ပြည်တွင်းလုပ်ဒုံးခွင်းစနစ် ရုရှားလုပ်ထက် ပိုကောင်းသည်ဟု အီရန်ဝန်ကြီးဟောင်းပြော

စက်တင်ဘာ ၁၁၊ ၂၀၁၈
M-Media

– မိမိတို့ တီထွင်ထုတ်လုပ်ထားတဲ့ S-300 ဒုံးခွင်းစနစ်ဟာ ရုရှားက မူရင်းစနစ်ထက် ပိုပြီး တိကျတယ်လို့ အီရန်ကာကွယ်ရေးဝန်ကြီးဟောင်း အဟ်မဒ် ဗာဟီဒီက ပြောကြားလိုက်ပါတယ်။

S-300 ဟာ ရုရှားက ထုတ်လုပ်ထားတဲ့ ဒုံးခွင်းစနစ်ဖြစ်ပြီး အီရန်ကိုရောင်းချဖို့ ရုရှားဖက်က ငြင်းဆိုခဲ့ပြီးတဲ့နောက် အီရန်က ပုံတူ တီထွင်ထုတ်လုပ်ခဲ့တာ ဖြစ်ပါတယ်။

“အဲဒီစနစ်အတိုင်း ပုံတူ ထုတ်လုပ်သွားမယ်လို့ ကျွန်တော်တို့ သူတို့ကို ပြောခဲ့ပါတယ်။ နောက်ဆုံးမှာတော့ ဘုရားသခင်အလိုတော်၊ အီရန်လူငယ်တွေနဲ့ ပညာရှင်တွေရဲ့ လုံ့လ၀ိရိယတွေကြောင့် ၆ နှစ်အတွင်း ကျွန်တော်တိုဟာ ပိုမိုတိကျတဲ့ ဒုံးခွင်းစနစ်ကို ထုတ်လုပ်နိုင်ခဲ့ပါတယ်” လို့ ဗာဟီဒီက ပြောကြားခဲ့ပါတယ်။

ဗာဟီဒီဟာ အီရန်ကာကွယ်ရေးတက္ကသိုလ်ရဲ့ ဥက္ကဌအဖြစ် လက်ရှိမှာ တာဝန်ထမ်းဆောင်နေပါတယ်။

အီရတ်နဲ့ ဆီးရီးယားနိုင်ငံတို့က စစ်ပွဲတွေမှာ အီရန်ပါဝင်နေမှုနဲ့ပတ်သက်လို့ ဗာဟီဒီက ကာကွယ်ပြောကြားခဲ့ပြီး မိမိတို့ရဲ့ ဒီလိုပါဝင်မှုဟာ နယ်ချဲ့ဖို့မဟုတ်ဘူးလို့ သူက ဆိုပါတယ်။

တိုင်းပြည်အတွင်းမှာရှိနေတဲ့ သုတေသနပညာရှင်တွေနဲ့ အကြီးအကဲတွေကိုလည်း ကျေးဇူးတင်ကြောင်း သူက ထည့်သွင်း ပြောကြားခဲ့ပါတယ်။

Ref: Press TV