ့ မိန့်ခွန်းမှာ ပြောကြားလိုက်ပြီး အမေရိကန်၊ ရုရှားနဲ့ တရုတ်တို့နောက်ပိုင်း အာကာသကို လူသားစေလွှတ်တဲ့ စတုတ္ထမြောက်တိုင်းပြည် ဖြစ်လာဖို့ ရှိနေပါတယ်။

“တိုင်းပြည်က သိပ္ပံပညာရှင်တွေအတွက် ဂုဏ်ယူမိပြီး သူတို့တွေဟာ သုတေသနမှာ ထူးချွန်သလို တီထွင်ဖန်တီးမှုမှာလည်း အရှေ့ရောက်နေကြပါတယ်။ ၂၀၂၂ ခုနှစ် ဒါမှမဟုတ် ဒီမတိုင်ခင် အိန္ဒိယရဲ့ ၃ ရောင်ခြယ်အလံကို အာကာသမှာ လွှင့်ထူသွားမှာ ဖြစ်ပါတယ်” လို့ မိုဒီက ပြောကြားခဲ့ပါတယ်။

အိန္ဒိယနိုင်ငံက အာကသယာဉ်ဟာ ၂၀၁၄ ခုနှစ်မှာ အင်္ဂါဂြိုဟ်ရဲ့ပတ်လမ်းထဲကို ၀င်ရောက်နိုင်ခဲ့ပြီး အင်္ဂါဂြိုဟ်ကိုရောက်တဲ့ ပထမဆုံး အာရှနိုင်ငံအဖြစ် မှတ်တမ်းဝင်ခဲ့ပါတယ်။

လွတ်လပ်ရေးနေ့မိန့်ခွန်းမှာ မိုဒီက ဆင်းရဲသား သန်း ၅၀၀ အတွက် ကျန်းမာရေး အာမခံစနစ်တစ်ခုကို စက်တင်ဘာ ၂၅ ရက်နေ့မှာ စတင်သွားမယ်လို့ဆိုပြီး၊ အဝေးပြေးလမ်းမတွေ တည်ဆောက်သွားဖို့၊ ကျေးရွာတွေကို မီးရရှိအောင် လုပ်ပေးဖို့၊ နိုင်ငံတစ်ဝှမ်း အိမ်သာတွေဆောက်ပေးဖို့ အစီအစဉ်တွေကိုလည်း ထည့်သွင်းပြောကြားခဲ့ပါတယ်။

အလုပ်အကိုင်ရှားပါးမှု၊ လူနည်းစုတွေအပေါ် အကြမ်းဖက်မှုတွေ ကြုံတွေ့နေရတဲ့ အိန္ဒိယနိုင်ငံဟာ လာမယ့်နှစ်မှာ ရွေးကောက်ဖွဲလုပ်ဖို့ ရှိနေပါတယ်။

Ref: CNA