ကမ္ဘာ့ဥပဒေစိုးမိုးရေး အညွှန်းကိန်းတွင် မြန်မာနိုင်ငံက အောက်ဆုံးနားရောက်

စက်တင်ဘာ ၄၊ ၂၀၁၈
M-Media

– ကမ္ဘာလုံးဆိုင်ရာ ဥပဒေစိုးမိုးရေး အညွှန်းကိန်းမှာ မြန်မာနိုင်ငံဟာ ပြီးခဲ့တဲ့နှစ်ကထက် ၂ ဆင့် ကျဆင်းသွားပြီး အရှေ့အာရှနဲ့ ပစိတ်ဖိတ်ဒေသမှာ ဒုတိယမြောက် ဥပဒေစိုးမိုးမှုအနည်းဆုံး နိုင်ငံအဖြစ် ရပ်တည်နေပါတယ်။

WJP Rule of Law Index 2017-18 လို့ အမည်ပေးထားတဲ့ ဒီအညွှန်းကိန်းကို ၀ါရှင်တန်အခြေစိုက် World Justice Project က တွက်ချက်ထုတ်ပြန်တာဖြစ်ပြီး နိုင်ငံပေါင်း ၁၁၃ နိုင်ငံမှာ မြန်မာနိုင်ငံက အဆင့် ၁၀၀ ရှိကာ၊ အရှေ့အာရှနဲ့ ပစိဖိတ်ဒေသ ၁၅ နိုင်ငံမှာတော့ အဆင့် ၁၄ နေရာမှာ ရှိနေပါတယ်။

အစိုးရရဲ့ အာဏာသက်ရောက်မှု၊ ခြစားမှုကင်းရှင်းခြင်း၊ အစိုးရရဲ့ ပွင့်လင်းမြင်သာမှု၊ အခြေခံအခွင့်အရေးများ၊ ဥပေဒနှင့် လုံခြုံရေး၊ ဥပဒေကို အကောင်အထည်ဖော်နိုင်မှု၊ လှုမှုရေး တရားမျှတမှု၊ တရားရေးတရားမျှတမှု စတဲ့ အချက် ၈ ချက်နဲ့ ဒီအညွှန်းကိန်းကို တွက်ချက်တာ ဖြစ်ပါတယ်။

မြန်မာနိုင်ငံဟာ ဒီအချက် ၈ ချက်စလုံးမှာ အဆင့်တွေ ဆိုဆိုးဝါးဝါး ကျဆင်းခဲ့တာပါ။ နိုင်ငံပေါင်း ၁၁၃ နိုင်ငံအတွက် အဆင့်သတ်မှတ်ချက်မှာ မြန်မာနိုင်ငံဟာ ပွင့်လင်းတဲ့အစိုးရဖြစ်မှုမှာ အဆင့် ၁၀၇၊ အခြေခံအခွင့်အရေးမှာ အဆင့် ၁၁၀၊ လူမှုရေး တရားမျှတမှုမှာ အဆင့် ၁၀၉၊ တရားရေးတရားမျှတမှုမှာ အဆင့် ၁၀၇ ရှိနေတာ ဖြစ်ပါတယ်။

အရှေ့အာရှနဲ့ ပစိတ်ဖိတ် ၁၅ နိုင်ငံစာရင်းရဲ့ အခြေခံအခွင့်အရေး အဆင့်သတ်မှတ်ချက်မှာ မြန်မာနိုင်ငံဟာ အဆင့် ၁၅ နဲ့ အောက်ဆုံးမှာ ရှိနေပါတယ်။ လူမှုရေး တရားမျှတမှု၊ တရားရေးတရားမျှတမှုနဲ့ ပွင့်လင်းတဲ့ အစိုးရဖြစ်မှုတွေမှာ အဆင့် ၁၄ နေရာ ရှိနေပါတယ်။

မြန်မာနိုင်ငံက ဥပဒေပြုရေးနဲ့ တရားရေးတွေဟာ အစိုးရရဲ့ အာဏာသက်ရောက်မှု နည်းပါးတဲ့ အဓိကကဏ္ဍတွေဖြစ်တယ်လို့ World Justice Project ရဲ့ အစီရင်ခံစာမှာ ဖော်ပြထားပါတယ်။

ရာဇ၀တ်မှု တရားရေးစနစ်ရဲ့ အဓိကအားနည်းချက်တွေက ခြစားမှု၊ ထိရောက်တဲ့ စုံစမ်းစစ်ဆေးမှုမရှိခြင်း၊ နှေးကွေးပြီး ထိရောက်မှုမရှိတဲ့ စီရင်ချက်တွေဖြစ်တယ်လို့လည်း ဆိုပါတယ်။ ဥပဒေနဲ့ လုံခြုံရေးတွေကဏ္ဍမှာတော့ ရာဇ၀တ်မှုတွေ၊ လူမျိုးစုအကြမ်းဖက်မှုတွေဟာ အဓိကပြဿနာတွေဖြစ်နေတယ်ဆိုတာကို တွေ့ရတယ်လို့ အစီရင်ခံစာမှာ ဖော်ပြထားပါတယ်။

Ref: Irrawaddy