ဗုဒ္ဓဟူးနေ့မနက် နိုင်ငံတကာ သတင်းများ

စက်တင်ဘာ ၁၂၊ ၂၀၁၈
M-Media

ဗီယက်နမ်မှ ခွေးသားအရောင်းဆိုင်တစ်ခု

တောင်ကိုရီးယားတွင် မားစ်ရောဂါ သတိပေးချက် ထုတ်ပြန်
================
ကူဝိတ်နိုင်ငံက ပြန်လာတဲ့ အသက် ၆၁ နှစ်အရွယ် အဘွားအိုမှာ မားစ်ရောဂါ ဖြစ်နေတယ်ဆိုတာကို တွေ့ရပြီးတဲ့နောက် တောင်ကိုရီးယားနိုင်ငံက မားစ်ရောဂါသတိပေးချက် ထုတ်ပြန်လိုက်ပါတယ်။ အဲဒီအမျိုးသမီးဟာ ကူဝိတ်ကနေ ဒူဘိုင်း၊ ဒူဘိုင်းကနေတစ်ဆင့် ဆိုးလ်ကို ပြန်လာတာဖြစ်ပြီး သူမ လိုက်ပါလာတဲ့ လေယာဉ်က ခရီးသည် ၄၄၀ ကိုလည်း အာဏာပိုင်တွေက နောက်ကြောင်းလိုက်နေကာ လူ ၅၀ လောက်ကိုတော့ လိုက်လို့မရဘူးလို့ ပြောပါတယ်။ ဒါဟာ တောင်ကိုရီးယားနိုင်ငံမှာ ၃ နှစ်အတွင်း ပထမဆုံးအကြိမ် မားစ်ရောဂါကို တွေ့ရှိမှုလည်း ဖြစ်ပါတယ်။

ခွေးသားစားမှု ရပ်တန်ဖို့ ဟနွိုင်းအစိုးရက ပြည်သူများကို တိုက်တွန်း
===============
တိုင်းပြည်ရဲ့ပုံရိပ်ကို ကျဆင်းစေပြီး ခွေးရူးရောဂါ ပြန့်ပွားမယ့် အန္တရာယ်လည်း ရှိနေတာကြောင့် ခွေးသားစားသုံးမှုကို ရပ်တန့်ကြဖို့အတွက် ဗီယက်နမ်နိုင်ငံမြို့တော် ဟနွိုင်းက ပြည်သူ့ကော်မတီကနေ ပြည်သူတွေကို တိုက်တွန်းစာတစ်စောင် ထုတ်ပြန်ထားပါတယ်။ ခွေးသားဟာ ဗီယက်နမ်နိုင်ငံမှာ လူကြိုက်များတဲ့ အသားတစ်မျိုးဖြစ်ပြီး ဆန်အရက်တွေ၊ ဘီယာတွေနဲ့ တွဲဖက်စားသုံးလေ့ရှိပါတယ်။ ပြည်သူ့ကော်မတီက ထုတ်ပြန်တဲ့စာမှာ ကြောင်သားစားသုံးမှုလည်း ရပ်တန့်ကြဖို့ ပါဝင်ပါတယ်။ အဲဒီလို စားသုံးဖို့အတွက် ခွေးတွေ၊ ကြောင်တွေကို သတ်ဖြတ်မှုဟာ ရက်စက်လေ့ရှိပြီး ဟနွိုင်းအစိုးရက ဒီအလေ့အကျင့်ကို တစ်ဖြည်းဖြည်းချင်း ဖျောက်သွားဖို့ မျှော်လင့်နေပါတယ်။

အမေရိကန်ဒေါ်လာအပေါ်မှီခိုရမှုကို ရုရှားနှင့် တရုတ်တို့ လျှော့ချမည်
==================
ရုရှားနဲ့ တရုတ်တို့ဟာ ကုန်သွယ်ရေးမှာ အမေရိကန်ဒေါ်လာ အသုံးပြုမှုကို လျှော့ချပြီး သူတို့ရဲ့ ကိုယ်ပိုင်ငွေကြေးတွေကိုသာ အသုံးပြုသွားမယ်လို့ ရုရှားသမ္မတ ဗလာဒီမီရ် ပူတင်က တရုတ်သမ္မတ ရှီကျင့်ဖျင်နဲ့ မနေ့က တွေ့ဆုံမှုအပြီးမှာ ပြောကြားခဲ့ပါတယ်။ ရုရှားဟာ ခရိုင်းမီးယားပြဿနာကြောင့် အမေရိကန်နဲ့ အနောက်အုပ်စုရဲ့ ပိတ်ဆို့မှုတွေကို ခံနေရပြီး တရုတ်ကလည်း အမေရိကန်နဲ့ ကုန်သွယ်ရေးဆိုင်ရာ အငြင်းပွားမှုတွေ ဖြစ်နေပါတယ်။ ပူတင်ကတော့ သူတို့ရဲ့ ကိုယ်ပိုင်ငွေကြေးနဲ့ ကုန်သွယ်ရေး လုပ်တာဟာ ဘဏ်တွေရဲ့ သွင်းကုန်၊ ထုတ်ကုန် လုပ်ငန်းတွေကို ပိုမိုတည်ငြိမ်စေမှာဖြစ်တယ်လို့ ဆိုပါတယ်။

Ref: CNA