စနေနေ့မနက် နိုင်ငံတကာသတင်းများ

သြဂုတ် ၂၅၊ ၂၀၁၈
M-Media

ပါလက်စတိုင်းပြည်သူများ

ထိုင်ဝမ်မုန်တိုင်း လူ ၆ ဦးသေဆုံး
===============
ထိုင်ဝမ်မှာ ကြာသာပတေးနေ့က စ၀င်တဲ့ မုန်တိုင်းကြောင့် မိုးသည်းထန်စွာရွာသွန်းပြီး ရေကြီးရေလျှံမှုတွေ ဖြစ်ပေါ်နေကာ အနည်းဆုံး လူ ၆ ဦးသေဆုံးပြီး ၁၀၀ လောက် ဒဏ်ရာရတယ်လို့ အာဏာပိုင်တွေကပြောပါတယ်။ လူ ၆ ထောင်လောက်ကိုလည်း ဘေးလွတ်ရာ ရွှေ့ပြောင်းပေးထားရပါတယ်။ လက်ရှိမှာ မုန်တိုင်းက အားပျော့သွားပေမယ့် ရေကြီးမှုတွေက ဆက်လက်ဖြစ်ပေါ်နေဆဲဖြစ်ပါတယ်။

ပါလက်စတိုင်းများအား အကူအညီပေးမှုကို အမေရိကန်ရပ်ဆိုင်း
==============
ပါလက်စတိုင်းပြည်သူတွေအတွက် ပေးအပ်နေတဲ့ စီးပွားရေးအကူအညီ ကန်ဒေါ်လာ သန်း ၂၀၀ ကျော်ကို အမေရိကန် ရပ်ဆိုင်းလိုက်ပြီး ပါလက်စတိုင်းလွတ်မြောက်ရေးအဖွဲ့ PLO က ဒါကို ရှုတ်ချလိုက်ပါတယ်။ အစ္စရေးရဲ့ ကျူးကျော်သိမ်းပိုက်မှုကြောင့် ဒုက္ခသည်ဘ၀ရောက်နေတဲ့ ပါလက်စတိုင်း ပြည်သူတွေကို အကူအညီပေးနေတဲ့ UNRWA အဖွဲ့ကို ထောက်ပံ့မှုပမာဏ တော်တော်များများကိုလည်း အမေရိကန်က အခုနှစ်အစောပိုင်းမှာ လျှော့ချခဲ့ပါတယ်။ PLO အမှုဆောင်ကော်မတီအဖွဲ့ဝင် ဟာနန် အက်ရ်ှရာဝီက အမေရိကန်ဟာ အကူအညီပေးရေးကို နိုင်ငံရေးလက်နက်အဖြစ် အသုံးပြုနေတာဖြစ်ပြီး ပါလက်စတိုင်းတွေရဲ့ အခွင့်အရေးဟာ ရောင်းစားဖို့မဟုတ်ဘူးလို့ ပြောကြားခဲ့ပါတယ်။ အမေရိကန်ဟာ အစ္စရေးရဲ့ အနီးကပ်မဟာမိတ်လည်း ဖြစ်ပါတယ်။

တရုတ်မြောက်ပိုင်းရှိ ဟိုတယ်တစ်ခုတွင် မီးလောင်ပြီး ၁၈ ဦး သေဆုံး
===============
တရုတ်နိုင်ငံ အရှေ့မြောက်ပိုင်း ဟာဘင်မြို့က ဟော်တယ်တစ်ခု ဒီနေ့မနက်ပိုင်းက မီးလောင်မှုကြောင့် အနည်းဆုံး ၁၈ ဦးသေဆုံးပြီး ၁၉ ဦး ဒဏ်ရာရရှိခဲ့တယ်လို့ တရုတ်အာဏာပိုင်တွေက သတင်းထုတ်ပြန်ပါတယ်။ မီးလောင်မှုအကြောင်းအရင်းကို လက်ရှိမှာ စုံစမ်းစစ်ဆေးနေဆဲဖြစ်ပါတယ်။ တရုတ်နိုင်ငံက အဆောက်အဦးတော်တော်များများမှာ ဘေးအန္တရာယ်ကင်းရှင်းရေး ဆောင်ရွက်မှုတွေ အားနည်းပြီး မြို့တော်ဘေဂျင်းက တိုက်ခန်းတစ်ခုမှာ နိုဝင်ဘာလက မီးလောင်မှုကြောင့် လူ ၁၉ ဦး သေဆုံးခဲ့ပါတယ်။

မြောက်ကိုရီးယားကိစ္စ တိုးတက်မှုမရှိဟု ထရမ့် ၀န်ခံ
==============
နိုင်ငံခြားရေးဝန်ကြီး ပွမ်ပီယို ဦးဆောင်တဲ့ ကိုယ်စားလှယ်အဖွဲ့ မြောက်ကိုရီးယားကိုသွားမယ့် အစီအစဉ်ကို ဖျက်သိမ်းကြောင်း အမေရိကန်သမ္မတ ဒေါ်နယ်ထရမ့်က မနေ့မှာ ပြောကြားခဲ့ပြီး မြောက်ကိုရီးယား နျူဖျက်သိမ်းရေး သူ့ရဲ့ကြိုးပမ်းမှုဟာ တိုးတက်မှုမရှိဘူးလို့ ၀န်ခံပြောကြားလိုက်ပါတယ်။ ဇွန်လ ၁၂ ရက်နေ့ ကင်ဂျုံအွန်နဲ့ တွေ့ဆုံခဲ့ပြီးနောက် ထရမ့်က မြောက်ကိုရီးယား နျူဖျက်သိမ်းရေးကိစ္စကို အကောင်မြင်ကြောင်း ပြောကြားခဲ့တာပါ။ ဒါပေမယ့် အခုအချိန်မှာ သိသာတဲ့ တိုးတက်မှုမျိုး မတွေ့ရဘူးလို့ ထရမ့်က ဆိုပါတယ်။

1MDB ကိစ္စတွင် အဓိကပါဝင်သူကို မလေးရှားက တရားစွဲ
================
ဝန်ကြီးချုပ်ဟောင်း နာဂျစ်ရာဇတ်လက်ထက်က နိုင်ငံပိုင် 1MDB လုပ်ငန်းမှာရှိတဲ့ ဒေါ်လာဘီလီယံချီ ပျောက်ဆုံးမှုကိစ္စမှာ အဓိကနေရာကနေ ပါဝင်တယ်လို့ စွပ်စွဲခံထားရတဲ့ စီးပွားရေးလုပ်ငန်းရှင် ဂျိုလိုကို ငွေကြေးခ၀ါချမှု စွဲချက် ၈ ခုနဲ့ မလေးရှားရဲတပ်ဖွဲ့က မနေ့မှာ တရားစွဲလိုက်ပါတယ်။ အရင်က ဖမ်းဝရမ်းထုတ်ခံထားရတဲ့ ဂျိုလိုဟာ လက်ရှိမှာ ပျောက်နေပြီး မကာအိုကနေ၊ တရုတ်ပြည်မထဲကို ၀င်ရောက်သွားတယ်လို့ သတင်းတွေ ထွက်နေပါတယ်။ ဂျိုလိုရဲ့ဖခင်ဖြစ်သူဟာလည်း သူ့သားဆီ ပိုက်ဆံလွှဲပေးမှုအတွက် စွဲချက်တစ်ခုနဲ့ တရားစွဲဆိုခံခဲ့ရပါတယ်။

Ref: CNA, Aljazeera