မာဒေးကားနေ့မှစ၍ မလေးရှားက တရားမ၀င်နိုင်ငံခြားသားများကို အကြီးအကျယ် ဖမ်းဆီးမည်

သြဂုတ် ၃၀၊ ၂၀၁၈
M-Media

– သြဂုတ် ၃၁ ရက်နေ့ (မနက်ဖြန်) ကနေစပြီး နိုင်ငံတစ်ဝှမ်း တရားမ၀င်နေထိုင်သူတွေကို မလေးရှားက ပိုက်စိတ်တိုက် ဖမ်းဆီးတော့မယ်လို့ သိရပါတယ်။

တရားမ၀င်နေထိုင်သူတွေအနေနဲ့ ဒဏ်ငွေ ရင်းဂစ် ၃၀၀၊ အထူးဖြတ်သန်းခွင့်အတွက် ၁၀၀ ပေးပြီး မူရင်းနိုင်ငံတွေကို ပြန်ခွင့်ပြုတဲ့ လွတ်ငြိမ်းချမ်းသာခွင့် 3+1 အစီအစဉ်ဟာ သြဂုတ်လ ၃၀ ရက်နေ့မှာ ပြီးဆုံးမှာ ဖြစ်ပါတယ်။

“လွတ်ငြိမ်းချမ်းသာခွင့်အစီအစဉ်ကို ကျွန်တော်တို့ သက်တမ်းတိုးမှာ မဟုတ်ပါဘူး။ တရားမ၀င်နေထိုင်သူတွေကို ဖမ်းဆီးတဲ့လုပ်ငန်းစဉ်ကို မနက်ဖြန်ကစပြီး တင်းတင်းကြပ်ကြပ် ဆောင်ရွက်သွားမှာ ဖြစ်ပါတယ်။ လွတ်ငြိမ်းချမ်းသာခွင့် အစီအစဉ်မှာ ပါဝင်ဖို့အတွက် ကျွန်တော်တို့ အချိန် လုံလုံလောက်လောက် ပေးထားပါတယ်။ ဒါ့ကြောင့် နောက်ထပ် သက်တမ်းတိုးမှာ မဟုတ်ပါဘူး။ တရားမ၀င်နေထိုင်သူတွေဟာ နိုင်ငံတစ်ဝှမ်းက ကျွန်တော်တို့ရုံးတွေကို လာရောက်ပြီး စာရင်းသွင်းကာ အိမ်ပြန်နိုင်ဖို့ လုပ်နေကြပါတယ်” လို့ မလေးရှား လူဝင်မှုကြီးကြပ်ရေးဝန်ကြီးဌာန ညွှန်ကြားရေးမှူးချုပ် ဒါတွတ်ဆရီ မွတ်စ်တာဖာအလီက ပြောကြားခဲ့ပါတယ်။

ဇန်န၀ါရီကနေ သြဂုတ်လ ၁၅ ရက်နေ့အထိ စီးနင်းဖမ်းဆီးမှုပေါင်း ၉၂၀၈ ကြိမ်လောက် လုပ်ဆောင်ခဲ့ပြီး တရာမ၀င် နိုင်ငံခြားသားပေါင်း ၂၈၀၆၃ ဦး၊ သူတို့ကို အလုပ်ပေးထားတဲ့ အလုပ်သမား ၇၉၉ ဦးတို့ကို ဖမ်းဆီးခဲ့တယ်လို့လည်း အလီက ထည့်သွင်းပြောဆိုခဲ့ပါတယ်။

“တရားမ၀င် နိုင်ငံခြားသားကင်းစင်တဲ့ နိုင်ငံဖြစ်ရေး ကျွန်တော်တို့ရဲ့ ရည်ရွယ်ချက်ကို မနက်ဖြန်ကနေစပြီး တင်းတင်းကြပ်ကြပ် အကောင်အထည်ဖော်သွားမှာ ဖြစ်ပါတယ်”

မလေးရှားဟာ တရားမ၀င်နိုင်ငံခြားသားတွေ အလုပ်ပြန်ခန့်ရေးအစီအစဉ်ကို ၂၀၁၆ ခုနှစ် ဖေဖော်ဝါရီလ ၁၅ ရက်နေ့ကနေ ၂၀၁၈ ခုနှစ် ဇွန်လ ၃၀ ရက်နေ့အထိ ဆောင်ရွက်ပေးခဲ့ပါတယ်။

Ref: The Star