အိုလံပစ်ပြိုင်ပွဲ လက်ခံကျင်းပရန် အင်ဒိုနီးရှားလျှောက်ထားမည်

စက်တင်ဘာ ၁၊ ၂၀၁၈
M-Media

အာရှအားကစားပြိုင်ပွဲ မီးရှူးတိုင်ကို သယ်ဆောင်လာသည့် ဂျိုကိုဝီဒိုဒို

– ၂၀၃၂ အိုလံပစ်ပြိုင်ပွဲ အိမ်ရှင်အဖြစ် လက်ခံကျင်းပရေး လျှောက်ထားသွားမယ်လို့ အင်ဒိုနီးရှားသမ္မတ ဂျိုကို ၀ီဒိုဒိုက ပြောကြားလိုက်ပါတယ်။

အင်ဒိုနီးရှားဟာ လက်ရှိမှာ အာရှအားကစားပြိုင်ပွဲကို အိမ်ရှင်အဖြစ် အောင်မြင်စွာ လက်ခံကျင်းပနေပြီး ၀ီဒိုဒိုက သူတို့အနေနဲ့ အိုလံပစ်ပြိုင်ပွဲကိုလည်း အခုလို အောင်မြင်စွာ ကျင်းပနိုင်မှာဖြစ်ကြောင်း နိုင်ငံတကာ အိုလံပစ်ကော်မတီ၊ အာရှ အိုလံပစ်ကော်မတီ ဥက္ကဌတွေနဲ့ ဒီကနေ့တွေ့ဆုံမှုမှာ ပြောကြားခဲ့ပါတယ်။

“လက်ရှိကျင်းပနေတဲ့ ၁၈ ကြိမ်မြောက် အာရှအားကစားပြိုင်ပွဲက အတွေ့အကြုံကိုယူပြီး အင်ဒိုနီးရှားဟာ ဒီထက်ပိုကြီးတဲ့ ပြိုင်ပွဲမျိုးကို ကျင်းပနိုင်မယ်ဆိုတာ သေချာပါတယ်”

နိုင်ငံတကာ အိုလံပစ်ကော်မတီ ဥက္ကဌ သောမတ်စ် ဘက်ခ်ျက အင်ဒိုနီးရှားရဲ့ အိမ်ရှင်လျှောက်ထားမှုကို ကြိုဆိုခဲ့ပြီး၊ အာရှအားကစားပြိုင်ပွဲ ကျင်းပမှုဟာ ၂၀၃၂ အိုလံပစ်ပြိုင်ပွဲအတွက် ‘ခိုင်မာတဲ့ ဖောင်ဒေးရှင်း’ ဖြစ်တယ်လို့ ပြောကြားခဲ့ပါတယ်။

“အာရှအားကစားပြိုင်ပွဲကို အောင်မြင်စွာ ကျင်းပနိုင်ခဲ့တာကြောင့် အိုလံပစ်ပြိုင်ပွဲကိုလည်း အောင်မြင်စွာ ကျင်းပနိုင်တဲ့ အစွမ်းအစရှိတယ်ဆိုတာ အင်ဒိုနီးရှားက ပြသလိုက်တာ ဖြစ်ပါတယ်”

ဒီကနေ့မှာ ပြီးဆုံးမယ့် အာရှကစားပြိုင်ပွဲကို အာရှဒေသ နိုင်ငံပေါင်း ၄၅ နိုင်ငံက အားကစားသမား ၁၂၀၀၀၊ ထောင်ချီတဲ့ အာဏာပိုင်တွေ၊ ဂျာနယ်လစ်တွေ လာရောက်ခဲ့ကြပါတယ်။

အင်ဒိုနီးရှားဟာ ကြီးကျယ်တဲ့ ဖွင့်ပွဲအခမ်းအနားကို ကျင်းပနိုင်ခဲ့ပြီး မျှော်မှန်းထားတဲ့ အရေအတွက်ထက်ကျော်ကာ ရွှေဆု ၃၀ ကို ဆွတ်ခူးနိုင်ခဲ့ပြီး နိုင်ငံအလိုက် ဆုတံဆိပ်ရရှိမှုမှာ အဆင့် ၄ နေရာ ရှိနေပါတယ်။

ကမ္ဘာပေါ်မှာ စတုတ္ထမြောက် လူဦးရေအများဆုံးနိုင်ငံလည်းဖြစ်တဲ့ အင်ဒိုနီးရှားဟာ ၂၀၃၀ ရောက်ရင် ကမ္ဘာ့ ၁၀ နိုင်ငံမြောက် စီးပွားရေးအင်အားကြီးနိုင်ငံ ဖြစ်လာဖို့လည်း ရှိနေပါတယ်။

၂၀၂ အိုလံပစ်ပြိုင်ကို တိုကျိုမှာ ပြုလုပ်မှာဖြစ်ပြီး ၂၀၂၄ ကို ပဲရစ်၊ ၂၀၂၈ ကို လော့စ်အိန်ဂျလိစ်မြို့တို့မှာ ကျင်းပသွားမှာ ဖြစ်ပါတယ်။ ၂၀၁၆ အိုလံပစ်ပြိုင်ပွဲကို ဘရာဇီးလ်မှာ ကျင်းပခဲ့ပါတယ်။

Ref: Aljazeera