အင်္ဂါနေ့မနက် နိုင်ငံတကာသတင်းများ

သြဂုတ် ၂၈၊ ၂၀၁၈
M-Media

ကနေဒါ ကုန်သွယ်ရေးဝန်ကြီး ဂျင်မ်ကာရ်

မြောက်ကိုရီးယား၊ တရုတ်နဲ့ ရုရှားတို့ကို စိုးရိမ်ကြောင်း ဂျပန်ပြော
===============
ဒုံးကျည်စမ်းသပ်တဲ့နေရာတွေကို ဖျက်ဆီးပြီး ကိုရီးယားကျွန်းဆွယ်မှာ နျူကင်းစင်ရေး လုပ်သွားမယ်လို့ ကင်ဂျုံအွန်က ကတိပြုထားပေမယ့် မြောက်ကိုရီးယားရဲ့ စစ်ရေးလှုပ်ရှားမှုတွေက မိမိတို့အတွက် ခြိမ်းခြောက်မှုတစ်ခုအဖြစ် ဆက်ရှိနေတုန်းပဲဖြစ်တယ်လို့ ဂျပန် ကာကွယ်ရေးဝန်ကြီးဌာနက ဒီကနေ့ထုတ်ပြန်တဲ့ နှစ်ပတ်လည် အစီရင်ခံစာမှာ ဖော်ပြထားပါတယ်။ ဒါ့အပြင် တရုတ်ရဲ့ စစ်ရေးအင်အား ကြီးထွားလာမှုနဲ့ ပိုင်နက်ချဲ့ထွင်လိုမှုတွေ၊ ရုရှားရဲ့ အင်အား ပြန်လည်တည်ဆောက်လိုမှုတွေကိုလည်း စိုးရိမ်ကြောင်း ဖော်ပြထားပါတယ်။ ဇွန်လအတွင်း ထရမ့်နဲ့ ကင်ဂျုံအွန်တို့ တွေ့ဆုံပြီးနောက်ပိုင်း လက်ရှိ မြောက်ကိုရီးယား နျူအရေးဟာ အနည်းငယ် ပြန်လည်တင်းမာလာခဲ့ပါတယ်။

ဖိလစ်ပိုင်ပြည်သူများက ဒူတာတေးကို ICC သို့ တိုင်ကြား
==============
ဖိလစ်ပိုင်သမ္မတ ဒူတာတေးရဲ့ မူးယစ်နှိမ်နှင်းရေးစစ်ပွဲမှာ သတ်ဖြတ်ခံလိုက်ရသူ ၈ ဦးရဲ့ မိသားစုတွေနဲ့ တက်ကြွလှုပ်ရှားတွေက ဒူတာတေးကို အရေးယူပေးဖို့ နိုင်ငံတကာ ရာဇ၀တ်ခုံရုံး ICC ကို ဒီကနေ့မှာ တိုင်ကြားလိုက်ပါတယ်။ ဒါဟာ နိုင်ငံအတွင် တရားလက်လွတ်သတ်ဖြတ်မှု၊ လူသားထုအပေါ်ကျူးလွန်တဲ့ ရာဇ၀တ်မှုတွေ ရှိတယ်လို့ စွပ်စွဲကာ ဒူတာတေးကို ဒုတိယမြောက် တိုင်ကြားမှုလည်း ဖြစ်ပါတယ်။ ၂၀၁၇ ခုနှစ် ဧပြီလက တိုင်ကြားမှုကို ICC က ကနဦး စုံစမ်းစစ်ဆေးမှုတွေ ပြုလုပ်နေပါတယ်။ မူးယစ်နှိမ်နှင်းမှုမှာ တရားလက်လွတ် သတ်ဖြတ်မှုတွေ ရှိတယ်ဆိုတဲ့သတင်းတွေကို ဒူတာတေးက ငြင်းဆိုထားပါတယ်။

အာဆီယံနှင့် ကုန်သွယ်ရန် စိတ်ဝင်စားနေဟု ကနေဒါပြော
===============
အာဆီယံနိုင်ငံတွေနဲ့ လွတ်လပ်စွာ ကုန်သွယ်နိုင်ဖို့ ကနေဒါက ဆန္ဒရှိနေတယ်လို့ ထိုင်းနဲ့ စင်ကာပူတို့ကို သွားရောက်မယ့် ကနေဒါကုန်သွယ်ရေးဝန်ကြီး ဂျင်မ်ကာရ်က မနေ့မှာ ပြောပါတယ်။ မြောက်အမေရိက လွတ်လပ်စွာ ကုန်သွယ်မှု သဘောတူညီချက်အတွက် အမေရိကန်နဲ့ မက္ကဆီကိုတို့အကြား ဆွေးနွေးမှု အောင်မြင်ခဲ့ပြီးတဲ့နောက် ကနေဒါဟာ ကုန်သွယ်ရေးဆိုင်ရာ အကြပ်အတည်းနဲ့ တွေ့နေတာပါ။ ဂျင်မ်ကာရ်က အာဆီယံဟာ အလျင်အမြန် တိုးတက်နေတဲ့ ဈေးကွက်ကြီးဖြစ်တယ်လို့ ဆိုပါတယ်။ ဥရောပသမဂ္ဂကလည်း အာဆီယံနဲ့ ကုန်သွယ်ဖို့ စိတ်ဝင်စားနေပါတယ်။

Ref: CNA,Aljazeera