မက္ကာ၊ မဒီနာ အုပ်ချုပ်စီမံလုပ်ငန်း ခေါင်းဆောင်ပိုင်းတွင် အမျိုးသမီး ၄၁ ဦး ပါဝင်

စက်တင်ဘာ ၁၁၊ ၂၀၁၈
M-Media

မက္ကာရှိ မတ်စ်ဂျစ်ဒ်ဟရမ် ဗလီဝတ်ကျောင်းတော်

– အစ္စလာမ်သာသနာရဲ့ အမြင့်မြတ်ဆုံး ဗလီဝတ်ကျောင်းတော်များရှိရာ မက္ကာနဲ့ မဒီနာမြို့တို့ရဲ့ အုပ်ချုပ်ရေးနဲ့ စီမံခန့်ခွဲမှုဆိုင်ရာ ခေါင်းဆောင်ပိုင်းနေရာတွေမှာ အမျိုးသမီး ၄၁ ဦး ခန့်အပ်ထားတယ်လို့ ‘မြင့်မြတ်သော ၀တ်ကျောင်းတော်ဆိုင်ရာ စီမံခန့်ခွဲရေးဌာန’ က သတင်းထုတ်ပြန်ပါတယ်။

ဌာနဥက္ကဌ ဒေါက် အဘ်ဒူလ်ရဟ်မန် အလ်-ဆူဒိုင်းစ်က မြင့်မြတ်သော ဗလီဝတ်ကျောင်းတော် နှစ်ခုက ၀န်ဆောင်မှုကဏ္ဍတွေကို တိုးတက်စေရေး ဆောင်ရွက်ရာမှာ အမျိုးသမီးတွေ ထိထိရောက်ရောက်နဲ့ တက်တက်ကြွကြွ ပါဝင်ဆောင်ရွက်နိုင်ရေးအတွက် ဒီလို ခန့်အပ်ခဲ့တာ ဖြစ်တယ်လို့ ပြောကြားခဲ့ပါတယ်။

ဆော်ဒီရဲ့ ၂၀၃၀ ရည်မှန်းချက်မှာ နိုင်ငံအတွင်းက အမျိုးသမီးတွေကို စွမ်းဆောင်ရည်မြှင့်တင်ပေးရေး၊ ၎င်းတို့ရဲ့ စွမ်းဆောင်ရည်အပေါ် ယုံကြည်စွာတာဝန်ပေးရေးတို့ ပါဝင်ပြီး အခုလို ခန့်အပ်မှုက ရည်မှန်းချက်ရဲ့ တစ်စိတ်တစ်ပိုင်း ဖြစ်ပါတယ်။

လတ်တလော မက္ကာ ကျန်းမာရေးဌာနမှာ ညွှန်ကြားရးမှူးအဖြစ် အမျိုးသမီး ၃ ဦး ခန့်အပ်ခံခဲ့ရပြီး သူတို့တွေကတော့ ဟင်ဒါဝီယာ ကျန်းမာရေးစင်တာက ဒေါက်တာ ရှာဟဒ် မိုဟာမက် ရူမာနီ၊ အလ်ဒီယာဖာခရိုင် ကျန်းမာရေးစင်တာက နဟ်လာလ် ဟဒဒ်၊ အလ်-အစ္စကန် ကျန်းမာရေးစင်တာက ဟာတွန် ဘင်သီ အဘ်ဒူလာတို့ ဖြစ်ပါတယ်။

ဂျစ်ဒါမြို့ စည်ပင်သာယာရေးဌာန ပြန်လည်ဖွဲ့စည်းမှုမှာလည်း အမျိုးသမီးတွေကို ခေါင်းဆောင်ပိုင်းနေရာတွေ ပေးအပ်ခဲ့ပါတယ်။

စည်ပင်သာယာရေးဌာနများ ကြီးကြပ်အုပ်ချုပ်ရေးမှူး ရာထူးကို အေမာနီ မဟ်မူဒ်ဆိုတဲ့ အမျိုးသမီးက ရယူထားပါတယ်။

Ref: Saudigazeete