ကချင်ပြည်သူများအား အကူအညီပေးရေး အစိုးရ၏ပိတ်ပင်မှုတွင် တရုတ်လက်ချက်မကင်း

စက်တင်ဘာ ၄၊ ၂၀၁၈
M-Media

ကချင်ဒုက္ခသည်များ

– ကချင်ပြည်နယ်မှ တိုက်ခိုက်မှုတွေကြောင့် အိုးအိမ်စွန့်ခွာ ထွက်ပြေးနေရတဲ့ ဒုက္ခသည်တွေကို ကူညီမယ့် အဖွဲ့တွေကို မြန်မာအစိုးရက ပိတ်ပင်မှုမှာ တရုတ်လည်း ပါဝင်တယ်လို့ လူ့အခွင့်အရေအဖွဲ့ Fortify Rights က ပြောကြားလိုက်ပါတယ်။

They Block Everything ဆိုတဲ့ အမည်နဲ့ မကြာသေးခင်က ထုတ်ပြန်လိုက်တဲ့ အစီရင်ခံစာမှာ အခုလို ပြောကြားခဲ့တာဖြစ်ပြီး မြန်မာအာဏာပိုင်တွေ၊ အထူးသဖြင့် စစ်တပ်တာဝန်ရှိသူတွေဟာ ကချင်ပြည်နယ်မှာ အကူအညီပေးရေးကို လက်နက်တစ်ခုအဖြစ် နှစ်များစွာ အသုံးပြုခဲ့တယ်လို့လည်း ဖော်ပြထားပါတယ်။

ပြီးခဲ့တဲ့ ၅ နှစ်အတွင်း ကချင်ပြည်နယ်မှာ တွေ့ဆုံမေးမြန်းမှုပေါင်း ၁၉၅ ခုကို လုပ်ဆောင်ခဲ့ပြီးတဲ့နောက်ပိုင်း ဒီအစီရင်ခံစာကို ထုတ်ပြန်ခဲ့တယ်လို့ Fortify Rights က ပြောပါတယ်။

ဦးသိန်းစိန် အစိုးရလက်ထက် တိုင်းရင်းသားလက်နက်ကိုင်တွေနဲ့ ငြိမ်းချမ်းရေးဆွေးနွေးမှု စတင်ကတည်းက တရုတ်ကိုယ်စားလှယ်အဖွဲ့ဟာ သူတို့နဲ့ကပ်နေတဲ့ မြန်မာနယ်စပ်မှာ အကူအညီပေးရေး အဖွဲ့တွေကို ၀င်ရောက်ခွင့်မပေးရေး မြန်မာအာဏာပိုင်တွေကို ပြောကြားခဲ့တယ်လို့ အစီရင်ခံစာမှာ ဖော်ပြထားပါတယ်။

ကချင်ပြည်နယ်မှာ မြန်မာအစိုးရစစ်တပ်နဲ့ ကချင်လက်နက်ကိုင်အဖွဲ့အကြား တိုက်ခိုက်မှုတွေဟာ ၂၀၁၁ ခုနှစ်ကတည်းက စတင်ခဲ့တာဖြစ်ပြီး စုစုပေါင်း ကချင်ပြည်သူ ၁ သိန်း ၂ သောင်းလောက်ဟာ အိုးအိမ်စွန့်ခွာ ထွက်ပြေးခဲ့ရပါတယ်။

ပြည်နယ်အတွင်း နေရပ်စွန့်ခွာ ထွက်ပြေးနေရသူတွေ နေထိုင်တဲ့ စခန်းတွေဟာ စုစုပေါင်း ၁၄၀ ရှိနေပြီး ၄၀ ရာခိုင်နှုန်းက KIA နဲ့ အခြားလက်နက်ကိုင်အဖွဲ့တွေရဲ့ ထိန်းချုပ်ရာဒေသတွေမှာ ရှိနေတာ ဖြစ်ပါတယ်။

အကူအညီပေးရေးလုပ်သားတွေက မြန်မာအစိုးရဟာ ၂၀၁၅ ခုနှစ်ကတည်းကစပြီး ကချင်ပြည်နယ်မှာ ပိတ်ပင်မှုတွေ လုပ်ဆောင်ခဲ့တယ်လို့ ပြောပါတယ်။ ၂၀၁၇ ခုနှစ်အတွင်း အစိုးရထိန်းချုပ်ထားတဲ့ ဒေသတွေကို သွားရောက်နိုင်ဖို့အတွက် နိုင်ငံတကာ အကူအညီပေးရေးအဖွဲ့တွေရဲ့ ခွင့်တောင်းမှု ၅၆၂ ခုမှာ မြန်မာအစိုးရက ၅ ရာခိုင်နှုန်းသာ ခွင့်ပြုခဲ့တယ်လို့ အစီရင်ခံစာမှာ ဖော်ပြထားပါတယ်။

မြန်မာအစိုးရက အခုလို ပိတ်ပင်မှုတွေ လုပ်ထားတာကြောင့် အကူအညီပေးရေး အဖွဲ့တွေဟာ တရုတ်နိုင်ငံကနေတစ်ဆင့် အကူအညီတွေကို ပေးပို့နေရပြီး ဒါကလည်း တရားမ၀င်ဖြစ်တဲ့အတွက် ဖမ်းဆီးခံရနိုင်ခြေ မြင့်မားတယ်လို့ Fortify Rights အဖွဲ့က ပြောကြားခဲ့ပါတယ်။

ကချင်ပြည်နယ်မှာ တိုက်ခိုက်မှုတွေ ပြန်လည်စတင်ကတည်းက တရုတ်ပြည်ထဲ ထွက်ပြေးရတဲ့ ဒုက္ခသည်တွေကို တရုတ်စစ်သားတွေက ပြန်လည်မောင်းထုတ်တာ၊ ၂၀၁၃ ခုနှစ်မှာ ယူနန်ပြည်နယ်က ဒုက္ခသည်စခန်းတစ်ခုကို တရုတ်စစ်သားတွေက မီးရှို့ပစ်တာတွေကိုလည်း အစီရင်ခံစာမှာ ထည့်သွင်း ဖော်ပြထားပါတယ်။

Ref: Irrawaddy