သြဇီမှ အသက် ၁၆ နှစ်အရွယ်လူငယ်က Apple ကုမ္ပဏီ၏ ကွန်ပျူတာကွန်ယက်ကို ဖောက်ထွင်း

သြဂုတ် ၁၈၊ ၂၀၁၈
M-Media

– ထိပ်တန်း နည်းပညာကုမ္ပဏီတစ်ခုဖြစ်တဲ့ Apple ရဲ့ ကွန်ပျူတာကွန်ယက်ထဲကို ဖောက်ထွင်းဝင်ရောက်ပြီး ဖိုင်တွေ၊ သုံးစွဲသူတွေရဲ့ အချက်အလက်အသေးစိတ်တွေကို ရယူခဲ့တယ်လို့ သြစတေးလျက ဆယ်ကျော်သက် ကျောင်းသားတစ်ဦးက ၀န်ခံလိုက်ပါတယ်။

အသက် ၁၆ နှစ်သာရှိသေးတဲ့ အဲဒီလူငယ်လေးဟာ မဲလ်ဘုန်းမြို့ ဆင်ခြေဖုန်းကဖြစ်ပြီး Apple ရဲ့ လုံခြုံရေးစနစ်ကို ကျော်ဖြတ်နိုင်မယ့် နည်းလမ်းတွေကို ဖန်တီးကာ ပမာဏ ၉၀ ဂီဂါဘိုက်လောက်ရှိတဲ့ ဖိုင်တွေကို ဒေါင်းလုတ်ချခဲ့တာ ဖြစ်ပါတယ်။

ရဲတပ်ဖွဲ့က သူ့ရဲ့နေအိမ်ကို ၀င်ရောက်ရှာဖွေရာမှာ hacky hack hack ဆိုတဲ့ ဖိုလ်ဒါအောက်မှာ သိမ်းဆည်းထားတဲ့ ဖိုင်ပေါင်းများစွာကို တွေ့ခဲ့ရပါတယ်။ ဥပဒေကြောင်းအရ ဒီလူငယ်လေးရဲ့အမည်ကို ထုတ်ပြန်ခြင်း မရှိပါဘူး။

လူငယ်လေးကတော့ သူဟာ Apple ကို နှစ်ခြိုက်မိပြီး အပျော်သဘောနဲ့ ဖောက်ထွင်းခဲ့တာဖြစ်တယ်လို့ ဆိုပါတယ်။

Age ဆိုတဲ့ သတင်းစာက ဖော်ပြရာမှာ သိမ်းဆည်းရမိတဲ့ Apple ကွန်ပျူတာ နှစ်လုံးက serial နံပါတ်တွေဟာ Apple ရဲ့ စနစ်ထဲကို ၀င်ရောက်တဲ့ နံပါတ်တွေနဲ့ သွားတူနေတယ်လို့ ဖော်ပြခဲ့ပါတယ်။

မဲလ်ဘုန်းက ကလေးသူငယ်တရားရုံးမှာ ဒီအမှုကို ကြားနာခဲ့ရာမှာ ကျူးလွန်သူလူငယ်ရဲ့ ရှေ့နေဖြစ်သူက သူ့အမှုသည်ဟာ အပျော်သက်သက် ဖောက်ထွင်းခဲ့တာဖြစ်ကြောင်း၊ ဟက်ကာတွေရဲ့ အတွင်းစည်းမှာ အရေးပါသူတစ်ယောက် ဖြစ်တဲ့အတွက် ဒီကိစ္စရဲ့ အသေးစိတ်အချက်အလက်တွေကို ထုတ်ပြန်တာဟာ အမှုသည်အတွက် အန္တရာယ်ရှိစေမှာဖြစ်ကြောင်း လျှောက်လှဲခဲ့ပါတယ်။

ဒီဖောက်ထွင်းမှုနဲ့ပတ်သက်ပြီး Apple က အမေရိကန်ထောက်လှမ်းရေးအဖွဲ့ FBI ကို တိုင်ကြားခဲ့ပြီး FBI ကတစ်ဆင့် သြစတေးလျရဲတပ်ဖွဲ့ကို လွှဲပြောင်းပေးခဲ့တာ ဖြစ်ပါတယ်။ Apple ကတော့ ဖောက်ထွင်းမှုအတွင်း ဘာတွေပါသွားလဲဆိုတာကို ထုတ်ဖော်ပြောဆိုခြင်း မရှိပါဘူး။

Ref: RT