အာဇန်သံဝေဖန်သူကို ထောင်ချမှု အင်ဒိုရှိ အကြီးဆုံး အစ္စလာမ်ဘာသာရေးအဖွဲ့ ကန့်ကွက်

သြဂုတ် ၂၅၊ ၂၀၁၈
M-Media

အင်ဒိုနီးရှားနိုင်ငံမှ ဗလီဝတ်ကျောင်းတော်တစ်လုံး

– ဗလီက ၀တ်ပြုဖို့ဖိတ်ခေါ်တဲ့ အာဇန်နှိုးဆော်သံဟာ ကျယ်လွန်းတယ်လို့ ဝေဖန်တဲ့ အမျိုးသမီးကို ထောင်ချမှုနဲ့ပတ်သက်ပြီး အင်ဒိုနီးရှားနိုင်ငံရဲ့ အကြီးဆုံး အစ္စလာမ်ဘာသာရေးအဖွဲ့ ‘နဒ်လာသွလ် အိုလမာ (NU)’ က ဝေဖန်လိုက်ပြီး တိုင်းပြည်အတွင်း သည်းခံနိုင်စွမ်း ပိုမိုမြင့်မားဖို့လည်း တိုက်တွန်းလိုက်ပါတယ်။

အခုသီတင်းပတ်အစောပိုင်းမှာ ဆူမားတြားကျွန်းက မီဒန်မြို့ တရားရုံးတစ်ခုဟာ အသက် ၄၄ နှစ်အရွယ် ဗုဒ္ဓဘာသာဝင် တရုတ်အမျိုးသမီး မီလီယာနာကို သာသနာညှိုးနွမ်းစေမှုနဲ့ ထောင်ဒဏ် ၁၈ လ ချမှတ်ခဲ့ပါတယ်။

သူမဟာ ပတ်ဝန်းကျင်မှာရှိနေတဲ့ ဗလီက အာဇန်နှိုးဆော်သံဟာ ကျယ်လွန်းတယ်လို့ ဝေဖန်ခဲ့ပြီးတဲ့နောက် အဖမ်းခံခဲ့ရတာပါ။

အဖွဲ့ဝင် သန်း ၄၀ ရှိတဲ့ NU က ဒီလိုပြောဆိုမှုဟာ ရာဇ၀တ်မှုမဟုတ်ဘူးလို့ ဆိုပါတယ်။

“၀တ်ပြုဖို့နှိုးဆော်သံဟာ ကျယ်လွန်းတယ်လို့ ယူဆပြီး ပြောတာဟာ ဘာသာသာသနာ ညှိုးနွမ်းစေမှု မဟုတ်ပါဘူး။ ကျွန်တော်တို့လို ဘာသာစုံလူမျိုးစုံတဲ့ လူ့အဖွဲ့အစည်းမှာ မွတ်စလင်တွေအနေနဲ့ ဒီလိုဝေဖန်မှုကို အပြုသဘောဆောင်တဲ့ ဝေဖန်မှုအဖြစ် မှတ်ယူသင့်ပါတယ်” လို့ NU ရဲ့ ဥပဒေဆိုင်ရာဌာန အကြီးအကဲ ရော်ဘီကင် အမ်ဟက်ဆ်က ပြောပါတယ်။

လူ့အခွင့်အရေးအဖွဲ့တစ်ခုဖြစ်တဲ့ Amensty International က ဒီအမျိုးသမီးကို ထောင်ချမှုဟာ ရယ်စရာကောင်းတဲ့အဖြစ်အပျက် ဖြစ်တယ်လို့ ဝေဖန်ခဲ့ပါတယ်။ မီလီယာနာလွတ်မြောက်ရေးအတွက် တောင်းဆိုတဲ့စာကို အွန်လိုင်း လက်မှတ်ကောက်ယူမှုမှာ မနေ့ကအထိ လက်မှတ် တစ်သိန်းနီးပါး ရရှိနေပြီ ဖြစ်ပါတယ်။

အစ္စလာမ်ဘာသာဝင်အများစုရှိတဲ့ အင်ဒိုနီးရှားနိုင်ငံဟာ ဘာသာစုံ၊ လူမျိုးစုံ အတူယှဉ်တွဲကာ ငြိမ်းချမ်းစွာနေထိုင်မှုသမိုင်း ရှည်ကြာစွာရှိနေတဲ့ နိုင်ငံလည်း ဖြစ်ပါတယ်။

ဒါပေမယ့် ပြီးခဲ့တဲ့နှစ်တွေမှာ အမျိုး၊ ဘာသာ၊ သာသနာ စောင့်ရှောက်ဖို့ အချိန်ကျပြီဆိုတဲ့ ၀ါဒဖြန့်မှုတွေနဲ့အတူ သဘောထားတင်းမာတဲ့ မွတ်စလင်အဖွဲ့အစည်းတွေ ပေါ်ထွက်လာမှုကြောင့် နိုင်ငံရဲ့ သဟဇတဖြစ်မှု ပျက်ပြားတော့မလားဆိုတဲ့ စိုးရိမ်မှုတွေလည်း ရှိနေပါတယ်။

မီလီယာနာရဲ့ ရှေ့နေအဖွဲ့က သူတို့ရဲ့အမှုသည်ဟာ ၂၀၁၆ ခုနှစ်က အွန်လိုင်းဆွေးနွေးမှုတစ်ခုမှာ အာဇန်နှိုးဆော်သံတွေ ကျယ်လောင်မှုနဲ့ပတ်သက်လို့ ရေးသားခဲ့တာဖြစ်ပြီး ဒါကို ဆန့်ကျင်တာမဟုတ်ကြောင်း၊ နောက်ပိုင်းမှာ သူမရဲ့ ရေးသားမှုကို ဆိုရှယ်မီဒီယာတွေမှာ အကြိမ်ကြိမ် ချဲ့ကားမျှဝေခဲ့ကြတာဖြစ်ကြောင်း၊ ပြစ်ဒဏ်အတွက် အယူခံဝင်သွားမှာဖြစ်ကြောင်း ပြောကြားခဲ့ပါတယ်။

Ref: CNA