မလေးဝန်ကြီးချုပ်ဟောင်းကို ခြစားမှုတိုက်ဖျက်ရေးကော်မရှင်က ဒုတိယအကြိမ် ဖမ်းဆီး

စက်တင်ဘာ ၁၉၊ ၂၀၁၈
M-Media

– နိုင်ငံပိုင် 1MDB လုပ်ငန်းက ငွေကြေး ဘီလီယံနဲ့ချီ ပျောက်ဆုံးမှုနဲ့ပတ်သက်ပြီး စက်တင်ဘာ ၂၀ ရက်နေ့မှာ ကြားနားစစ်ဆေးဖို့အတွက် ၀န်ကြီးချုပ်ဟောင်း နာဂျစ်ရာဇတ်ကို မလေးရှား ခြစားမှုတိုက်ဖျက်ရေးကော်မရှင် MACC က ဒီကနေ့မှာ ဖမ်းဆီးလိုက်ပါတယ်။

MACC က ထုတ်ပြန်တဲ့ ကြေငြာချက်မှာ ကြာသာပတေးနေ့ နာဂျစ်ကို တရားရုံးမတင်ခင် ရဲတပ်ဖွဲ့နဲ့အတူ စစ်ချက်ယူသွားမယ်လို့ ဖော်ပြထားပါတယ်။ နာဂျစ်ဟာ အာဏာအလွဲသုံးစားလုပ်မှုနဲ့ စစ်ဆေးခံရမှာ ဖြစ်ပါတယ်။

နာဂျစ် ၀န်ကြီးချုပ်အဖြစ် တာဝန်ထမ်းဆောင်စဉ်ကာလအတွင်းမှာ 1MDB က ဒေါ်လာ ဘီလီယံချီ ပျောက်ဆုံးခဲ့ပြီး မဟာသီယာ မိုဟာမက် ဦးဆောင်တဲ့ အစိုးရသစ်က စုံစမ်းစစ်ဆေးမှုတွေ ပြုလုပ်ကာ နာဂျစ်ကို ယုံကြည်မှုချိုးဖောက်မှုဆိုင်ရာ စွဲချက် ၃ ခု၊ ငွေကြေးခ၀ါချမှု စွဲချက် ၃ ခု၊ အာဏာအလွဲသုံးစားလုပ်မှု စွဲချက် ၁ ခု စုစုပေါင်း ၇ ခုနဲ့ တရားစွဲဆိုခဲ့ပါတယ်။ နာဂျစ်ကတော့ သူဟာ အပြစ်မရှိဘူးလို့ ပြောဆိုခဲ့ပါတယ်။

သူ့ရဲ့ ဘဏ်အကောင့်ထဲကို ၀င်လာတဲ့ ကန်ဒေါ်လာ ၆၂၈ သန်းဟာ ဆော်ဒီတော်ဝင်မိသားစုက ပေးတဲ့ လက်ဆောင်ဖြစ်တယ်ဆိုတဲ အထောက်အထားတွေကို နာဂျစ်က စက်တင်ဘာ ၁၀ ရက်နေ့မှာ ထုတ်ပြန်ခဲ့ပါတယ်။ ဒါ့အပြင် အသေးစိတ်ကို နောက်ပိုင်းမှာ ဆက်လက်ထုတ်ပြန်မယ်လို့လည်း ဆိုပါတယ်။

မနက်ဖြန်ရုံးချိန်းဟာ နေ့လည် ၃ နာရီဖြစ်တာကြောင့် နာဂျစ်ဟာ အချုပ်ထဲမှာ အနည်းဆုံး ၂ ရက်လောက်နေရဖို့ ရှိပါတယ်။

နာဂျစ်ဟာ 1MBD ကိစ္စအတွက် အရင်ကလည်း MACC ရဲ့ ဖမ်းဆီးမှုကို ခံခဲ့ရပြီး အာမခံနဲ့ လွတ်မြောက်လာတာ ဖြစ်ပါတယ်။

Ref: CNA