တူရကီတွင် နှစ် ၉၀၀ သက်တမ်းရှိ ဗလီတစ်လုံးကို အလုံးလိုက် နေရာရွှေ့

စက်တင်ဘာ ၁၀၊ ၂၀၁၈
M-Media

ဗလီငယ်ရွှေ့ပြောင်းမှု

– တူရကီနိုင်ငံတောင်ပိုင်း ဘတ္တမန်ပြည်နယ် ဟာဆန်ကက်ဖ်ခရိုင်မှာ လွန်ခဲ့တဲ့နှစ်ပေါင်း ၉၀၀ က တည်ဆောက်ခဲ့တဲ့ ရှေးဟောင်း ဗလီဝတ်ကျောင်းတော်တစ်လုံးကို ဒီကနေ့မှာ အလုံးလိုက် ရွှေ့ပြောင်းခဲ့ပါတယ်။

အာတူကစ်မင်းဆက်လက်ထက်က ဆောက်လုပ်ခဲ့တဲ့ အဲဒီဗလီငယ်ဟာ တန်ပေါင်း ၈၅၀ လေးပြီး ဘီး ၂၅၆ ဘီးပါတဲ့ အထူးထရပ်ကားနဲ့ မူရင်းနေရာကနေ ၂.၄ ကီလိုမီတာအဝေးကို ရွှေ့ခဲ့တာပါ။ အနီးအနားမှာ ရေလှောင်တမံအသစ်တစ်ခု ဖွင့်လှစ်ပြီးတဲ့နောက် အနာဂတ်မှာ ရေကြီးမယ့် အန္တရာယ်ကို စိုးရိမ်တဲ့အတွက် ဗလီကို ဒီလို ပြောင်းရွှေ့ခဲ့တာ ဖြစ်ပါတယ်။

ဗလီရဲ့ မင်နာရတ်မျှော်စင်ကိုတော့ အခုတစ်ပတ်အတွင်းမှာ ရွှေ့ဖို့ ရှိနေပါတယ်။

တူရကီဟာ အရင်ကလည်း နှစ်ပေါင်း ၅၄၀ ကြာမြင့်နေပြီးဖြစ်တဲ့ ဂူဗိမာန်တစ်ခု၊ ရှေးဟောင်း တူရကီရေချိုးကန်တစ်ခုတို့ကို ဘတ္တမန်ပြည်နယ်မှာပဲ အလုံးလိုက် ရွှေ့ပြောင်းခဲ့ဖူးပါတယ်။

ပြည်နယ်ဟိုက်ဒရောလစ်လုပ်ငန်းအဖွဲ့ (DSI) ရဲ့ လက်ထောက်ညွှန်ကြားရေးမှူး မူရက်ဒဂ်ဒီဗီရန်က ဒီဗလီငယ်ကို နေရာရွှေ့ပြောင်းမှုဟာ သမိုင်းဝင်လုပ်ငန်းတစ်ခုဖြစ်တယ်လို့ ပြောကြားခဲ့ပါတယ်။

ဟာဆန်ကက်ဖ်ခရိုင်ကို ရှေးဟောင်းအမွေအနှစ် ထိန်းသိမ်းရာ ဌာနအဖြစ် တူရကီက ၁၉၈၁ ခုနှစ်မှာ သတ်မှတ်ခဲ့ပြီး ခရစ်ယာန်နဲ့ မွတ်စလင်တွေရဲ့ ၀တ်ပြုရာနေရာတွေ၊ ကျောက်ဂူတွေနဲ့ ဘိုင်ဇန်တိုင်းခေတ်က ခံတပ်တွေကို အစိုးရအစီအစဉ်နဲ့ ထိန်းသိမ်းစောင့်ရှောက်ထားပါတယ်။

Ref: AA