ဆွာချောင်းဆည် ရေပိုလွှဲကျိုးမှုအတွင်း အနည်းဆုံး လူ ၅ ဦး ပျောက်ဆုံး

သြဂုတ် ၃၀၊ ၂၀၁၈
M-Media

photo credit – mmtimes

– မနေ့က ပဲခူးတိုင်းဒေသကြီး ရေတာရှည်မြို့နယ်မှာရှိတဲ့ ဆွာချောင်းရေလှောင်တမံက ရေပိုလွှဲ ကျိုးမှုကြောင့် ရွာပေါင်း ၂၇ ရွာလောက် ရေမြုပ်ခဲ့ပြီး လူ ၅ ဦး ပျောက်ဆုံးနေတယ်လို့ သိရပါတယ်။

ရေကြီးမှုကြောင့် ပဲခူးရိုးမ အဝေးပြေးလမ်းအစိတ်အပိုင်းတစ်ချို့ ပျက်ဆီးခဲ့ပြီး လူပေါင်း ၅ သောင်းလောက် ဘေးလွတ်ရာကို ရွှေ့ပြောင်းခဲ့ရတယ်လို့ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဦးစီးဌာနက တာဝန်ရှိသူတစ်ဦးက ပြောကြားခဲ့ပါတယ်။

မီးသတ်ဦးစီးဌာနက ဒုတိယညွှန်ကြားရေးမှူးဖြစ်တဲ့ ဦးရဲမင်းသူက ဒေသခံတွေဟာ ရေ ရုတ်တရက်တက်လာမှုကြောင့် အံ့အားသင့်ခဲ့ရပြီး၊ သစ်ပင်တွေပေါ်က၊ ရထားလမ်းတံတားပေါ်ကနေ လူတွေကို ကယ်တင်ခဲ့ရတယ်လို့ ပြောပါတယ်။

“မီးသတ်နဲ့ တပ်မတော်က ကယ်ဆယ်ရေးလုပ်ငန်းကို ဆောင်ရွက်ခဲ့ပြီး မီးသတ်က မော်တော်ဘုတ် ၆ စီး၊ တပ်မတော်က ၄ စီးကို အသုံးပြုခဲ့ပါတယ်”

ရေကြီးမှုကြောင့် လူ ၅ ဦး၊ ၆ ဦးလောက် သေဆုံးတယ်ဆိုတဲ့ သတင်းတွေကို အတည်မပြုနိုင်သေးကြောင်း၊ ဒါပေမယ့် အမျိုးသား ၃ ဦးနဲ့ အမျိုးသမီး ၂ ဦးဟာ မနက်ပိုင်းမှာ ရေနဲ့မျောပါသွားကြောင်း ၎င်းက ထည့်သွင်းပြောဆိုခဲ့ပါတယ်။

လက်ရှိ ကယ်ဆယ်ရေးစခန်းဖွင့်ထားရတဲ့ ဆွာချောင်းက စက်ရုံဘုန်းကြီးကျောင်းက ဆရာတော် ဦးတေဇောဘာသက သေဆုံးတာတွေ၊ ပျောက်ဆုံးတာတွေ ရှိနိုင်တယ်လို့ ပြောကြားခဲ့ပါတယ်။

ရေကြီးမှုကြောင့် ရန်ကုန်-မန္တလေး အမြန်လမ်းပေါ်မှာရှိတဲ့ တံတားတစ်ခုလည်း ပျက်ဆီးခဲ့ရပါတယ်။

အခုလအစောပိုင်းမှာ နိုင်ငံတစ်ဝှမ်း မိုးသည်းထန်စွာရွာသွန်းပြီး ရေကြီးရေလျှံမှုတွေကြောင့် လူပေါင်း တစ်သိန်းခွဲလောက် အိုးအိမ်စွန့်ကာ ဘေးလွတ်ရာကို ထွက်ပြေးခဲ့ရပါတယ်။

Ref: mmtimes