၇ နှစ်အတွင်း နျူအင်အားကြီး ၅ နိုင်ငံစာရင်းတွင် ပါကစ္စတန် ပါလာနိုင်ဖွယ်ရှိနေ

စက်တင်ဘာ ၆၊ ၂၀၁၈
M-Media

– ယူရေနီယံ သန့်စင်မှုတွေ၊ ပလူတိုနီယံ ထုတ်လုပ်မှုတွေကို တိုးမြှင့်လုပ်ဆောင်လာတဲ့ ပါကစ္စတန်ဟာ ၂၀၂၅ ခုနှစ်ရောက်ရင် ကမ္ဘာ့ ပဉ္စမမြောက် နျူအင်အားကြီးနိုင်ငံတစ်ခု ဖြစ်လာနိုင်တယ်လို့ နျူလက်နက်ဆိုင်ရာ ၀ဘ်ဆိုက်ဖြစ်တဲ့ Bulletin of the Atomic Scientists က အစီရင်ခံစာတစ်ခုမှာ ဖော်ပြထားပါတယ်။

Pakistani nuclear forces, 2018 အမည်နဲ့ အမေရိကန်သိပ္ပံပညာရှင်တွေက ရေးသားထားတဲ့ အဲဒီ အစီရင်ခံစာမှာ ပါကစ္စတန်ဟာ နျူလက်နက် ပစ်လွှတ်တဲ့ စနစ်တွေ တော်တော်များများကိုလည်း တီထွင်နေပြီး နောက်ထပ် ၇ နှစ်အတွင်း နျူထိပ်ဖူး ၂၂၀ ကနေ ၂၅၀ အထိ ပိုင်ဆိုင်လာလိမ့်မယ်လို့ သုံးသပ်ထားပါတယ်။

“နျူထိပ်ဖူးတွေ၊ နျူလောင်စာတွေနဲ့ ပစ်လွှတ်စနစ်တွေကို များပြားလာအောင်ဆောင်ရွက်ပြီး ပါကစ္စတန်ဟာ သူတို့ရဲ့ နျူလက်နက်အင်အားကို ဆက်လက်ချဲ့ထွင်နေပါတယ်” လို့ စာမျက်နှာ ၁၂ မျက်နှာပါတဲ့ အဲဒီ အစီရင်ခံစာမှာ ဖော်ပြထားပါတယ်။

ပါကစ္စတန်စစ်တပ်ရဲ့ စစ်စခန်းတွေ၊ လေတပ်အခြေစိုက်စခန်းတွေကို ဂြိုဟ်တုကနေ ကြည့်ရှုမှုအရ နျူလက်နက်တွေနဲ့ သက်ဆိုင်တယ်လို့ ယူဆရတဲ့ ဒုံးပစ်စင်တွေ၊ မြေအောက်စခန်းတွေကို တွေ့ခဲ့ရတယ်လို့လည်း အစီရင်ခံစာက ဆိုပါတယ်။

နောက်ထပ် ၁၀ နှစ်အတွင်း ပါကစ္စတန်ဟာ နျူထိပ်ဖူး ၃၅၀ လောက် ပိုင်ဆိုင်ပြီး ကမ္ဘာ့ တတိယ နျူအင်အားကြီးနိုင်ငံ ဖြစ်လာမယ်လို့ ပြောဆိုမှုတွေဟာ ချဲ့ကားပြောဆိုမှုသာ ဖြစ်တယ်လို့ အမေရိကန် သိပ္ပံပညာရှင်တွေက ဒီအစီရင်ခံစာမှာ သုံးသပ်ထားပါတယ်။

လက်ရှိ နျူအင်အားကြီး ၅ နိုင်ငံဟာ အမေရိကန်၊ ရုရှား၊ ယူကေ၊ ပြင်သစ်နဲ့ တရုတ်တို့ဖြစ်ပြီး အိန္ဒိယက အဆင့် ၆၊ ပါကစ္စတန်က အဆင့် ၇ မှာ ရှိနေပါတယ်။

Ref: NDTV